इबरानिओ 8 - बुक्सा

नओ बड़ो पुजारी

¹ अब जो बात हम कैरए हैं बामै सबसै खास बात जौ है कै, हमरो ऐंसो बड़ो पुजारी है जो सुरग मै सकतिसाली परमेसर के सिंगासन के खाने हात की ओर बैठै है।

² और बौ सुरग की पबित्‍तर जघै और बा सच्‍चे तम्बू को बड़ो पुजारी है, जिसकै किसी आदमी नै ना पर परमेसर नै बनाओ है।

³ सिगरे बड़े पुजारी कै इसताँई रक्‍खो जावै है कै बे बलि और चढ़ाबो चढ़ाऐ। इसताँई जौ जरूरी है कै जा बड़े पुजारी के धौंरे बी कुछ चढ़ानै के ताँई होए।

⁴ अगर मसी धरती मै होतो तौ बौ कबी बी पुजारी ना बन सकै हो। कैसेकै हिंया पैलेसैई नियम के हिसाब सै चढ़ाबो चढ़ानै बारे पुजारी लोग हैं।

⁵ जिन चीजौ की सेवा पुजारी लोग करै हैं बौ सुरग की नकल और छाँई के हाँई है। जब मूसा तम्बू बनानै बारो हो तौ तबई परमेसर नै बाकै जौ चितौनी दई कै, “तू सिगरे चीजौ कै बैसेई बनईए जैसो मैंनै तेकै पहाड़ मै दिखाओ हो।”

⁶ पर जो पुजारी को काम ईसु कै मिलो है बौ उनसै अच्‍छो है, कैसेकै बौ और बी अच्‍छे करारनामे को बिचौंदिया है, कैसेकै जो नओ करारनामो है बौ बढ़िया बादे के ऊपर टिको है।

⁷ कैसेकै अगर पैले करारनामो मै कोई खोटई ना होतो तौ दूसरो करारनामो काए करतो?

⁸ पर परमेसर उनकी गलती लिकारकै उनकै जौ कैबै है कै, “परभु जौ कैबै है कै, बौ बखत आनै बारो है, मैं ईसराइल के खानदान और यहूदा के खानदान के संग एक नओ करारनामो करंगो।

⁹ और जौ करारनामो बा करारनामो के हाँई ना होगो जो मैंनै उनके बापदादौं के संग करो हो। जब मैं उनको हात पकड़कै उनकै मिसर देस सै लिकार लाओ, कैसेकै बे मेरे करारनामो मै बने ना रैहए, तब मैंनै उन लोगौ कै अनदेखो कर दओ।

¹⁰ उन दिनौ के बाद परभु नै फिर ऐंसे कैई कै, मैं जौ करारनामो ईसराइली लोगौ के संग करंगो कै, मैं अपने नियमौ कै उनके मन मै डारंगो और बाकै उनके दिलौ मै लिखंगो मैं उनको परमेसर हौंगो, और बे मेरे लोग हौंगे।

¹¹ किसी कै बी अपने पड़ोसी या अपने भईयौ कै जौ सिकानै की जरूरत ना है कै, ‘तुम परभु कै जानौ।’ कैसेकै छोटे सै लेकै बड़े तक सबई मैंकै जान लंगे।

¹² कैसेकै मैं उनके बुरे कामौ कै माफ करंगो, और फिर कबी उनके पापौं कै मैं याद ना करंगो।”

¹³ जब बानै नओ करारनामो करो तौ तबई बानै पुराने करारनामे कै खतम कर दओ और जो चीज पुरानी होवै हैं और गर जावै हैं बे एकदम सैई खतम हो जावै हैं।