इफिसिऔ 3 - बुक्सागैर यहूदी लोगौ मै पौलुस को परचार 1 इसताँई मैं पौलुस, मसी ईसु के सेवा कन्नै की बजै सै कैदी बनो जिस्सै कै तुम गैर यहूदी लोगौ की भलाई होए। 2 तुम लोगौ नै परमेसर की बा किरपा के बारे मै जरूर सुनो होगो जिसकै बानै तुम लोगौ के भलाई के ताँई मैंकै सौंपो है। 3 और बानै बौ भेद की बात मेरे ऊपर परकट करी जिसके बारे मै मैं पैले थोड़ो सो लिख चुको हौं। 4 और बाकै पढ़कै तुम लोग जान सकौ हौ कै, मैं मसी की भेद की बात कै कहाँ तक समजौ हौं। 5 जौ भेद की बात तैनै पैले की पीढ़ी के लोगौ के ऊपर परकट ना करी ही, पर अब जो बाके आत्मा के दुआरा पबित्तर भेजे भए चेलौ और नबिऔ कै परकट करी है। 6 बौ भेद की बात जौ है कै ईसु मसी मै अच्छी खबर के दुआरा यहूदी लोगौ के संग गैर यहूदी लोग बी बारिस बने और एकई सरीर के अंग बने और बादे मै बी बे सामिल हैं। 7 परमेसर नै अपनी सकति के काम के दुआरा मैंकै जौ किरपा को बरदान दओ कै मैं बा अच्छी खबर कै परचार कन्नै बारो सेवक बनो। 8 मैं परमेसर के सबई पबित्तर लोगौ मै छोटे सै बी छोटो हौं, तब्बी मैंकै जौ बरदान मिलो कै मैं गैर यहूदी लोगौ कै कबी खतम ना होनै बारे मसी की बरकत की अच्छी खबर सुनाऔ। 9 और मैं सबई लोगौ कै उन भेद की बातौं कै परकट करौं, जो बा सबई कुछ बनानै बारे परमेसर नै युगौं-युगौं सै लुकार खाई हैं। 10 जिस्सै कै अब बिसवासिऔ की मंडली के दुआरा परमेसर को गियान, ऊपर के दुनिया के अधकारिऔं और ऊपर के दुनिया के राज कन्नै बारौ के ऊपर परकट हो सकै। 11 परमेसर नै अपने मन मै जौ मकसद हमेसा सै रखर खाओ हो, बौ बानै हमरे परभु ईसु मसी के दुआरा पूरो करो। 12 मसी मै और उसके ऊपर बिसवास कन्नै के दुआरा, हम पूरे भरोसे के संग परमेसर के धौंरे जानै के ताँई पूरी हिम्मत रक्खै हैं। 13 इसताँई मैं तुमसै जौ बिनती करौ हौं कै जो कसट मैं तुमरे ताँई झेल रओ हौं बा बजै सै तुम हिम्मत ना हारिओ, कैसेकै इन मैई तुमरी बड़ाई है। मसी को पियार 14-15 इसताँई मैं बा अब्बा के सामने, जिस्सै सुरग और धरती मै को हर एक टब्बर अपनो अपनो नाम पावै है, घूंटे टेक्कै पिराथना करौ हौं कै, 16 बौ अपने महिमा के धन सै अपनी आत्मा के दुआरा तुमरे भीतर की आत्मा कै मजबूत कन्नै के ताँई अपनी सकति दे। 17 और बिसवास के दुआरा तुमरे दिल मै मसी बसै और तुमरी जड़ और नीह पियार मै टिकी हौं। 18 जिस्सै कै तुम लोग परमेसर के पबित्तर लोगौ के संग मसी के पियार की लम्बाई, चौंड़ाई, ऊँचाई और गैहराई जान सकौ। 19 और तुम मसी के बा पियार कै बी समज सकौगे जो हमरे गियान सै परे है, तब तुम परमेसर के पूरे सौभाब सै पूरी तरै भर जाऔगे। 20 अब परमेसर अपनी बा सकति के दुआरा जो हमरे भीतर काम करै है, जित्तो हम माँग सकै हैं, या जहाँ तक हम सोच सकै हैं, बासै बी भौत जादा बौ कर सकै है। 21 बाकी महिमा बिसवासिऔ की मंडली मै और मसी ईसु मै सिगरी पीढ़ी सै पीढ़ी तक युगौं-युगौं तक होती रैह। ऐंसोई होए। |
New Life Compute Institute [NLCI] - CC BY-NC-ND 4.0