इबरानिओ 2 - बुक्सा

चौकस रैहनै के ताँई चितौनी

¹ इसताँई हमनै जो कुछ सुनो है बामै खास करकै धियान देनो चँईऐ, जिस्सै कै हम भटकनै ना पांऐ।

² कैसेकै जो बचन सुरगदूतौं के दुआरा कैओ गओ हो बौ सच्‍चो साबित भओ। अगर हर एक अपराद और कैहनो ना माननै बारौ नै सई सजा पाई

³ तौ भला हम लोग इत्‍ती अच्‍छी मुक्‍ति कै छोड़कै आनै बारी सजा सै कैसे बचंगे? जिसके बारे मै पैलेई परभु नै कैई ही और जिन लोगौ नै सुनी है और उन्‍नै जौ साबित बी करो कै जे बात सच्‍ची हैं।

⁴ परमेसर नै खुद चिन्‍नौ, चमत्कारौं और अचम्बे के कामौ के दुआरा अपनी इच्‍छा के अनुसार बाँटे भए पबित्‍तर आत्‍मा के आत्‍मिक दानौ के दुआरा गभाई दई।

मुक्‍ति दैनै बारो

⁵ परमेसर नै बा आनै बारी दुनिया कै सुरगदूतौं के हक मै ना करो, जिसके बारे मै हम बोलै हैं।

⁶ किसी नै कहीं जौ गभाई दई है, “हे परमेसर आदमी का है, जो तू बाके बारे मै सोचै? और आदमी को लौंड़ा का है, जिसके ताँई तू फिकर करै है?

⁷ तैनै कुछ घड़ी के ताँई बाकै सुरगदूतौं सै थोड़ेई नीचे करो। और तैनै बाकै बड़ाई और इज्‍जत को मुकट पैहराओ।

⁸ और तैनै सब कुछ बाके पाँऐऔं के नीचे कर दओ।” और सिगरो बाके हातौ मै दे दओ और परमेसर नै ऐंसो कुछ ना छोड़ो जो बाके हक मै ना हो। पर अबी तक हम सबई कुछ बाके बस मै ना देख रए हैं।

⁹ पर हम बा ईसु कै देखै हैं जिसकै कुछ घड़ी के ताँई सुरगदूतौं सै नीचे कर दओ हो, जिस्सै कै बौ परमेसर की दया सै सबई जनी के ताँई मौत कै महसूस करै। बाके मरनै को दुख झेलनै की बजै सै बड़ाई और इज्‍जत को मुकट पैहरे भए देखै हैं।

¹⁰ परमेसर नै सबई कुछ बनाओ और बाके ताँई और बाके दुआरा सबई कुछ है। बाकै जौ सई लगो कै बानै ईसु मसी कै बाके दुख झेलनै सैई पक्‍को करो और बाकी भौस्सी औलाद बाकी बड़ाई के हिस्सेदार बनै। और ईसु उनको मुक्‍तिदाता है।

¹¹ परमेसर के ताँई पाप के सौभाब सै अगल कन्‍नै बारे और पाप के सौभाब सै अगल होनै बारे एकई अब्बा के हैं, इसताँई ईसु उनकै अपनो भईया कैनै सै मुकरैगो ना।

¹² और बौ कैबै है कै, “मैं अपने लोगौ के सामने तेरे नाम कै उठांगो, और बिसवासिऔ की मंडली मै मैं तेरे गीत गांगो।”

¹³ और बानै फिर कैई कै, “मैं तुमरे ऊपर भरोसो रक्‍खौ हौं।” और बानै फिर कैई कै, “देखौ परमेसर नै जो औलाद मैंकै दई हैं बे और मैं बाके ऊपर भरोसो रखंगे।”

¹⁴ इसताँई जैसे बालक मांस और खून सै बनो है बैसेई बौ बी खून और मांस के सरीर मै साजेदार बनो है जिस्सै कै बौ अपनी मौत के दुआरा बा सैतान कै जिसकै मौत के ऊपर हक मिलो है बाकै नास कर सकै।

¹⁵ और जित्‍ते मौत के डर सै जिन्‍दगी भर गुलामी मै फसे हैं उनकै छुटाले।

¹⁶ कैसेकै जौ बात तौ साप है कै ईसु सुरगदूत की सायता ना पर इब्राहिम के खानदान की सायता करै है।

¹⁷ इसताँई बाकै सिगरी बातौं मै अपने भईयौ और बहनौ के हाँई बननो जरूरी हो। जिस्सै बौ बिसवासजोग और दया कन्‍नै बारो बड़ो पुजारी बनकै परमेसर की सेवा करै। और बानै खुद कै बलि के रूप मै दे दओ जिस्सै कै लोगौ के पापौं सै उनकै माफी दिब्बा सकै।

¹⁸ कैसेकै जब बौ परखो गओ तौ तब बानै दुख झेलो, इसताँई बौ उनकी सायता कर सकै है जिनकै बुरी बातौं मै परखो जावै है।