इबरानिओ 11 - बुक्साबिसवास की बड़ाई 1 बिसवास उन बातौं को पक्को भरोसो है, जिसकी हम आस करै हैं, और जिन चीजौ कै हमनै देखो ना है बाको सबूत है। 2 जाई बिसवास की बजै सै पुराने बड़े बुजरगौं कै परमेसर सै अच्छी गभाई मिली ही। 3 बिसवास सैई हम जौ जानै हैं कै परमेसर नै सिगरी दुनिया कै अपने मौह के बोल सैई बनाओ। इसताँई हमकै जौ पतो चलो है कै जो कुछ बी हम देखैं हैं बौ सिगरो किसी बी दिखाई दैनै बारी चीजौ सै ना बनार खाओ है। 4 बिसवास सैई हाबिल नै परमेसर के ताँई कैन सै बढ़िया चढ़ाबो चढ़ाओ, और बिसवास सैई परमेसर नै हाबिल कै धरमी ठैराओ। कैसेकै परमेसर नै बाके चढ़ाबे कै अपनाओ। हाबिल तौ मर गओ पर बाको बिसवास अब्बी बात करै है। 5 बिसवास सैई हनोक कै जिन्दो ऊपर उठा लओ गओ, जिस्सै कै बौ मरै ना और बाको पतो ना चलो कैसेकै परमेसर नै बाकै ऊपर उठा लओ हो। ऊपर उठानै सै पैले बाके बारे मै ऐंसो कैओ गओ हो कै, “बानै परमेसर कै खुस करो हो।” 6 बगैर बिसवास के परमेसर कै खुस कन्नो नामुमकिन है। कैसेकै जो परमेसर के धौंरे आवै है बाके ताँई जौ बिसवास कन्नो जरूरी है, कै परमेसर है और जो बाकै ढूंड़ै है उनकै बौ ईनाम देवै है। 7 बिसवास की बजै सैई परमेसर नै नूह कै जब उन बातौं की चितौनी दई जो नूह नै ना देखी ही, तब बानै बातौं कै मानकै अपने टब्बर कै बचानै के ताँई एक पानी को जिहाज बनाओ। बाके बिसवास के दुआरा बानै दुनिया कै दोसी ठैराओ और बा बिसवास सैई बौ धारमिकता को बारिस बनो। 8 बिसवास की बजै सैई जब परमेसर नै इब्राहिम कै बुलाओ तब बौ बाको हुकम मानकै बा जघै के ताँई लिकरो जिस जघै कै बिरासत मै दैनै को बादो परमेसर नै बासै करो हो। और बौ जौ बात ना जानै हो कै मैं कहाँ जा रओ हौं पर तब्बी बौ बहाँ गओ। 9 बिसवास की बजै सैई बौ बा बादे के देस मै परदेसी के हाँई तम्बू बनाकै रैहओ। और बैसेई इसहाक और याकूब बी रैहए, जो इब्राहिम के बाई बादे के हकदार हे जो परमेसर नै करो हो। 10 इब्राहिम पूरे भरोसे के संग बा सैहर को पैंड़ो देख रओ हो जिसकी नीह पक्की है, और बा सैहर कै रूप दैनै बारो और बनानै बारो परमेसर है। 11 बिसवास की बजै सैई इब्राहिम की बईयर सारा नै बाँज होते भए बी गरबबती होनै की सकति पाई, कैसेकै बानै बादे कन्नै बारे कै भरोसेमंद जानो हो। 12 इसई मरियल इब्राहिम सै आसमान के तारौं के हाँई और समन्दर के रेता के हाँई बंस पैदा भए। 13 जिन चीजौ को बादो करो गओ हो, बौ इन सबई लोगौ कै ना मिलो। पर उनौनै उनकै दूर सैई देखो और उनको सुआगत करो और जौ मान लओ कै हम जा धरती मै परदेसी और अनजाने हैं, जे सिगरे लोग बिसवास करते भए मर गए। 14 बे जौ कैह कै साप कर देवै हैं कै, हम परदेसी हैं, और बे एक ऐंसे देस कै ढूंड़ रए हैं जो उनको अपनो है। 15 अगर बे बा देस के बारे मै सोचै हैं जहाँ सै बे आए हैं, तौ उनको फिर सै बापस लौहटने को मौको हो। 16 पर जे लोग एक अच्छे देस मै जानै की सोचै हैं यानी सुरग मै। उनके बारे मै परमेसर जौ कैने मै ना सरमाबै है कै मैं उनको परमेसर हौं। कैसेकै बानै उनके ताँई एक सैहर बनाओ है। 17 बिसवास की बजै सैई जब परमेसर इब्राहिम कै परख रओ हो तौ बानै अपने लौंड़ा इसहाक कै बलि चढ़ानै के ताँई दे दओ और जिस इब्राहिम नै बादेऔ कै पाओ हो बौई अपने एकई लौंड़ा की बलि चढ़ानै के ताँई तईयार हो। 18 और बा लौंड़ा के बारे मै परमेसर नै इब्राहिम सै बादो करो हो कै, “इसहाक को खानदानई तेरोई खानदान कैलागो।” 19 इब्राहिम नै जौ मान लओ हो कै परमेसर मरे भए लोगौ कै फिर सै जिन्दो कर सकै है। एक हिसाब सै देखो जाऐ तौ, इब्राहिम नै इसहाक कै मरे भएऔं मै सै जिन्दो पाओ। 20 बिसवास की बजै सैई इसहाक नै अपने लौंड़ा याकूब और ऐसाब कै आनै बारी बातौं के बारे मै आसीरबाद दओ। 21 बिसवास की बजै सैई याकूब नै मरते बखत यूसप के दौनौ लौंड़ौ कै आसीरबाद दओ और अपनी लठिया के सहारे टिक कै परमेसर कै डन्डौत करो। 22 यूसप जब मरनै बारो हो तौ बिसवास सैई बानै ईसराइली लोगौ कै मिसर सै लिकरनै के बारे मै कैई और अपनी असतिऔ के बारे मै हुकम दओ। 23 बिसवास सैई मूसा के अईया-अब्बा नै बाके पैदा होनै के बाद तीन महीना लुकाकै रक्खो और बे राजा के हुकम सै बी डरे ना। कैसेकै बौ लौंड़ा देखनै मै भारचो हो। 24 बिसवास सैई मूसा नै बड़े होनै के बाद खुद कै फिरौन की लौंड़िया को लौंड़ा कैलानै सै मनैह करी। 25 इसताँई बानै पाप मै थोड़े दिन सुख मै रैहनै सै परमेसर के लोगौ के संग दुख झेलनो सई समजो। 26 और मिसर के धन-दौलत सै जादा बानै मसी के ताँई दुख झेलनो कीमती समजो कैसेकै बाकी नजर ईनाम पानै को पैंड़ो देख रई हीं। 27 बिसवास की बजै सैई मूसा मिसर देस छोड़कै चलो गओ और बानै राजा के घुस्सा की परवा ना करी बलकन बौ अग्गे बढ़तो गओ, मानौ जैसे कै बौ परमेसर कै देख रओ होए, जो अनदेखो है। 28 और बिसवास की बजै सैई बानै फसै को तौहार और खून छिड़कनै को नियम मानो, जिसके ताँई पैली औलादौं को नास कन्नै बारो दूत ईसराइली लोगौ मै हात ना डारै। 29 बिसवास की बजै सैई उन ईसराइली लोगौ नै लाल समन्दर कै ऐंसे पार करो जैसे सूकी धरती होए, पर जब मिसर के लोग बैसोई करल लगे तौ बे तबई डूबकै मर गए। 30 और बिसवास की बजै सैई यरीहो सैहर की दिबाल गिर गई जब ईसराइली लोगौ नै सात दिन तक बाको चक्कर लगाओ। 31 और बिसवास की बजै सैई रहाब नाम की रन्डी आगियाँ ना माननै बारे लोगौ के संग नास ना भई कैसेकै बानै उन जासूसौ को खुसी सै सुआगत करो। 32 इस्सै जादा अब मैं और का कैंऔ? कैसेकै अब बखत ना रैहओ कै मैं गिदौन, बाराक, सिमसौन, इफता, दाऊद, सामुएल और परमेसर के नबिऔ के बारे मै कैंऔ। 33 बिसवास के बजै सैई उन लोगौ नै देसौ कै हराओ और धरम के काम करे और परमेसर के बादेऔ कै पाओ, बब्बर सेरौ को मौह बन्द करो। 34 और आग की लपटौं कै सान्त करो और तरवार की धार सै बच लिकरे, कमजोर होते भए बी सकतिसाली बने और लड़ाई मै सकतिसाली बने और बिदेसिऔ की फौजौं कै भजा दओ। 35 बईयरौं नै अपने मरे भए लोगौ कै फिर सै जिन्दो पाओ, भौस्से लोग सताए गए, और आजाद होनो ना चाँहो। कैसेकै बे मर कै फिर सै जिन्दे होनै के बाद एक अच्छी जिन्दगी की आस रक्खै हे। 36 कुछ लोगौ की मजाक बनी और कुछ लोगौ कै कोड़ा मारे और किसी कै साँकरौ सै बांधकै जेल मै डार दओ। 37 और उनकै पत्थर मारे और आरे सै चीर कै दो टुकड़ा कर दए और उनकै तरवार सै मार गिराओ, बे भेड़ौ और बकरिऔं की खाल ओढ़ कै इतै-उतै भटकते फिरे और उनकै सता कै उनके संग बुरो बरताब करो गओ। 38 बे जंगलौ और पहाड़ौ और गुफाऔ मै और धरती के गड्ढौ मै लुके। बे दुनिया कै लायक ना समजै हे। 39 बिसवास की बजै सैई इन सबई के बारे मै अच्छी गभाई पाई पर तब्बी उनकै बे चीज ना मिलीं जिनको बादो परमेसर नै करर खाओ हो। 40 कैसेकै परमेसर नै पैलेई हमरे ताँई एक खास बात ठैरार खाई ही। बौ चाँहै हो कै बे हमरे संग पक्के हौं। |
New Life Compute Institute [NLCI] - CC BY-NC-ND 4.0