2 तीमुथियुस 1 - बुक्सा1 जौ चिट्ठी पौलुस की ओर सै है जो परमेसर की मरजी सै परभु ईसु मसी को भेजो भओ चेला हो और जिसकै ईसु मसी मै जिन्दगी पानै बारे बादे के परचार कन्नै के ताँई भेजो हो। 2 पियारे बेटा तीमुथियुस, तेकै हमरे अब्बा परमेसर और परभु ईसु मसी की ओर सै किरपा, दया और सान्ति मिलती रैह। धन्नबाद और हौसला बढ़ानो 3 मैं तुमकै रात-दिन अपनी पिराथना मै याद करते भए परमेसर को धन्नबाद देवौ हौं, और जैसी सेवा मेरे बापदादौं नै करी ही, बैसीई मैं बी साप मन सै करौ हौं। 4 मेरे ताँई जो असुआ तुमनै बहाए हैं, उनकै याद कर करकै मैं तुमसै मिलनै के ताँई बेचैन हौं, जिस्सै कै मैं खुसी सै भर जांऔ। 5 मैंकै तेरो बौ सच्चो बिसवास बी याद है, जो पैले तेरी नानी लोईस और तेरी अईया यूनीके मै हो, और मैं जौ बिसवास करौ हौं कै बौ तुम्मै बी होगो। 6 इसताँई मैं तुमकै जौ याद दिब्बाबौ हौं कै तू परमेसर के बा बरदान कै इस्तमाल कर जो तुमरे ऊपर मेरे हात रखनै सै मिलो है। 7 परमेसर नै हमकै डर की ना पर सकति, पियार और सबर की आत्मा दई है। 8 इसताँई ना तौ तू हमरे परभु की गभाई दैनै सै और ना मैंसै जो बाको कैदी है, सरमईओ। पर बा सकति के दुआरा अच्छी खबर कै सुनानै के ताँई मेरे संग दुख उठाऔ जो परमेसर की ओर सै मिलै है। 9 बानै हमकै मुक्ति दई है और हमकै पबित्तर जिन्दगी जीनै के ताँई बुलाओ है, जौ सबई कुछ हमरे कामौ की बजै सै ना पर बा मकसद और किरपा की बजै सै भओ है। जौ बरकत हमकै जा दुनिया के बन्नै सै पैलेई ईसु मसी मै देर खाई है। 10 पर अब हमरे मुक्ति दैनै बारे ईसु मसी के परकट होनै के दुआरा जौ बात सामने आई है कै बानै मौत को नास कर दओ है, और अच्छी खबर सै जिन्दगी कै और जो जिन्दगी कबी खतम ना होवै है, बाकी उमीद दिखाई है। 11 परमेसर नै मैंकै भेजो भओ चेला और परचार कन्नै बारो और गुरू इसताँई बनाओ कै मैं अच्छी खबर कै फैला सकौं। 12 इसताँई मैं जे दुख बी उठा रओ हौं, फिर बी मैं सरमाबौ ना हौं कैसेकै मैं जौ बात जानौ हौं कै मैंनै किस मै बिसवास करो है। मैंकै पक्को भरोसो है कै जो मैंकै चीज सौंपी हैं बाकी रखबारी बौ कर सकै है, जब तक कै बौ नियाय को दिन ना आय। 13 जो खरी बात तुमनै मैंसै सुनी है, बाकै बा बिसवास और पियार सै जो ईसु मसी मै है, थामे रौह। 14 हमरे भीतर रैहनै बारी पबित्तर आत्मा की बजै सै जो आत्मिक खजानो तुमकै देर खाओ है बाकी अच्छे सै रखबारी करौ। ईमानदारी और बेईमानी के उदाहरन 15 तुम जौ बात जानौ हौ कै एसिया मुलक के सिगरे बिसवासी लोग मैंकै छोड़ गए हैं। उनमै सै फुगिलुस और हिरमगिनेस बी हैं। 16 उनेसिफुरूस के टब्बर के ऊपर परभु दया करै कैसेकै बानै मेरे दिल कै कई दफै तसल्ली दई है और मेरे जेल मै रैहनै सै बाकी खोपड़ी सरम सै नीची ना भई। 17 पर जब बौ रोम मै आओ हो तौ जब तक मैं बाकै मिल ना गओ तब तक बौ मैंकै ढूंड़तो रैहओ। 18 परभु करै कै बाकै नियाय के दिन परमेसर की दया मिलै, कैसेकै तुमकै जौ पतो है कै इफिसुस मै बानै कई तरै सै मेरी सेवा करी ही। |
New Life Compute Institute [NLCI] - CC BY-NC-ND 4.0