चेलौ के काम 14 - बुक्साइकुनिया मै पौलुस और बरनबास 1 इकुनिया मै पौलुस और बरनबास यहूदी लोगौ के पिराथना घर मै गए और उन्नै उनकै ऐंसे बचन सुनाए कै यहूदी और गैर यहूदी लोगौ मै सै भौस्से लोगौ नै बिसवास करो। 2 पर जिन यहूदी लोगौ नै बिसवास ना करो, उन्नै गैर यहूदी लोगौ कै भड़काओ और उनके मनौ मै बिसवासी भाई लोगौ के खिलाप जैहर भर दओ। 3 पौलुस और बरनबास भौस्से दिन तक बहाँ रैहए और परभु के बारे मै बिना डरे लोगौ कै कैते रैहए। उनके हातौ सै परभु चिन्न और चमत्कार के कामौ कै करबाबै हो और अपने किरपा को सबूत देवै हो। 4 पर जब सैहर के लोगौ मै फूट पड़ गई तबई कुछ लोग यहूदी के लंग और कुछ लोग भेजे भए चेलौ के लंग हो गए। 5 तबई गैर यहूदी लोग और यहूदी लोग अपने नेताऔं के संग मिलकै पौलुस और बरनबास के संग गलत बरताब और उनके ऊपर पत्थर मारनै की चाल चली। 6 जब जा बात को पतो पौलुस और बरनबास कै चलो तबई बे लुकानिया के लुस्तरा और दिरबे के सैहरौं और इतै-उतै के इलाकेऔ मै बचकै चले गए। 7 और बहाँ बी अच्छी खबर सुनाल लगे। लुस्तरा और दिरबे मै पौलुस और बरनबास 8 लुस्तरा मै एक आदमी बैठो हो जो जलम सैई पाँऐ सै लंगड़ो हो और बौ कबी ना चलो। 9 जौ आदमी पौलुस कै बात करते सुन रओ हो और पौलुस नै बाकी ओर गौर सै नजर उठाकै देखो कै बा आदमी मै जौ बिसवास है कै मैं अच्छो हो जांगो। 10 तबई पौलुस नै बाकै जोर सै कैई, “अपने पाँऐ के बल सीदो खड़ो हो जा” और बौ तुरन्त खड़ो भओ और चलल-फिरल लगो। 11 लोगौ नै पौलुस कै जौ काम करतो देक्कै, लुकानिया की भासा मै जोर सै कैललगे, “हमरे बीच मै आदमी के रूप मै देबता आ गए हैं।” 12 उन्नै बरनबास कै जेस और पौलुस कै हिरमेस कैललगे, कैसेकै पौलुस बात कन्नै मै माहिर हो। 13 और सैहर के बाहार जेस देबता को मन्दर हो और जेस देबता को पुजारी बढ़िया चढ़ाबे के ताँई बैल और फूलौ की माला लेकै सैहर की फाटक मै पौंचो। कैसेकै लोग और पुजारी पौलुस और बरनबास के ताँई बलि चढ़ानो चाँहै हे। 14 जब दौनौ खास चेलौ बरनबास और पौलुस नै जौ सुनो तौ तबई बे अपने लत्तौ कै फाड़ते भए भीड़ मै जौ कैते भए घुस गए कै, 15 “हे भईयौ, तुम जौ ऐंसो काए कर रए हौ? हम बी तुमरेई हाँई आदमी हैं। हम तौ तुमकै अच्छी खबर सुनानै के ताँई आए हैं कै तुम इन बेकार की चीजौ कै छोड़कै जिन्दे परमेसर की ओर आऔ, जिसनै सुरग और धरती और समन्दर और जो कुछ उसमै है सिगरो बनाओ है। 16 “पैले के बखत मै परमेसर नै दुनिया के सिगरे लोगौ कै खुद अपनी अपनी रस्ता मै चलनै दओ। 17 तौबी बौ अपने भले कामौ के दुआरा तुमकै अपनी गभाई देतो रैहऔ। बौ भलाई करते भए आसमान सै बरखा बरसातो जिस्सै कै अच्छी फसल पैदा होए। और बौ तुमकै रोटी देवै हो और तुमरे दिल कै खुसी सै भरै हो।” 18 इत्ती बात कैह कै उन्नै बड़ी मुसकल सै लोगौ कै बलि चढ़ानै सै रोको। 19 अन्ताकिया और इकुनिया मै कुछ यहूदी लोग आए और बहाँ के लोगौ कै अपने संग कर लओ और पौलुस के ऊपर पत्थर मरवाए और बाकै मरो भओ समजकै सैहर के बाहार खचेड़ते भए लाए। 20 जब बिसवासी लोग बाके चारौ लंग खड़े भए, तबई बौ उठो और सैहर मै चलो गओ। और फिर दूसरे दिन बौ बरनबास के संग दिरबे सैहर मै चले गओ। सीरिया के अन्ताकिया सैहर मै लौहटनो 21 उन्नै बा सैहर के लोगौ कै अच्छी खबर सुनाकै और भौस्से चेला बनाकै बे बापस लुस्तरा, इकुनिया और पिसिदिया जिला के धौंरे बारे सैहर अन्ताकिया मै आए। 22 और चेलौ कै मजबूत करते रैहए कै बिसवास मै बने रौह और उनसै जौ कैई कै, “हमकै भारी दुख झेलते भए परमेसर के राज मै जानो पड़ैगो।” 23 पौलुस और बरनबास नै अगल अगल बिसवासिऔ की मंडली मै अगल अगल मुखियौं कै ठैराओ और बरत और पिराथना करकै उनौनै परभु के हात मै सौंप दओ जिसमै उन्नै बिसवास करो। 24 जाके बाद बे पिसिदिया जिला सै होते भए पंफूलिया जिला मै पौंचे। 25 और पिरगा मै बचन सुनाकै अतालिया सैहर मै आए। 26 और बहाँ सै पानी के जिहाज मै बैठकै अन्ताकिया आए। जहाँ सै बा काम कै सुरू कन्नै के ताँई परमेसर सै आसीस माँगी ही बाई जघै बापस आए और उनौनै बौ काम अब पूरो करो। 27 बे जब बहाँ पौंचे तौ उन्नै बिसवासिऔ की मंडली के लोगौ कै इखट्टो करो, और परमेसर नै जो कुछ उनके संग करो, बे बात उन लोगौ कै बताँई और जौ बात बी बताई कै गैर यहूदी लोगौ के ताँई बी परमेसर नै बिसवास को मौहड़ो खोल दओ है। 28 फिर पौलुस और बरनबास अन्ताकिया के चेलौ के संग भौत दिनौ तक बहाँ रैहए। |
New Life Compute Institute [NLCI] - CC BY-NC-ND 4.0