2 थिसलुनीकियौ 3 - बुक्सा

हमरे ताँई पिराथना करौ

¹ ओ भईयौ और बहनौ, अब जौ कै तुम हमरे ताँई पिराथना करौ कै परभु को बचन जल्दीई फैलै और बचन महिमा पाऐ जैसो तुमरे बीच मै भओ है।

² और पिराथना करौ कै हम बुरे और दुसट लोगौ सै बचे रैंह, कैसेकै परभु मै बिसवास सबई लोग ना करै हैं।

³ पर हमरो परभु बिसवासजोग है। बौ तुमकै सैतान सै बचागो और तुमकै हिम्मत देगो।

⁴ हमकै परभु मै तुमरे पक्‍के बने रैहनै मै बिसवास है कै जो जो हुकम हमनै तुमकै देए हैं, तुम उनकै मानौ हौ और मानते बी रैहईओ।

⁵ परभु तुमरे दिल कै परमेसर के पियार और मसी के सबर के संग अग्गे बढ़नै मै सायता करै।

आलस के बिरोद मै चितौनी

⁶ ओ भईयौ और बहनौ, मैं तुमकै परभु ईसु मसी के नाम सै हुकम देवौ हौं कै जो बिसवासी लोग आलस करै हैं, और हमरी देई भई सिक्‍छा के हिसाब सै ना चलै हैं, उनसै दूर रौह।

⁷ कैसेकै तुम खुदई जानौ हौ कै तुमकै हमरे हाँई जिन्‍दगी कैसे जीनी है, कैसेकै तुमरे बीच मै रैहते भए हम आलसी ना हे।

⁸ और नाई हमनै किसी के हिंया मुफत मै रोटी खाई। पर हमनै रात-दिन मैहनत करकै और दुख झेल कै काम करो है जिस्सै कै तुम्मै सै किसी के ऊपर बोज ना पड़ै।

⁹ ऐंसी बात ना है कै हमरो तुमसै सायता लैनै को हक ना है। पर इसताँई करो कै तुम हमरे धौंरे सिकैं और हमरे हाँई जिन्‍दगी जीऐं।

¹⁰ कैसेकै जब्बी हम तुमरे धौंरे हे तौ तब्बी हम तुमकै जौ हुकम देवै हे कै, “अगर कोई काम ना करै है तौ बाकै खानै को बी हक ना है।”

¹¹ हमनै ऐंसो सुनो है कै तुमरे बीच मै कुछ आलसी हैं और कुछ काम बी ना करै हैं पर दूसरौं के काम मै टांग अड़ावै हैं।

¹² ऐंसे लोगौ कै हम परभु ईसु मसी मै हुकम देकै समजाबै हैं कै, बे चुपचाप अपनो काम करैं और अपनी कमाई की रोटी खाँय।

¹³ ओ भईयौ और बहनौ, जो भलाई को काम है बासै पिच्‍छे मत हटिओ।

¹⁴ जो कोई हमरी जा चिट्‌ठी की बातौं कै ना मानै है, तौ बासै चौकस और दूरई रैहईओ जिस्सै कै बाकै सरम आय।

¹⁵ और बाकै अपनो दुसमन ना समजिओ पर बिसवासी भईया या बहन समजकै चितौनी देईओ।

आखरी नमस्कार

¹⁶ अब परभु खुदई जो सान्‍ति को सोत है, तुमकै हर बखत मै हमेसा सान्‍ति दै। परभु तुम सबके संग रैह।

¹⁷ मैं पौलुस अपने हात सै तुमकै नमस्कार लिख रओ हौं। मेरे सिगरे चिट्‌ठी मै मेरो जौई चिन्‍न है। मेरो लिखनै को तरीका जौई है।

¹⁸ हमरे परभु ईसु मसी की किरपा तुम सबई के ऊपर होती रैह।