इबरानिओ 10 - बुक्साएकई दफै सबई के ताँई मसी को बलिदान 1 नियम तौ सिरप आनै बारी अच्छी चीजौ की छाँई है, पर जौ असली ना है। इसताँई हर साल बेरमबेरा बैसेई बलिऔ कै चढ़ानै के दुआरा नियम के धौंरे आनै बारे लोगौ कै सिद्द ना कर सकै है। 2 अगर ऐंसो होतो तौ का उनको बलि चढ़ानो बन्द ना हो जातो? और बलि चढ़ानै बारे एकई दफै मै हमेसा-हमेसा के ताँई पबित्तर हो जाते। और उनको मन अपने आपकै पापी ना ठैराबै है। 3 बे बलि तौ हर साल उनके पापौं कै याद करबाबै हैं। 4 कैसेकै बकरौ और बैलौ को खून कबी बी पाप कै दूर ना कर सकै है। 5 इसताँई जब ईसु दुनिया मै आओ तौ तबई बानै जौ कैई कै, “तैनै बलि और चढ़ाबो ना चाँहो। पर मेरे ताँई एक सरीर तईयार करो। 6 तू हबन बलिऔ, और पाप बलिऔ सै खुस ना भओ।” 7 तबई मैंनै कैई कै, “परमेसर, देख मैं आ गओ हौं कै तेरी इच्छा पूरी करौं और जैसो पबित्तर सास्तर मै मेरे बारे मै लिखो है।” 8 बानै पैले कैई ही कै, “बलि, चढ़ाबे, हबन बलिऔ और पाप बलिऔ कै बौ ना चाँहबै और ना उनसै खुस होवै है,” पर नियम के हिसाब सै जौ सब करो जावै है। 9 बानै जौ बी कैई ही कै, “देख मैं तेरी इच्छा कै पूरी कन्नै आओ हौं।” और तबई बानै दूसरे करारनामे कै लागू कन्नै के ताँई पैले करारनामे कै खतम कर दओ। 10 कैसेकै ईसु मसी को सरीर एकई दफै हमेसा के ताँई बलि चढ़ा दओ और जाई बलि के दुआरा हम पबित्तर करे गए हैं। 11 हर एक पुजारी रोज खड़े होकै सेवा करै है और उनई बलिऔ कै बेरमबेरा चढ़ाबै है जो पाप कै कबी मिटा ना सकै है। 12 पर मसी एकई दफै हमेसा के ताँई पापौं के ताँई बलि चढ़कै इज्जत के संग परमेसर के खाने हात बैठ गओ। 13 और बाई बखत सै बौ पैंड़ो देख रओ है कै बाके दुसमन पाँऐऔं के नीचे की पटली के हाँई हो जांऐ। 14 कैसेकै बानै एकई बलि के दुआरा उनकै जो पबित्तर करे जावै हैं हमेसा के ताँई पक्को कर दओ। 15 और पबित्तर आत्मा बी हमकै गभाई देवै है। कैसेकै बानै जौ कैई है कै, 16 “परभु जौ कैबै है कै, उन दिनौ के बाद जो बादो मैं उनके संग करंगो बौ जौ है कै, मैं अपने नियमौ कै उनके मन मै बसांगो और उनके दिल मै लिखंगो।” 17 बौ अग्गे कैबै है कै, मैं उनके पापौं और उनके अपरादौं कै फिर याद ना करंगो। 18 जब इनौके पाप माफ हो गए तौ फिर पाप के ताँई किसी बलि की जरूरत ना है। हिम्मत के संग परमेसर के धौंरे आऔ 19 इसताँई मेरे पियारे बिसवासी लोगौ, हमकै पबित्तर जघै मै जानै के ताँई ईसु को खून हिम्मत देवै है। 20 ईसु नै परदा के दुआरा मतलब अपने सरीर के दुआरा हमरे ताँई एक नओ और जिन्दो रस्ता खोल दओ है। 21 कैसेकै हमरे धौंरे एक ऐंसो बड़ो पुजारी है जो परमेसर के घर को अधकारी है। 22 तौ आऔ, बिसवास के पूरे भरोसे के संग और अपने दिल कै बुरे मन सै सुद्द करकै और अपने सरीर कै साप जल सै धोकै सच्चे दिल सै परमेसर के धौंरे जांऐ। 23 हम बगैर सक के अपनी बा आस मै पक्के बने रैंह जिसकै हमनै मानो है, कैसेकै जिसनै हम सै बादो करो है बौ भरोसेमंद है। 24 आऔ हम सोचैं कै पियार और अच्छे काम कन्नै के ताँई एक दूसरे को हौसला कैसे बढ़ाऐ। 25 और एक दूसरे सै मिलनो ना छोड़िओ जैसो कै भौस्से लोग करै हैं और जैसो तुम जानौ हौ कै मसी के आनै को दिन धौंरेई है। तौ तुम एक दूसरे को हौसला बढ़ाते रैहऔ। मसी सै मौह ना मोड़िओ 26 हमकै सच्चाई को पतो होते भए बी अगर जब्बी हम जानपूँछ कै पाप करै हैं तौ फिर पाप के ताँई कोई बी बलि बची ना है। 27 पर उन लोगौ के ताँई भयानक सजा और खतरनाक आग पैंड़ो देख रई है जो परमेसर के दुसमन कै भसम कर देगी। 28 जो कोई मूसा के नियम कै तोड़ै हो बाकै बगैर दया के दो या तीन लोगौ की गभाई के हिसाब सै मौत की सजा दई जावै ही। 29 तौ तुम जौ सोचौ कै बा आदमी कै कितनी बड़ी सजा मिलैगी जिसनै परमेसर के लौंड़ा कै पाँऐ सै किचलो और जिस खून नै परमेसर के संग एक करारनामो करबाओ और उनकै पबित्तर बनाओ और बा खून कैई अपबित्तर ठैराओ और जो किरपा की आत्मा है बाकी बेजती करी। 30 कैसेकै हम बाकै जानै हैं जिसनै जौ कैई है कै, “बदलो लैनै को काम मेरो है, मैंई बदलो लंगो।” और बानै जौ बी कैई कै, “परभु अपने लोगौ को नियाय करैगो।” 31 जिन्दे परमेसर के हात मै पड़नो कितनी खतरनाक बात है। बिसवास बनाए रक्खौ 32 अपने बे पुराने दिन याद करौ जब तुमरे ऊपर परमेसर को उज्जेरो चमको हो तब दुख और परेसानिऔ कै सैहते भए कैसे तुम टिके रैहए। 33 कबी सबई लोगौ के सामने तुमरी बेजती करी गई और सताओ गओ और तुमनै उन लोगौ को सात दओ जिनके संग ऐंसो बरताब करो जा रओ हो। 34 जो जेल मै कैद हे तुमनै उनके ऊपर तरस खाओ और जब तुमरी धन-दौलत लुटल लगी तब्बी तुमनै खुसी सै लुटन दई कैसेकै तुम जौ जानै हे कै तुमरे धौंरे इस्सै बी अच्छो और हमेसा टिके रैहनै बारी धन-दौलत है। 35 इसताँई हिम्मत ना हारौ कैसेकै बाको फल बड़ो है। 36 तुमकै सबर रखनै की जरूरत है जिस्सै कै तुम परमेसर की इच्छा कै पूरो कर सकौ और बा बादे कै तुम पा सकौ जो परमेसर नै करर खाओ है। 37 कैसेकै “थोड़ोई बखत रैह गओ है जो आनै बारो है बौ आगो और बौ अबेर ना करैगो। 38 मेरे धरमी लोग बिसवास सै जिन्दे रैहंगे, पर अगर बे पिच्छे हट जांऐ, तौ मैं उनसै खुस ना हौंगो।” 39 हम पिच्छे हटनै बारे ना हैं कै नास हो जांऐ, पर हम बिसवास कन्नै बारे हैं कै जान बचाऐ। |
New Life Compute Institute [NLCI] - CC BY-NC-ND 4.0