2 तीमुथियुस 4 - बुक्सा1 परमेसर और ईसु मसी कै गभा मानकै, जो जिन्देऔं और मरे भएऔं दौनौ को नियाय करै है, और बाके राज के फिर सै आनै के बारे मै याद दिब्बाते भए मैं तुमकै हुकम देवौ हौं। 2 तू अच्छी खबर को परचार कर, चाँहे बखत होए या ना होए पर तू तईयार रैह और जो कोई गलती करै तौ उनकै चितौनी देईए और सबर के संग उनकै हिम्मत देईए और सिकईए। 3 कैसेकै ऐंसो दिन आगो जब लोग सई सिक्छा कै सुन्नोई ना चाँहंगे, पर बे अपनी इच्छा के हिसाब सै ऐंसे सिकानै बारे लोगौ कै लांगे, जो उनकै बेई बात बताऐ जो उनकै अच्छी लगै हैं। 4 बे सच्चाई की बातौं कै सुन्नै के ताँई अपने कानौ कै बन्द करंगे और मौह सै बनाई भई झूँटी कस्ताऔ मै धियान दंगे। 5 और तू सिगरी बातौं मै चौकस रैह, दुख सैह, अच्छी खबर के परचार को काम कर और अपनी सेवा पूरी कर। 6 अब मैंकै खुद अच्छी चीज के रूप मै उड़ेलो जा रओ है और मेरो मरनै को बखत अब आई गओ है। 7 मैंनै परभु के ताँई अच्छी कुस्ती लड़ी और अपनी दौड़ पूरी कर लई और मैंनै अपने बिसवास कै बचाए रक्खो। 8 अब सुरग मै मेरे ताँई धारमिकता को मुकट तईयार करकै रखर खाओ है और परभु जो सच्चो नियाय कन्नै बारो है। मैंकै बा दिन देगो और मैंकैई ना पर उन सबई लोगौ कै बी देगो जो पियार के संग बाको फिर सै आनै को पैंड़ो देख रए हैं। पौलुस की आखरी बात 9 मेरे धौंरे जल्दी आनै की कोसिस करौ। 10 कैसेकै देमास नै मैंकै छोड़कै जा दुनिया की बातौं सै पियार करो और थिसलुनीके देस मै चलो गओ। करेसकेन्स तौ गलातिया कै चलो गओ और तीतुस दलमतिया कै चलो गओ। 11 मेरे धौंरे बस लूका है। जब तू मेरे धौंरे आगो तौ मरकुस कै बी अपने संग लईए, कैसेकै सेवा के काम मै बौ मेरी सायता करै है। 12 तुखिकुस कै मैंनै इफिसुस सैहर मै भेजो है। 13 और जब तुम आऔ तौ बौ कुरता, जो मैं तरोआस सैहर मै करपुस के घर छोड़कै आओ हो, बाकै और मेरी उन किताबौ कै जो चमड़ा मै लिखी भई हैं जरूर लईए। 14 ताँबे को काम कन्नै बारे सिकन्दर नै मेरो बेसानी नुकसान करो है। बानै जैसो करो है, परभु बाकै बैसोई फल देगो। 15 तुम बी बासै चौकस रैहईओ, कैसेकै बानै हमरी बातौं को जो हम सिकाबै हैं भौत बिरोद करो है। 16 जब मेरी पैली दफै कचैरी मै सुनबाई ही तौ कोई बी मेरी सायता के ताँई ना आओ पर सिगरे जनी मैंकै छोड़ गए। मैं जौ उमीद रक्खौ हौं कै परमेसर के सामने उनमै सै कोई बी दोसी ना लिकरै। 17 पर परभु मेरे संग हो और बानै मैंकै हिम्मत दई और मैंकै जौ मौको दओ कै मैं बिना डरे जा पूरी खबर कै गैर यहूदी लोगौ कै सुना सकौं और तैनै मैंकै मौत के मौह सै बी बचाओ है। 18 परभु मैंकै सिगरी बुराई के कामौ सै बचाबै है, और बौ मैंकै अपने सुरग के राज मै बचाकै ले जागो। बाकी महिमा युगौं-युगौं तक होती रैह। ऐंसोई होए। आखरी नमस्कार 19 पिरसीला, अकुला और उन सबई लोगौ कै जो उनेसिफुरूस के टब्बर के हैं, मेरी ओर सै नमस्कार। 20 इरातुस तौ कुरिन्थुस सैहर मै रुक गओ और तुरफिमुस बेमार हो इसताँई मैं बाकै मिलेतुस सैहर मैई छोड़ी आओ। 21 और तू जाड़े सै पैलेई आनै की कोसिस करिए। इबलुस और पूदेनुस, लिनुस, कोलोदीया और सिगरे बिसवासी लोगौ को तेकै नमस्कार। 22 परभु तेरी आत्मा के संग रैहए, और तुमरे ऊपर परमेसर की किरपा होती रैह। |
New Life Compute Institute [NLCI] - CC BY-NC-ND 4.0