कुलुसिऔं 1 - बुक्सा1 जौ चिट्ठी पौलुस की ओर सै जो परमेसर की मरजी सै ईसु मसी को भेजो भओ चेला है, और हमरे भईया तीमुथियुस की ओर सै, 2 मसी मै उन पबित्तर और बिसवासी लोगौ के ताँई जो कुलुसी सैहर मै रैहबै हैं। हमरे पिता परमेसर की ओर सै तुमकै किरपा और सान्ति मिलै। धन्नबाद और पिराथना 3 जब्बी हम तुमरे ताँई पिराथना करै हैं, तौ हमेसा परभु ईसु मसी के पिता परमेसर को धन्नबाद करै हैं। 4 कैसेकै हमनै जौ बात सुनी है कै तुम ईसु मसी मै बिसवास करौ हौ और सबई पबित्तर लोगौ सै पियार रक्खौ हौ। 5 कैसेकै जो आस तुमकै है, बौ सुरग मै तुमरे ताँई रक्खी पड़ी है। तुमनै जा आस के बारे मै तब सुनो जब सच्च की अच्छी खबर तुमरे धौंरे पौंची। 6 जैसी अच्छी खबर तुमरे धौंरे आई बैसीई सिगरी दुनिया मै आई। बौ अच्छी खबर सैरी दुनिया मै फल रई है और बढ़ रई है बैसेई जिस दिन सै तुमनै अच्छी खबर सुनी और सच्चाई सै परमेसर की किरपा कै जान लओ बा दिन सै अच्छी खबर तुमरे भीतर फल रई है और बढ़ रई है। 7 और हमरे संग काम कन्नै बारो पियारो भईया इपफरास जो हमरी ओर सै मसी को बिसवासी सेवक है, और तुमकै बाई सै जा अच्छी खबर को गियान मिलो है। 8 बाई नै हमकै बताओ कै पबित्तर आत्मा नै तुम लोगौ मै कितनो पियार जगाओ है। 9 और जिस दिन सै हमनै जौ बात सुनी है, तब सै रोज हम तुमरे ताँई पिराथना और बिनती करै हैं कै, परमेसर तुमकै आत्मा के दुआरा सिगरी समज और बुद्धि दे, जिस्सै कै तुम बाकी इच्छा कै पूरे तरीका सै जान सकौ। 10 ताकि तुमरो चाल-चलन बैसोई होए जैसो परभु कै परसन्द है, जिस्सै बौ खुस होए और तुम्मै हर तरै के भले काम के फल लगैं और परमेसर के गियान मै मजबूत होते जाऔ। 11 तुम परमेसर की महिमा की सकति के हिसाब सै हर तरै की सकति सै मजबूत होते जाऔ, जिस्सै कै तुम सब तरै के सबर कै दिखा सकौ और सैह सकौ। 12 और अब्बा को धन्नबाद करते रौह, जिसनै हमकै जा लायक बनाओ कै हम उज्जेरे के राज मै रैहनै बारे पबित्तर लोगौ के संग हिस्सेदार बनै। 13 परमेसर हमकै इन्धेरे के राज सै लिकारकै अपने पियारे लौंड़ा के राज मै लेकै आओ है। 14 और बाके लौंड़ा के दुआरा हमकै मुक्ति मिली है, मतलब पापौं सै माफी मिली है। मसी की महानता 15 बौ दिखाई ना दैनै बारे परमेसर को दिखाई दैनै बारो रूप है, और जो कुछ बी परमेसर नै बनाओ है बाके ऊपर बाको हक है। 16 कैसेकै सबई कुछ बाके दुआरा बनो है, चाँहे सुरग की चीज हौं, चाँहे धरती की चीज हौं, और चाँहे देखी हौं या ना देखी हौं बे बी, और का सिंगासन, का सासन कन्नै की तागत, का राज, का अधकारी सिगरी चीज बाके दुआरा और बाके ताँई बनाई गंई। 17 और बौई सिगरी चीजौ सै पैले है, और सिगरी चीज बाई की सकति सै टिकी रैहबै हैं। 18 बिसवासिऔ की मंडली मसी को सरीर है और मसी बिसवासिऔ की मंडली की खोपड़ी है। बौई सबसै पैलेसैई है और मरे भएऔं मै सै फिर सै जिन्दो होनै बारो बौ पैलो है, जिस्सै कै सिगरी बातौं मै बौई सबसै बड़ो होगो। 19 कैसेकै परमेसर की खुसी जाई मै है कै मसी मै बौ खुद पूरी तरै सै बसै। 20 और बाईके दुआरा परमेसर सिगरी चीजौ को मेल-मिलाब अपने संग रखनो चाँहै है, चाँहे बौ धरती की, चाँहे बौ सुरग की हौं; और बाईके खून के दुआरा जो कुरूस मै बहाओ हो, परमेसर नै मिलाब करबाओ। 21 एक बखत ऐंसो हो कै तुमरी बुरी सोच और बुरे कामौ की बजै सै तुम परमेसर सै दूर और बाके बिरोदी हे। 22 पर अब परमेसर नै अपने लौंड़ा की मौत के दुआरा हमरो मेल अपने संग करो है, जिस्सै बौ तुमकै पबित्तर, बिना कलंक बारो और निरदोस बनाकै अपने सामने खड़ो करै, 23 जौ जबई हो सकै है जब तुम बिसवास मै पक्के और मजबूत रौह और जो अच्छी खबर तुमनै सुनी है बाकी आस ना छोड़ौ, जिसको परचार सिगरी दुनिया मै करो गओ और जिसको मैं पौलुस सेवक बी हौं। बिसवासिऔ के ताँई पौलुस की मैहनत 24 इस बखत तुमरे ताँई मैं जो बी मुसीबत उठा रओ हौं, बाके बजै सै मैं खुस हौं। मसी को सरीर मतलब बिसवासिऔ की मंडली के ताँई मसी के दुख उठानै की जो बी कसर मेरी रैह गई है, बौ मैं अपने सरीर मै लेकै पूरी करौ हौं। 25 परमेसर तुमरे फाएदा के ताँई जो बी हुकम मैंकै देवै है, बाके बजै सै मैं बिसवासी लोगौ के बीच एक सेवक बनो हौं, जिस्सै कै मैं परमेसर के बचन को पूरो पूरो परचार करौं, 26 मतलब बौ राज की बात सुनौ, जो कई युगौं सै और कई पीढ़िऔं सै गुप्त रैहई, पर अब बौ पबित्तर लोगौ के ताँई परकट भओ है। 27 परमेसर उनकै दिखानो चाँहै है कै गैर यहूदी लोगौ मै महिमा की गुप्त बात का है? और बौ जौ है कै, मसी जो महिमा की आस है बौ तुमरे भीतर रैहबै है। 28 हमकै जो गियान मिलो पड़ो है बाको परचार करते भए हम हर एक आदमी कै चौकस करै हैं, और गियान की बात सिकाबै हैं जिस्सै कै हम हर एक आदमी कै मसी मै मजबूत करकै परमेसर के सामने खड़ो कर सकैं। 29 इस मकसद कै पूरो कन्नै के ताँई मैं बाकी पूरी सकति के दुआरा जो मेरे भीतर मजबूती सै काम करै है, पूरे दिल सै कोसिस करकै बेसानी मैहनत करौ हौं। |
New Life Compute Institute [NLCI] - CC BY-NC-ND 4.0