इबरानिओ 1 - बुक्सा

परमेसर के लौंड़ा को सौभाब

¹ पुराने जमाने मै परमेसर नै नबिऔ के दुआरा हमरे बापदादौं के संग बेरमबेर और अगल अगल तरीका सै बात करीं।

² पर अब इन आखरी दिनौ मै बानै अपने लौंड़ा के दुआरा हम सै बात करीं जिसकै परमेसर नै सिगरी चीजौ को हकदार ठैरार खाओ है और बाईके दुआरा बानै सिगरी दुनिया बनाई।

³ बौ परमेसर की बड़ाई की चमक है और बाको पूरो सौभाब बाईके हाँई है और बौ अपने बचन की सकति सै सिगरी चीजौ कै सई सै समारै है और बौ पापौं कै धोकै सुरग मै महान परमेसर के खाने हात बैठ गओ है।

⁴ और परमेसर को लौंड़ा सुरगदूतौं सै बेसानी बड़ो ठैरो और बाकै ऐंसो नाम दओ जो सुरगदूतौं के नाम सै बेसानी बड़ो है।

लौंड़ा सुरगदूतौं सै बड़ो है

⁵ कैसेकै परमेसर नै सुरगदूतौं सै कबी ना कैई कै, “तू मेरो लौंड़ा है और आज सै तेरो अब्बा मैं हौं,” और जौ बी कै, “मैं तेरो अब्बा हौंगो और तू मेरो लौंड़ा होगो।”

⁶ और जब परमेसर अपने बड़े लौंड़ा कै दुनिया मै भेजै है तौ बौ कैबै है कै, “मेरे सिगरे सुरगदूत बाकी बड़ाई करैं।”

⁷ और सुरगदूत के बारे मै परमेसर जौ कैबै है कै, “मैं अपने सुरगदूतौं कै हवा के हाँई, और अपने सेवकौ कै आग की लपट के हाँई बनाबौं हौं।”

⁸ पर लौंड़ा के बारे मै बौ जौ कैबै है कै, “हे परमेसर, तेरो सिंगासन युगौं-युगौं को है और तू अपने राज मै नियाय के संग राज करैगो।

⁹ तैनै नेक कामौ सै पियार और बुरे कामौ सै दुसमनी रक्‍खी है। इस बजै सै परमेसर, तेरे परमेसर नै तेकै चुनो और तेरे सातिऔं सै जादा तेकै आदर दओ जिस्सै कै तू खुसी मनाऐ।”

¹⁰ परमेसर जौ बी कैबै है कै, “हे परभु, सुरू मै जब दुनिया बनाई जा रई ही तौ तैनैई धरती की नीह धरी और आसमान मै जो कुछ है बौ सबई तेरी हात की कलाकारी है।

¹¹ बे तौ नास हो जांगे पर तू हमेसा रैहगो, और जे लत्‍ता के हाँई पुराने हो जांगे।

¹² तबई तू उनकै चद्‍दर के हाँई लपेटैगो और तबई बे लत्‍ता के हाँई बदल जांगे, पर तू हमेसा एक जैसो है और तेरी जिन्‍दगी कबी खतम ना होगी।”

¹³ परमेसर नै सुरगदूतौं सै कबी ऐंसे ना कैई कै, “जब तक कै मैं तेरे दुसमनौ कै तेरे पाँऐ के नीचे ना झुका दौं, तब तक तू मेरे खाने हात बैठ।”

¹⁴ का जे सिगरे सुरगदूत परमेसर की सेवा कन्‍नै बारी आत्‍मा ना हैं? परमेसर इनकै मुक्‍ति पानै बारे लोगौ की सेवा कन्‍नै के ताँई भेजै है।