चेलौ के काम 23 - बुक्सा1 बड़ी सभा के लोगौ की ओर देखते भए पौलुस नै कैई कै, “हे मेरे भईयौ, मैंनै आज तक परमेसर के ताँई सच्चे मन सै जिन्दगी जीई है।” 2 तबई बड़े पुजारी हननियाह नै उन लोगौ कै जो पौलुस के धौंरे खड़े हे पौलुस के मौह मै चाँट मारनै के ताँई हुकम दओ। 3 तबई पौलुस नै बासै कैई कै, “तू चूना सै पुति भई सपेद दिबाल है, परमेसर तेकै मारैगो। तू नियम के हिसाब सै मेरो नियाय कन्नै के ताँई बैठो है, पर तू नियम के बिरोद मै मैंकै चाँट मारनै को हुकम देरओ है।” 4 पर जो लोग धौंरे खड़े हे, उनौनै कैई कै, “परमेसर के बड़े पुजारी कै बुरो कैनै की तेरी हिम्मत कैसे भई?” 5 पौलुस नै कैई कै, “हे भईयौ, मैंकै जौ पतो ना हो कै जौ बड़ो पुजारी है। कैसेकै पबित्तर सास्तर मै ऐंसो लिखो है कै, ‘अपने लोगौ के मुखिया कै बुरो ना कैऔ।’ ” 6 जब पौलुस कै जौ पतो लगो कै बड़ी सभा मै आधे फरीसी और आधे सदूकी लोग हैं, तबई बौ जोर सै बोलल लगो कै, “हे भईयौ, मैं फरीसी और फरीसिऔं के बंस को हौं। मेरे ऊपर इसताँई मुकदमा चल रओ है कै मैं जौ बिसवास करौ हौं कै आदमी मरनै के बाद फिर सै जिन्दो होवै है।” 7 जब बानै जौ बात कैई तौ फरीसी और सदूकी लोगौ मै लड़ाई होल लगी और सभा मै फूट पड़ गई। 8 कैसेकै सदूकी जौ मानै हे कै, मरनै के बाद लोग फिर सै जिन्दे ना होवै हैं और ना सुरगदूत और ना आत्मा होवै हैं, पर फरीसी लोग जा बात कै मानै हे। 9 तबई बेसानी हल्ला मच गओ और फरीसी मैसै कुछ सास्तरी लोग खड़े भए और जौ बात कै लेकै लड़ल लगे कै, “हम जा आदमी मै कुछ बुराई ना देखै हैं, अगर कोई आत्मा या सुरगदूत जाके संग बात करै है तौ का भओ?” 10 जब लड़ाई भौत जादा होल लगी तौ सैनापति डर गओ कै कहीं जे लोग पौलुस के टुकड़ा-टुकड़ा ना कर दैं। तबई बानै सिपाईऔं कै हुकम दओ कै बे भीड़ मै जाकै पौलुस कै उनके बीच मैसै लिकारकै छाबनी मै ले जाऐ। 11 बाई रात परभु बाके सामने आओ और कैई कै, “हिम्मत रख, कैसेकै जैसी तैनै ऐरूसलेम मै मेरी गभाई दई है, बैसेई रोम मै बी मेरी गभाई देनी है।” पौलुस कै मारनै की सला 12 जब सकारो भओ तौ कुछ यहूदी लोगौ नै सला करी और कसम खाई कै, “जब तक हम पौलुस कै ना मारंगे तब तक हम कुछ बी ना खांगे ना पींगे।” 13 सला कन्नै बारे लोग चालीस सै बी जादा हे। 14 बे मुक्ख पुजारिऔं और मुखियौं के धौंरे जाकै कैललगे कै, “हमनै कसम खाई है कै जब तक हम पौलुस कै मारंगे ना तब तक ना खांगे ना पींगे। 15 इसताँई अब तुम यहूदी सभा और सैनापति कै कैऔ कै, ‘सई तरीका सै जाँच पड़ताल कन्नै के ताँई पौलुस कै हमरे धौंरे लिआऐ,’ हम बाकै बहाँ पौंचनै सै पैले मार दंगे।” 16 पर जब पौलुस की बहन के लौंड़ा कै जा बात को पतो चलो तबई बौ छाबनी मै जाकै पौलुस कै जौ बात बताई। 17 तबई पौलुस नै किसी एक सूबेदार कै बुलाकै बासै कैई कै, “जा लौंड़ा कै सैनापति के धौंरे ले जा और जौ बासै कुछ कैनो चाँहै है।” 18 इसताँई बानै बाकै सैनापति के धौंरे ले जाकै कैई, “कैदी पौलुस नै मैंकै तेरे धौंरे भेजो है और जौ लौंड़ा कै तेरे धौंरे पौंचानै के ताँई बिनती करी, कैसेकै जौ तेसै कुछ कैनो चाँहै है।” 19 सैनापति नै बा लौंड़ा को हात पकड़ो और इकले मै ले जाकै बासै पूँछी, “बोल तू मैंसै का कैनो चाँहै है?” 20 बा लौंड़ा नै कैई कै, “यहूदी लोगौ नै सला बनाई है कै बे तेसै जौ बिनती करंगे कै तू पौलुस के बारे मै और अच्छे सै जाँच कन्नै के ताँई बाकै बड़ी सभा मै लेकै आय। 21 पर तू उनकी बात ना मानीए, कैसेकै उनमै सै चालीस सै बी जादा लोगौ नै जौ कसम खाई है कै, ‘जब तक हम पौलुस कै ना मारंगे तब तक लै ना खांगे, ना पींगे।’ बे अब तईयार हैं बस तेरे हुकम के ताँई रुके पड़े हैं।” 22 तबई सैनापति नै बा लौंड़ा सै जौ कैह कै बाकै भेज दओ कै, “किसी सै ना कैईए कै तैनै मैंकै जे बात बताँई हैं।” पौलुस कै केसरिया मै भेजनो 23 तबई बानै दो सूबेदार कै अपने धौंरे बुलबाओ और कैई कै, “दो सौ सिपाई, सत्तर घोड़ा बारे, और दो सौ भाले बारौ कै रात के नौ बजे के बखत केसरिया जानै के ताँई तईयार करौ। 24 और पौलुस के ताँई बी घोड़ा तईयार रक्खौ और बाकै फेलिक्स राजपाल के धौंरे ठीक ठाक सै पौंचा देईओ।” 25 सैनापति नै चिट्ठी ऐंसे लिखी कै, 26 “आदरनीय राजपाल फेलिक्स कै कलोदियुस लुसियस की ओर सै नमस्कार। 27 जा आदमी कै यहूदी लोग पकड़कै मारनै बारे हे पर मैंकै जब जौ पतो लगो कै जौ रोमी है, तौ तबई मैंनै सिपाईऔं के संग जाकै बचा लओ। 28 और जौ जान्नै के ताँई कै यहूदी लोग जाके ऊपर दोस काए लगा रए हैं, इसताँई मै बड़ी सभा मै बाकै ले गओ। 29 तबई मैंकै जौ पतो चलो कै यहूदी लोग अपने नियम के बिरोद मै बाके ऊपर दोस लगाबैं हैं पर बाकै जान सै मारनै और जेल मै डान्नै लायक कोई बी दोस बामै ना है। 30 और जब मैंकै पतो चलो कै उन्नै जाकै मारनै के ताँई सला बना लई है, तौ तबई मैंनै जाकै तुरन्तई तेरे धौंरे भेजो है। जो जाके ऊपर दोस लगानै बारे हैं, उनकै बी हुकम दओ कै बे तेरे सामने जाके ऊपर लगाए भए इलजाम कै साबित करैं।” 31 जैसो सिपाईऔं कै हुकम देओ गओ हो, बैसेई उन्नै पौलुस कै रातौं रात ले जाकै अन्तिपतरिस सैहर मै पौंचा दओ। 32 दूसरे दिन सिपाई पौलुस कै घोड़ा बारौ के संग छोड़कै बापस छाबनी मै लौहटकै आए। 33 उनौनै केसरिया पौंच कै बौ चिट्ठी राजपाल कै दे दई और पौलुस कै बी बाके सामने खड़ो कर दओ। 34 राजपाल नै चिट्ठी पढ़ी और उनसै पूँछी कै, “जौ किस मुलक को रैहनै बारो है?” जब बाकै पतो चलो कै बौ किलिकिया को रैहनै बारो है, 35 तौ बानै बासै कैई कै, “मैं तेरी सुनबाई जबई करंगो जब बे जो तेरे ऊपर इलजाम लगानै बारे हैं आंगे।” बानै पौलुस कै हेरोदेस के किला मै रखनै को हुकम दओ। |
New Life Compute Institute [NLCI] - CC BY-NC-ND 4.0