इबरानिओ 12 - बुक्सापरमेसर हमरो अब्बा है 1 इसताँई जब गभाऔ की इत्ती बड़ी भीड़ हमकै घेरे भए है, तौ आऔ हम हर एक रुकाबट और उलझानै बारे पापौं सै छुट कै जो दौड़ हमकै दौड़नी है, बाकै सबर के संग दौड़ने मै लगे रैंह। 2 हमरे बिसवास की सुरूआत कन्नै बारे और पक्को कन्नै बारे ईसु की ओर देखते रौह। ईसु नै लोगौ की बेजती कै अनदेखो करकै कुरूस को दुख झेलो जिस्सै कै बौ उनके ताँई रखी गई खुसी कै पाऐ। अब ईसु परमेसर के सिंगासन के खाने हात बैठो है। 3 इसताँई बाको धियान करौ जिसनै पापी लोगौ को इत्तो बिरोद सैह लओ जिस्सै कै तुमरो मन थक कै हार ना मानै। 4 तुमनै पाप सै लड़ते भए ऐंसो मुकाबलो ना करो है कै तुमरो खून बैहओ होए। 5 का तुम बा हौसला कै भूल गए हौ जो परमेसर नै तुमकै अपने बालक समज कै दओ हो, “मेरे पियारे बालकौ, परभु तुमकै सुदारै है बा बात कै हलके मै ना लेईओ, और अगर बौ तुमकै डाँटै तौ हिम्मत मत हारिओ। 6 कैसेकै परभु जिस्सै पियार करै है बाकै सुदारै बी है, और जिसकै बौ अपनो लौंड़ा बनाबै है बाकै सजा बी देवै है।” 7 जब्बी परमेसर तुमकै सुदारै तौ तुम बाकै बरदास करौ, कैसेकै बौ तुमकै अपनो बालक समजकै ऐंसो बरताब करै है। का ऐंसो कोई बालक है जिसकै बाके अब्बा नै सुदारो ना होए? 8 अब्बा के धौंरे सजा सब कैई मिलै है और अगर तुमकै सजा ना मिल रई है तौ तुम बाके बालक ना हौ पर ऐंसे बालक हौ जिसके अब्बा को पतोई ना है। 9 संग-संग हमरे ताँई जा दुनिया को अब्बा बी है जो सजा देवै है और हम तब्बी बाकी इज्जत करै हैं। तौ हमरो आत्मिक अब्बा परमेसर के हक मै रैहनो और बी जादा अच्छो ना है? बासै हमकै जिन्दगी मिली है। 10 हमरो जा दुनिया को अब्बा कुछ बखत के ताँई जैसो बाकै अच्छो लगै है बैसे सुदारै है, पर परमेसर हमरे फाएदा के ताँई हमकै सुदारै है कै हम बी बाके हाँई पबित्तर बनै। 11 सैरे सुदार थोड़े टैम के ताँई अच्छे ना लगै हैं, पर दुख देवै हैं, पर बा सुदार सै सीक मिलै है और बाद मै सान्ति और नेकी को फल पावै हैं। 12 इसताँई ढीले हातौ कै ऊपर उठाऔ और कमजोर घूंटेऔ कै सीदे करौ, 13 और अपने पाँऐऔं के ताँई रस्ता सीदी करौ, जिस्सै कै जो लंगड़े हैं बे चंगे होते जांऐ। 14 सबई लोगौ के संग सान्ति से रैहनै के ताँई और पबित्तर बनकै रैहनै के ताँई लगातार कोसिस करौ, जो पबित्तर ना है बौ परभु कै देख ना पागो। 15 धियान सै रैहईओ ऐंसो ना होए कै कोई बी परमेसर की किरपा सै छुट जाय, और कोई करई जड़ फटकै तुमरे ताँई मुसीबत लाय और जिसकी बजै सै भौस्से लोग अपबित्तर हो जावै हैं। 16 ऐंसो ना होए, कै तुम्मै सै कोई बी कुकरम कन्नै बारो या ऐसाब के हाँई बिना परमेसर को हो जाऐ, जिसनै एक दफै की रोटी के ताँई बड़ो लौंड़ा होते भए अपने हक कै बेच दओ। 17 तुम तौ जौ जानौ हौ कै जब बाद मै बानै बौ आसीस पानी चाँही तौ बौ बाके ताँई बेकार गिनी गई और बाके रो रो कै बिनती कन्नै के बाद बी बाकै मन फिरानै को मौको ना मिलो। 18 तुम तौ बा पहाड़ के धौंरे ना आए जिसकै छूँ सकै हैं। बौ पहाड़ आग को एक अंगारो हो और कारी घाटी और इन्धेरो और आँधी हो। 19 और तुरही की अबाज और बोलनै बारे की अबाज सुनी और बौ अबाज इत्ती भयानक ही कै, उन सुन्नै बारौ नै बिनती करी कै हमरे संग अब और बात ना कर। 20 कैसेकै बे बा हुकम कै सैहन ना कर सके कै, अगर एक जनाबर बी बा पहाड़ कै छूँले तौ बाके ऊपर पत्थर मारे जाँय। 21 बौ नजारो इत्तो डराबनो हो कै मूसा नै कैई कै, “मैं भौत डर गओ और थरथराल लगो।” 22 और तुम सिओन के पहाड़ के धौंरे और जिन्दे परमेसर के सैहर मै आए हौ जो सुरग को ऐरूसलेम है बाके धौंरे जानै कितने हजारौं सुरगदूत खुसी मनानै के ताँई इखट्टे होवै हैं। 23 जिनके नाम सुरग मै लिखे गए हैं उन परमेसर की पैली औलादौं की मंडली मै, सबके नियाय कन्नै बारे परमेसर के धौंरे और पक्के बनाए गए धरमी लोगौ की आत्माऔ के धौंरे आए हौ। 24 तुम ईसु के धौंरे जो नओ करारनामे को बिचौंदिया है और छिड़काब के खून के धौंरे आए हौ, जो हाबिल के खून सै बी अच्छे बचनौ कै बोलै है। 25 चौकस रौह और बा बोलनै बारे सै मौह ना फेरौ। अगर बे लोग बासै मौह फेरकै ना बच पाए जिसनै उनकै धरती मै चितौनी दई ही तौ अगर हम बासै मौह फेरैं जो सुरग सै चितौनी देरओ है, तौ हम डन्ड सै ना बच पांगे। 26 बा बखत मै तौ परमेसर नै अपनी अबाज सै धरती हला दई और अब बानै जौ बादो करो है कै, “एक दफै फिर मैं धरती कै ना पर आसमान कै बी हला दंगो।” 27 “एक दफै फिर” जा बात को मतलब जौ है कै जो बी चीज हलै हैं मतलब बनाई भई हैं बे नास हो जांगी, जिस्सै कै बेई चीज टिकी रैहंगी जो हल ना सकै हैं। 28 जो राज हमकै मिलो है बाकै हलाओ ना जा सकै है, इसताँई हमकै बा किरपा कै अपने हात सै ना जान देनो है जिसकी बजै सै हम भक्ति और डर के संग परमेसर की आराधना करैं जिस्सै बौ खुस होवै है। 29 कैसेकै हमरो परमेसर भसम कन्नै बारी आग है। |
New Life Compute Institute [NLCI] - CC BY-NC-ND 4.0