इबरानिओ 7 - बुक्सामलकीसदेक पुजारी 1 जौ मलकीसदेक सालेम को राजा हो और परमपरधान परमेसर को पुजारी हो। जब इब्राहिम उन चार राजाऔं कै हरा कै बापस आ रओ हो तब मलकीसदेक बाकै रस्ता मै मिलो और बानै बाकै आसीरबाद दओ। 2 और इब्राहिम जो कुछ जीत कै ला रओ हो बाको दसमौ हिस्सा बाकै दओ। मलकीसदेक के नाम को पैलो मतलब है, “नियाय के संग राज कन्नै बारो,” और दूसरो मतलब सालेम को राजा, मतलब “सान्ति को राजा।” 3 हम जौ ना जानै हैं कै मलकीसदेक के अईया-अब्बा और बापदादा कौन हे और बौ कब जलमो और कब मरो। पर जौ परमेसर के लौंड़ा के हाँई हमेसा को पुजारी बनो। 4 जरा तुम जा बात मै गौर करौ कै, मलकीसदेक कितनो बड़ो आदमी हो, जिसकै हमरे बुजरग इब्राहिम नै बी जीती भई सबसै अच्छी चीजौ को दसमो हिस्सा दओ। 5 नियम के हिसाब सै लेबी गोत सै जो बी पुजारी बनै हैं तौ उनके ताँई जौ आगियाँ है कै बे लोगौ सै मतलब अपने सगे-सम्बंधी भईयौ के गोत सै दसमो हिस्सा लैं, चाँहे बे सिगरे इब्राहिम के खानदान के हौं। 6 पर मलकीसदेक लेबी गोत को ना हो, तब्बी बानै इब्राहिम सै दसमो हिस्सा लओ और बाकै आसीरबाद दओ, जिसके संग परमेसर नै बादो करर खाओ हो। 7 और जा बात मै कोई सक ना है कै छोटो बड़े सै आसीस पावै है। 8 हिंया जो बी दसमो हिस्सा लेबै है बौ मरनै बारो आदमी है। पर मलकीसदेक के बारे मै पबित्तर सास्तर मै जौ लिखो है कै, बौ जिन्दो है। 9 तौ हम जौ बात कैह सकै हैं कै जो लेबी लोग दसमो हिस्सा लेबै हैं, उन्नै बी इब्राहिम के दुआरा दसमो हिस्सा दओ। 10 कैसेकै जब मलकीसदेक लेबी के पूरबज इब्राहिम सै मिलो हो तब लेबी पैदा बी ना भए हे। 11 लेबी गोत के पुजारी दुआरा मूसा को नियम लोगौ कै मिलो है। अगर लेबी पुजारी के काम सै पूरोपन मिलै है, तौ दूसरे तरै के पुजारी की आनै की जरूरत काए है? और एक ऐंसे पुजारी की जो मलकीसदेक के हाँई होए, ना की हारून के खानदान को। 12 कैसेकै जब पुजारी बदलै है तौ पुजारी कै चुननै के नियम कै बी बदलनो जरूरी है। 13 कैसेकै जिस आदमी के बारे मै जे बात कैई गई हैं, बौ दूसरे गोत को है, जिसमै सै किसी नै बी बेदी की सेवा ना करी। 14 कैसेकै जौ बात पक्की है कै हमरो परभु यहूदा के खानदान मै पैदा भओ और मूसा नै जा खानदान के लोगौ कै पुजारी होनै के बारे मै कुछ ना कैई। ईसु के हाँई मलकीसदेक 15 तौ जौ बात और बी पक्की है कै मलकीसदेक के हाँई कोई दूसरो पुजारी आबै है। 16 नियम कैबै है, लेबी गोत सैई पुजारी आनो है, ईसु बा नियम कै पूरो करते भए ना पर नास ना होनै बारी जिन्दगी की सकति सै पुजारी बनो है। 17 कैसेकै बाके बारे मै पबित्तर सास्तर मै जौ गभाई दई है कै, “तू मलकीसदेक के हाँई हमेसा के ताँई पुजारी है।” 18 पुजारी लोगौ के बारे मै जो पैलो नियम हो बौ कमजोर और बेकार हो इसताँई बाकै हटा दओ। 19 कैसेकै मूसा को नियम किसी कै बी पूरी तरै सै पक्को ना करै है। पर अब हमरे ताँई एक ऐंसी अच्छी आस रक्खी गई है, जिसके दुआरा हम परमेसर के धौंरे जा सकै हैं। 20 परमेसर नै सपत खाकै मसी कै बड़ो पुजारी बनाओ पर दूसरौं कै बगैर सपत के पुजारी बनाओ हो। 21 पर ईसु सपत केई दुआरा पुजारी बनो, जब परमेसर नै बासै कैई ही कै, “परभु नै सपत खाई है, और बौ अपनो मन कबी ना बदलैगो, तू एक हमेसा को पुजारी है।” 22 जा सपत की बजै सै ईसु एक अच्छे करारनामो को जमानती ठैरो। 23 पैले ऐंसे भौस्से पुजारी होए करै हे कैसेकै मौत उनकै बा पद मै ना रैहन देवै ही। 24 पर ईसु अमर है, इसताँई बाको जो पुजारी को पद है बौ बी हमेसा रैहगो। 25 इस बजै सै ईसु उनकै पूरी मुक्ति दे सकै है, जो लोग बाके दुआरा परमेसर के धौंरे आवै हैं। कैसेकै बौ उनके ताँई पिराथना कन्नै के ताँई हमेसा जिन्दो है। 26 ऐंसोई बड़ो पुजारी हमरे ताँई सई है, जो पबित्तर और खरो और बगैर खोट को और पापिऔं सै अगल और जिसकै सुरग सै बी ऊँचो रखर खाओ होए। 27 और उन बड़े पुजारी के हाँई ईसु कै हर रोज पैले अपने पापौं के ताँई और फिर सिगरे लोगौ के पापौं के ताँई बलि चढ़ानै की जरूरत ना है; कैसेकै बानै खुद कै बलि चढ़ाकै एकई दफै मै हमेसा के ताँई निपटारो कर दओ है। 28 कैसेकै मूसा को नियम जिन लोगौ कै बड़ो पुजारी बनाबै हो उनमै भौस्सी कमी है पर परमेसर नै सपत के संग एक बादो करो और जौ बादो नियम के बाद आओ और जा बादे सैई लौंड़ा कै बड़ो पुजारी ठैराओ जो हमेसा-हमेसा के ताँई पूरी तरै पक्को है। |
New Life Compute Institute [NLCI] - CC BY-NC-ND 4.0