इबरानिओ 13 - बुक्सामसी जिन्दगी जीनै की सला 1 तुम्मै भईया और बहनो को पियार बनो रैह। 2 पौंहनेऔ की खातरदारी कन्नी ना भूलिओ, कैसेकै ऐंसो कन्नै के दुआरा कुछ लोगौ नै अनजाने मै सुरगदूतौं की खातरदारी करी है। 3 जो लोग कैदी हैं उनकै इस तरै याद करौ जैसे कै तुम बी उनके संग कैद मै हौ। जिनके संग बुरो बरताब करो जावै है उनकै बी ऐंसे याद रक्खौ कै तुमरे संग बी बुरो बरताब करो जा रओ है। 4 बिहा सब मै इज्जत की बात समजी जाऐ और लोग-बईयर एक दूसरे के संग बिसवासजोग रैंह। कैसेकै परमेसर बैबिचार कन्नै बारौ कै और गलत तरीका सै सरीरिक सम्बंध रखनै बारौ कै सजा देगो। 5 अपनी जिन्दगी कै पैसौ के लालच सै दूर रक्खौ और जो कुछ तुमरे धौंरे है बाई मै खुस रौह, कैसेकै परमेसर नै जौ कैई है कै, “मैं तुमकै कबी ना छोड़ंगो। मैं तुमकै कबी ना तियागंगो।” 6 इसताँई हम बेधड़क होकै कैबै हैं, “परभु मेरी सायता कन्नै बारो है इसताँई मैं ना डरंगो और कोई बी आदमी मेरो कुछ ना बिगाड़ सकै है।” 7 जो तुमरे अगुबा हे, जिनौनै परमेसर को बचन तुमकै सुनाओ हो उनकै याद रक्खौ और धियान दो कै बे कैसे जीए और कैसे मरे और उनके बिसवास की नकल करौ। 8 ईसु मसी कल और आज और हमेसा एक जैसो है। 9 तुम तरै-तरै की सिक्छा के बैहकाबे मै ना अईओ। तुमरे दिल के ताँई जौ अच्छो है कै बौ परमेसर की किरपा के दुआरा मजबूत करो जाय। पर खानै पीनै के नियम के ताँई ना, कैसेकै जो खानै पीनै के नियम कै मानै है उनकै कुछ फाएदा ना मिलै है। 10 हमरी एक ऐंसी बेदी है, जिसमै सै खानै को हक उन लोगौ कै ना है जो तम्बू मै सेवा करै हैं। 11 कैसेकै बड़ो पुजारी जिन जनाबरौ को खून पाप की बलि के ताँई सबसै पबित्तर जघै मै ले जावै है, उन जनाबरौ कै छाबनी के बाहार जरा दओ जावै है। 12 इसताँई ईसु नै लोगौ कै अपने खून के दुआरा पबित्तर कन्नै के ताँई सैहर के बाहार दुख उठाओ है। 13 इसताँई आऔ, और बाकी बेजती कै अपने ऊपर लेकै छाबनी के बाहार बाके धौंरे चल पड़ैं। 14 कैसेकै जा धरती मै हमेसा के ताँई हमरो कोई सैहर ना है और हम बा सैहर को पैंड़ो देख रए हैं जो आनै बारो है। 15 इसताँई आऔ, हम ईसु के दुआरा परमेसर कै एक ऐंसी बलि चढ़ाऐ जो हमरे मौह के दुआरा बाकी बड़ाई करी जावै है। जौई है बाके नाम की बड़ाई कन्नो। 16 भलाई कन्नी और अपनी चीजौ कै दूसरे के संग बाँटनो ना भूलिओ कैसेकै ऐंसे बलिदानौ सै परमेसर खुस होवै है। 17 अपने अगुबौं की बात मानौ और बाके हक मै रैहईओ, कैसेकै बौ तुमरी जिन्दगी की चौकसी करै है कैसेकै उन अगुबौं कै परमेसर के सामने लेखो-जोखो दैनो है। बे जौ काम खुसी के संग करैं, ना की रो रो कै। अगर बे दुख सै करैं तौ तुमकै कुछ फाएदा ना है। 18 हमरे ताँई पिराथना करते रौह, कैसेकै हमकै पक्को बिसवास है कै हमरो मन बिलकुल साप है और हम सिगरी बातौं मै अच्छे चाल-चलन सै जिन्दगी बितानो चाँहै हैं। 19 मैं जौ बिनती करौ हौं कै तुम और बी जादा ऐंसोई करते रैहईओ जिस्सै मैं जल्दी तुमरे धौंरे फिर सै आ सकौं। आसीरबाद और नमस्कार 20 अब सान्ति दैनै बारे परमेसर जिसनै हमरे परभु ईसु कै जो भेड़ौ को अच्छो गड़रिया है, बाकै हमेसा के करारनामे के खून के दुआरा मरे भएऔं मै सै जिन्दो करो है 21 अपनी इच्छा कै पूरी कन्नै के ताँई परमेसर हर एक अच्छी चीजौ सै तुमकै भरै, और ईसु मसी के दुआरा जो परमेसर कै अच्छो लगै है बौ बाकै तुमरे भीतर करै। ईसु मसी की बड़ाई हमेसा-हमेसा होती रैह। ऐंसोई होए। 22 पियारे भईयौ और बहनौ, मैं तुमसै बिनती करौ हौं कै इन सिकानै बारी बातौं कै तुम बरदास करौ कैसेकै मैंनै तुमकै जौ चिट्ठी थोड़ेई सब्दौ मै लिखी है। 23 मैं तुम लोगौ कै जौ खबर देवौ हौं कै हमरो भईया तीमुथियुस जेल सै छुट गओ है और अगर बौ जल्दीई आ गओ तौ मैं बी बाके संग तुमसै मिलनै आंगो। 24 अपने सिगरे अगुबौं और परमेसर के लोगौ कै नमस्कार कैह देईओ और इटली के लोग बी तुमकै नमस्कार कैबै हैं। 25 परमेसर की किरपा तुम सबई के संग रैह। ऐंसोई होए। |
New Life Compute Institute [NLCI] - CC BY-NC-ND 4.0