गलातिऔ 6 - बुक्सा

सबई के संग भलाई करौ

¹ पियारे भईयौ, अगर तुम्मै सै कोई आदमी गलत काम करतो भओ पकड़ो जाय तौ तुम्मै सै जो आत्‍मिक होए बौ बाकै पियार सै समजाऐ, और तुम खुद बी चौकस रौह कै तुम बी किसी लालच मै ना पड़ौ।

² एक दूसरे को बोज उठाऔ और ऐंसे तुम मसी के नियमौ कै पूरो करौ हौ।

³ कैसेकै अगर कोई आदमी खुद कै बड़ो समजै है और बौ बड़ो ना है, तौ बौ खुद कै धोको देरओ है।

⁴ पर सिगरे आदमी जो काम बे करै हैं बाकी जाँच खुद करैं, अगर सिगरे काम अच्‍छे हैं तौ बाकै अपने ऊपर घमंड कन्‍नै को मौको मिलैगो, तब तेकै दूसरौं की बराबरी कन्‍नै की जरूरत ना है।

⁵ कैसेकै सिगरे आदमिऔ कै अपनोई बोज खुदई उठानो पड़ैगो।

⁶ जो तुमकै बचन की सिक्‍छा देवै है, बाके संग तुमकै अपनी जिन्‍दगी की अच्‍छी चीजौ कै बाँटनो चँईऐ।

⁷ धोको ना खाऔ, कैसेकै परमेसर कै कोई बी बेबकूफ ना बना सकै है, जो जैसो बोगो, बौ बैसोई काटैगो बी।

⁸ कैसेकै जो कोई अपने सरीर के ताँई बोबै है, बौ अपने सरीर सै नास की फसल काटैगो। पर जो आत्‍मा के ताँई बोबै है, बौ आत्‍मा सै हमेसा की जिन्‍दगी की फसल काटैगो।

⁹ इसताँई आऔ हम भलाई कन्‍नै मै कबी ना थकैं, कैसेकै अगर हम भलाई करते रैहंगे तौ सई बखत मै हमकै बाको फल मिलैगो।

¹⁰ इसताँई जो बी हमकै मौको मिलै है, तौ हमकै सबई के संग भलाई कन्‍नी चँईऐ, खास करकै बिसवासी लोगौ के संग।

आखरी चितौनी

¹¹ देखौ, मैंनै अपने हात सै तुमकै कितने बड़े-बड़े अक्छरौं मै लिखर खाओ है।

¹² जो लोग तुमरो खतना कन्‍नै के ताँई दबाब डारै हैं बे लोगौ की नजरौ मै खुद कै बड़ो दिखानो चाँहै हैं, बे जौ इसताँई करै हैं कै उनकै मसी के कुरूस की बजै सै दुख झेलनो ना पड़ै।

¹³ कैसेकै जिन लोगौ नै खतना कर खाओ है, बे खुदई नियम मै ना चलै हैं, पर बे तुमरो खतना इसताँई कन्‍नो चाँहै हैं कै बे तुमरे जा काम के दुआरा घमंड कर सकैं।

¹⁴ पर हमरे परभु ईसु मसी के कुरूस के अलाबा मैं किसी और के ऊपर घमंड कन्‍नो ना चाँहौ हौं। जिसकी बजै सै मैं दुनिया के ताँई और दुनिया मेरे ताँई मर गई।

¹⁵ कैसेकै ना तौ खतना को कुछ मतलब है और ना बगैर खतना को, और मतलब है तौ बौ जा बात को कै का हम नई रचना बने हैं या ना।

¹⁶ और जो लोग जा नियम कै मानै हैं उनके ऊपर और परमेसर के ईसराइली लोगौ के ऊपर सान्‍ति और दया होती रैह। ऐंसोई होए।

¹⁷ मैं बिनती करौ हौं कै अब मैंकै और कोई दुख ना दे। कैसेकै ईसु मसी के घाब के निसान मेरे सरीर के ऊपर हैं।

¹⁸ ओ भईयौ और बहनौ, हमरे परभु ईसु मसी की किरपा तुमरी आत्‍मा के संग बनी रैह। ऐंसोई होए।