चेलौ के काम 1 - बुक्सालूका की लिखी भई दूसरी किताब को परिचै 1-2 हे थियोफुलुस, मैंनै अपनी पैली किताब मै उन सबई कामौ के बारे मै लिखो है, जिनकै ईसु नै सुरू सै लेकै जिस दिन पबित्तर आत्मा के दुआरा अपने चुने भए चेलौ कै हुकम देकै सुरग मै उठाओ ना गओ उस दिन तक करते और सिकाते रैहओ। 3 अपनी मौत के बाद ईसु नै अपने भेजे भए चेलौ कै भौस्से पक्के सबूत देकै साबित करो कै मैं फिर सै जिन्दो हो गओ हौं। बौ उनकै चालीस दिन तक दिखाई देतो रैहओ, और परमेसर के राज के बारे मै बतातो रैहओ। 4 ईसु मसी अपने चेलौ के संग रोटी खा रओ हो तौ तबई बानै उनकै जौ हुकम दओ कै, “ऐरूसलेम कै ना छोड़ौ, पर मेरे अब्बा परमेसर को बौ बादो पूरो होनै को पैंड़ो देखते रौह, जिसके बारे मै तुमनै मैंसै सुनो है। 5 यहून्ना नै तौ पानी सै जल संस्कार देओ हो, पर कुछ दिनौ के बाद पबित्तर आत्मा सै जल संस्कार पाऔगे।” ईसु को सुरग मै जानो 6 जब बे एक संग इखट्टे भए तौ उनौनै बासै पूँछी, “हे परभु, का तू इसई बखत ईसराइल राज कै फिर सै बना देगो?” 7 ईसु नै उनसै कैई, “बा घड़ी और बा तरीका के बारे मै जान्नै को तुमरो काम ना हैं, जिनकै अब्बा नै अपनेई अधकार मै रक्खो है। 8 पर जब पबित्तर आत्मा तुम्मै आगो, तौ तुमकै सकति मिल जागी और ऐरूसलेम और सिगरे यहूदिया और सामरिया मै और सिगरी दुनिया मै मेरे गभा हौंगे।” 9 इतनो कैनै के बाद उनके देखते देखते बौ सुरग मै उठा लओ गओ और बादरौं नै बौ उनकी नजरौ सै लुका लओ। 10 जब बे ईसु कै आसमान मै ऊपर जाते बखत धियान सै देख रए हे, तबई दो आदमी सपेद लत्ता पैहरे भए उनके धौंरे आकै खड़े भए, 11 और उनसै कैई, “हे गलील के लोगौ, तुम काए आसमान की ओर देख रए हौ? जैसे तुमनै ईसु कै, सुरग मै उठाते भए देखो है, बैसेई बौ फिर आगो।” 12 फिर बे जैतून नाम के पहाड़ सै ऐरूसलेम लौहट आए, जो ऐरूसलेम सै कम सै कम एक किलोमीटर दूर हो। 13 और बहाँ पौंच कै पतरस, यहून्ना, याकूब, अन्दरयास, फिलिप्पुस, थौमा, बरतुलमै, मत्ती, हलफई को लौंड़ा याकूब, जोसीलो भक्त समौन और याकूब को लौंड़ा यहूदा जे सबई बा ऊपर के कमरा मै इखट्टे भए जहाँ जे रुके हे। 14 इनौके संग कुछ बईयरैं और ईसु की अईया मरियम और ईसु के भईया बी हे। जे सबई एक मन होकै पिराथना करे करै हे। यहूदा इसकरोती की जघै मत्तिया को चुनो जानो 15 बा दिन के बाद एक दिन जब कम सै कम एक सौ बीस बिसवासी लोग इखट्टे हे, तबई पतरस नै बीच मै खड़े होकै उनसै कैई ही कै, 16 “हे मेरे पियारे भईयौ और बहनौ, पबित्तर सास्तर की बौ भबिसबानी पूरी होनी जरूरी ही, जो पबित्तर आत्मा के दुआरा दाऊद के मौह सै यहूदा के बारे मै पैलेई सै कैई गई ही कै, यहूदा ईसु कै पकड़बानै बारौ मैसै सबई सै अग्गे हो। 17 कैसेकै बौ हमरे संगई गिनो गओ और बा सेवा मै बी बौ हमरे संगई हो।” 18 (यहूदा की बेईमानी की कमाई सै उनौनै बौ खेत मोल लओ, जहाँ बानै पैले फाँसी लगाई ही और बाको सरीर ऐंसे गिरो कै बाको पेट फट गओ और बाकी सबई आँत-कचरिया बाहार लिकर गंई। 19 और जा बात को पतो ऐरूसलेम के सबई रैहनै बारे लोगौ कै लग गओ हो, इसताँई बा खेत को नाम उनकी भासा मै हकलदमा पड़ो, जिसको मतलब है, “खून को खेत।”) 20 पतरस नै कैई, “कैसेकै भजन किरतन की किताब मै लिखो है कै, “‘बाको घर उजड़ जाऐ और बामै कोई ना बसै।’ और जौ बी लिखो है कै, ‘बाकी जघै कोई दूसरो ले लै।’ 21-22 “इसताँई जित्ते दिन तक परभु ईसु हमरे संग रैहओ, मतलब यहून्ना के जल संस्कार सै लेकै बाकै हमरे धौंरे सै सुरग मै ले जाय जानै तक, जो आदमी हमरे संग हे, उनमै सै एक आदमी हमरे संग बाके जी उठनै को गभा बनै।” 23 तब उनौनै दो आदमिऔ कै खड़ो करो, एक यूसप कै जिसकै बरसब्बा बी कैबै हैं और जौ यूसतुस नाम सै बी जानो जावै हो, और दूसरो मत्तिया कै। 24 तब उनौनै जौ पिराथना करी कै, “हे परभु, तू तौ सबई के मनौ कै जानै है, हमकै बता कै इन दौनौ मै सै तैनै किसकै चुनो है, 25 कै बौ जा सेवा के काम कै और भेजे भए चेला की जघै कै पूरी करै, जिस्सै आजाद होकै यहूदा सजा काटनै के ताँई चलो गओ जो बाके ताँई चुनी गई ही।” 26 तब उनौनै उन दौनौ के ताँई परची डारी और परची मत्तिया के नाम की लिकरी और बौ उन गियारै भेजे भए चेलौ के संग गिनो गओ। |
New Life Compute Institute [NLCI] - CC BY-NC-ND 4.0