चेलौ के काम 11 - बुक्सापतरस को ऐरूसलेम मै बापस आनो 1 भेजे भए चेलौ नै और उन बिसवासी भाई लोगौ नै जो यहूदिया मै हे जौ बात सुनी कै गैर यहूदी लोगौ नै बी परमेसर के बचन कै मान लओ है। 2 जब पतरस ऐरूसलेम मै आओ तौ तबई कुछ यहूदी बिसवासी लोग बाके संग बैहैस बाजी करल लगे। 3 उन्नै कैई जौ तौ सरम की बात है कै, “तू गैर यहूदी लोगौ के घर मै रुको, और तैनै उनके संग खाओ पिओ हो।” 4 तबई पतरस नै जो बाके संग भओ बौ बात बताते भए उनसै कैई कै, 5 “मैं याफा सैहर मै पिराथना कर रओ हो और पिराथना करते करते मैंनै एक दरसन देखो कै एक चद्दर के हाँई कोई बड़ी चीज चारौ कौने सै लटकती भई, आसमान सै मेरे धौंरे उतरकै आई। 6 जब मैंनै बा चद्दर के ऊपर धियान सै देखो तौ बामै धरती के तरै-तरै के जनाबर और रिंगनै बारे जनाबर, जंगली जनाबर और पंछी देखे। 7 तबई मैंकै एक अबाज सुनाई दई कै, ‘हे पतरस, उठ और इनकै मारकै खा।’ 8 “पर मैंनै कैई कै, ‘ना परभु, मैं अपबित्तर और असुद्द चीज कै ना खावौं हौं।’ 9 “फिर दुबारा आसमान मै सै अबाज सुनाई दई कै, ‘जिन चीजौ कै परमेसर नै पबित्तर ठैराओ है उनकै तू अपबित्तर मत कैह।’ 10 तीन दफै ऐंसोई भओ। फिर बौ चद्दर आसमान मै बापस उठा लई गई। 11 “तबई बाई बखत मै जहाँ मैं रुको हो बा घर मै केसरिया सै तीन आदमी आए जिनकै मेरे धौंरे भेजर खाओ हो। 12 पबित्तर आत्मा नै मैंकै कैई कै, डरिए मत तू इन लोगौ के संग चलो जा। और बे छै भईया बी मेरे संग गए और हम कुरनेलियुस के घर गए। 13 “कुरनेलियुस नै हमकै कैई कै, ‘मैंनै एक सुरगदूत कै अपने घर मै खड़ो देखो, और बा सुरगदूत नै मैंसै कैई कै, “अपने आदमिऔ कै याफा सैहर मै भेजकै समौन जिसको नाम पतरस है बाकै हिंया बुलबा ले। 14 और बौ तुमकै ऐंसी बात सुनागो जिस्सै तू और तेरो सिगरो टब्बर मुक्ति पागो।”’ 15 “जब मैं उनके संग बात करल लगो तबई पबित्तर आत्मा उनके ऊपर ऐंसो आओ जैसो सुरू मै हमरे ऊपर आओ हो। 16 तबई मैंकै परभु की कैई भई बौ बात याद आई कै, ‘यहून्ना नै तौ पानी सै जल संस्कार दओ हो, पर तुम पबित्तर आत्मा सै बरदान पाऔगे।’ 17 जब परमेसर नै उनकै बी बैसोई बरदान देर खाओ है जैसो हमकै परभु ईसु मसी मै बिसवास कन्नै सै मिलो है, तौ मैं कौन होबौ हौं, जो परमेसर को बिरोद करौं?” 18 जौ बात सुनकै बे चुप हो गए, और परमेसर की बड़ाई करल लगे और उन्नै कैई कै, “परमेसर नै गैर यहूदी लोगौ कै बी गलत काम सै मन फिरानै को मौको दओ है जो जिन्दगी की ओर ले जावै है।” अन्ताकिया मै अच्छी खबर की सुरूआत 19 सितेफनुस के मरनै के बाद जो मुसीबत सुरू भंई हीं और जिसकी बजै सै जो बिसवासी लोग इतै-उतै बिखरे पड़े हे, बे फिरते फिरते फिनीकिया, कुपरूस और अन्ताकिया सैहरौं मै जा पौंचे हे, पर जे यहूदी लोगौ कै छोड़कै किसी दूसरे कै बचन ना सुनावै हैं। 20 इन बिसवासी लोगौ मै सै कुछ कुपरूस और कुरैन के हे, जो अन्ताकिया मै जाकै यूनानी लोगौ कै बी परभु ईसु की अच्छी खबर सुनाल लगे। 21 परभु की सकति उन लोगौ के संग ही और भौस्से लोगौ नै बिसवास करो और परभु की रस्ता मै चले। 22 जा बात को पतो जब ऐरूसलेम के बिसवासिऔ की मंडली के लोगौ कै चलो तौ तबई उन्नै बरनबास कै अन्ताकिया मै भेजो। 23 बानै बहाँ पौंच कै परमेसर की किरपा कै लोगौ के बीच मै देखो और बेसानी खुस भओ और बानै सबई जनी कै जौ बात सिकाई कै पूरे दिल सै परभु के बिसवास मै बने रौह। 24 बरनबास एक अच्छो आदमी हो और बौ पबित्तर आत्मा और बिसवास सै भरो भओ हो। तबई और बी भौस्से लोगौ नै परभु मै बिसवास करो। 25 तबई बरनबास साऊल कै ढूंड़तो भओ तरसुस कै चलो गओ। 26 जब बौ बासै मिलो तौ तबई बाकै बी अन्ताकिया मै लिआओ और बे एक साल तक बिसवासिऔ की मंडली के लोगौ सै मिलते रैहए और भौस्से लोगौ कै सिकाते रैहए और सबसै पैले चेलौ कै अन्ताकिया मै “मसी” कैओ गओ। 27 उनई दिनौ मै ऐरूसलेम सै अन्ताकिया मै कई नबी आए। 28 उनमै सै अगबुस नाम के एक नबी नै पबित्तर आत्मा की सकति सै भबिसबानी करी कै सिगरी दुनिया मै बेसानी अकाल पड़ैगो। बौ अकाल राजा कलोदियुस के बखत मै पड़ैगो। 29 तबई चेलौ नै फैसला करो कै यहूदिया मुलक मै बिसवासी भईयौ की सायता के ताँई अपनी कमाई मै सै कुछ भेजैं। 30 तब उन्नै बैसोई करो; और बौ दान बरनबास और साऊल के हात सै बिसवासिऔ की मंडली के मुखियौं के धौंरे भेजो। |
New Life Compute Institute [NLCI] - CC BY-NC-ND 4.0