इबरानिओ 4 - बुक्सापरमेसर के लोगौ को आराम 1 इसताँई जब तक परमेसर की ठैराई भई आराम कन्नै की जघै मै जानै को बादो अबी बी बनो भओ है तब तक हमकै चौकस रैहनो चँईऐ जिस्सै कै कोई बी आदमी बा बादे सै छुट ना जाऐ। 2 कैसेकै हमकै बी उनके हाँई अच्छी खबर सुनाई गई पर जैसी अच्छी खबर उन्नै सुनी, उनकै बासै कुछ फाएदा ना भओ कैसेकै उन्नै परमेसर की बात माननै बारौ के बिसवास के हाँई बिसवास ना करो। 3 और हम जिनौनै बिसवास करो आराम कन्नै की जघै मै पौंचे, पर परमेसर नै दूसरे लोगौ के बारे मै कैई ही, “मैंनै घुस्सा मै आकै कसम खाई कै, ‘बे मेरी आराम कन्नै की जघै मै कबी ना पौंचंगे।’” जबकि दुनिया के सुरूआत सैई बाके काम पूरे हो गए हे। 4 कैसेकै सातमे दिन के बारे मै पबित्तर सास्तर मै कहीं ऐंसो लिखो है कै, “परमेसर नै सातमे दिन अपने सिगरे काम निपटा कै आराम करो।” 5 और फिर ऐंसे कैओ गओ है कै, “बे मेरी आराम कन्नै की जघै मै कबी ना पौंचंगे।” 6 जो आराम कन्नै की जघै है बौ अब्बी लोगौ के ताँई खुली है, कैसेकै जिन लोगौ कै पैलेई अच्छी खबर सुनाई गई ही बे आगियाँ ना माननै कै बजै सै आराम कन्नै की जघै के भीतर ना जा सके। 7 इसताँई परमेसर नै एक और खास दिन ठैराओ जिसको नाम “आज को दिन है।” भौस्से सालौं के बाद दाऊद के दुआरा परमेसर नै बा “आज के दिन” के बारे मै कैई, जिस दिन के बारे मै पैले बी कैओ जा चुको हो, “अगर तुम आज बाकी अबाज सुनौ तौ अपने दिलौ कै कठोर ना करिओ।” 8 अगर यहोसू उनकै आराम कन्नै की जघै मै पौंचा देतो, तौ परमेसर बाद मै किसी दूसरे दिन के बारे मै ना कैतो। 9 इसताँई जौ बात जानलो कै परमेसर के लोगौ के ताँई आराम कन्नै को बखत अबी और बाकी है। 10 कैसेकै जो कोई परमेसर सै मिले भए आराम मै पौंचैगो, बौ अपने कामौ सै बी आराम पागो, जैसो परमेसर नै अपने कामौ कै पूरो करकै आराम करो हो। 11 इसताँई हमकै बी आराम कन्नै की जघै मै जानै के ताँई कोसिस करती रैहनी चँईऐ कै, कहीं ऐंसो ना होए कै जैसे हुकम ना माननै की बजै सै उनको नास भओ, बैसोई हमरो बी कहीं नास ना हो जाऐ। 12 कैसेकै परमेसर को बचन जिन्दो और सकतिसाली है और बौ दोधारी पैनी भई तरवार सै बी जादा पैनो है। बौ पिरान, आत्मा और जोड़ौ और गूदा कै अगल करकै आर पार छेदै है और हमरे दिल की बातौं और इच्छाऔं कै जानै है। 13 परमेसर की नजरौ सै कुछ बी छिप ना सकै है। जो कुछ बानै बनार खाओ है बौ सिगरो बाके सामने उघड़ो भओ और खुलो है और हम सबई जनी कै बाकै अपनो अपनो हिसाब दैनो है। ईसु हमरो बड़ो पुजारी है 14 जब हमरे धौंरे एक ऐंसो बड़ो पुजारी है, जो सुरग मै गओ है, और बौ परमेसर को लौंड़ा ईसु है। इसताँई हम जो मानै हैं बामै पक्के रैंह। 15 कैसेकै हमरो बड़ो पुजारी ऐंसो ना हैं जो हमरी कमजोरिऔं मै तरस ना खाऐ, कैसेकै बाकै बी हर तरै सै हमरे हाँई परखो तब्बी बानै पाप ना करो। 16 इसताँई आऔ, हम बी बा किरपा के सिंगासन की ओर चलैं, जिस्सै कै हमकै जरूरत के बखत सायता कन्नै के ताँई दया मिलै। |
New Life Compute Institute [NLCI] - CC BY-NC-ND 4.0