2 थिसलुनीकियौ 2 - बुक्सापरभु के दुबारा आनै सै पैले की घटना 1 ओ भईयौ और बहनौ, हम तुमसै अपने परभु ईसु मसी के बापस आनै और बाके धौंरे इखट्टे होनै के बारे मै तुमसै बिनती करै हैं, 2 कै आत्मा या बचन या कोई चिट्ठी के दुआरा जो मानौ हमरी ओर सै हो और बामै लिखो होए कै परभु को दिन आ चुको है, तौ तुम अपने मन कै बेचैन ना होन देईओ और ना घबरइओ। 3 तुम कैसे बी करकै किसी के धोके मै ना अईओ, कैसेकै परभु ईसु के आनै सै पैले लोग परमेसर सै मौह फेर लंगे और बौ पाप को आदमी जिसको नास होनोई है, परकट होगो। 4 बौ देबताऔ और सिगरी पूजनै की चीजौ को बिरोद करैगो और खुद कै बड़ो ठैरागो और बौ परमेसर के मन्दर मै बैठकै खुद कै परमेसर कैगो। 5 का तुमकै याद ना है कै जब मैं तुमरे संग हो तौ तुमसै जे सिगरी बात कैए करै हो? 6 तुम तौ अब जा बात कै जानौ हौ कै बाकै कोई रोके भए है, जिस्सै कै बौ अपने ठैराए बखत मै परकट होए। 7 मैंनै जौ इसताँई कैई कैसेकै बुराई की सकति पैलेई सै चुपचाप सै काम कर रई है, पर अबी एक बाकै रोकनै बारो है और बौ बाकै रोके रैहगो, जब तक कै रोकनै बारे कै हटा ना दै। 8 तबई बौ दुसट आदमी परकट होगो। पर जब परभु ईसु फिर सै आगो तौ बौ बाकै अपनी मौह की फूँक सै मार देगो और अपनी जोती की चमक सै बाकै भसम कर देगो। 9 बौ सबई सै बड़ो दुसट आदमी सैतान की सकति के संग आगो और चिन्न और सिगरे झूँटे चमत्कार के काम करैगो। 10 और सिगरे नास होनै बारौ कै पाप कन्नै के ताँई हर तरै को लालच देगो, कैसेकै उन्नै सच्चाई कै पियार ना करो, जिस्सै उनकै मुक्ति मिलती। 11 जाई बजै सै परमेसर एक भटकानै बारी सकति कै लोगौ कै धोको दैनै के ताँई आजाद करैगो, जिस्सै कै बे झूँट मै बिसवास करै। 12 और उन सिगरे लोगौ कै सजा मिलैगी जिन्नै सच्चाई मै बिसवास ना करो पर बुराई के कामौ मै लगे रैहए। बिसवास मै पक्के रौह 13 ओ भईयौ और बहनौ, और परभु के पियारे लोगौ हम हमेसा तुमरे बारे मै परमेसर कै धन्नबाद देवै हैं, कैसेकै परमेसर नै सुरू सैई तुमकै चुन लओ हो कै तुम परमेसर की आत्मा की सकति के दुआरा पबित्तर बनकै और सच्चाई मै बिसवास करकै मुक्ति पाऔ। 14 परमेसर नै हमरी अच्छी खबर के परचार की बजै सै तुमकै इसताँई बुलाओ कै तुम हमरे परभु ईसु मसी की बड़ाई मै सामिल हो सकौ। 15 इसताँई ओ पियारे भईयौ और बहनौ, पक्के रौह और उन सिक्छाऔ कै थामे रौह जो तुमनै हम सै और चिट्ठी के दुआरा सिकीं। 16 हमरो परभु ईसु मसी खुदई और हमरो पिता परमेसर जिसनै हम सै पियार करो है और अपने किरपा सै हमेसा की हिम्मत और अच्छी आस दई है, 17 बौ तुमरे मनौ मै सान्ति दै और सिगरे अच्छे काम और बचन मै पक्को बनाऐ रक्खै। |
New Life Compute Institute [NLCI] - CC BY-NC-ND 4.0