2 पतरस 3 - बुक्साईसु फिर आगो 1 हे मेरे पियारे भईयौ, अब मैं जौ दूसरी चिट्ठी लिख रओ हौं। और इन दौनौ चिट्ठिऔ सै तुमकै याद दिब्बाते भए तुमरे सच्चे मन कै जगानो चाँहौ हौं। 2 तुम उन बातौं कै जो पबित्तर नबिऔ नै पैलेई सै कैंई हीं; उनकै याद करौ और परभु और मुक्ति दैनै बारे की आगियाँ कै, जो भेजे भए चेलौ के दुआरा तुमकै दई हैं याद करौ। 3 सबसै पैले तुम जौ जानलो कै आखरी दिनौ मै मजाक उड़ानै बारे मजाक करते भए आंगे और बे अपनी बुरी इच्छा सै जिन्दगी जींगे। 4 और कैंगे, “परभु के आनै को बादे को का भओ? हमरे बापदादे मर गए, पर दुनिया की सुरूआत सै अब तक सब कुछ बैसोई को बैसो चल रओ है।” 5 बे जानबूझ कै जा सच्चाई सै मनैह करंगे कै परमेसर के बचन के दुआरा भौत पैलेई आसमान बनो हो; और धरती बी परमेसर के बचन सैई पानी मैई सै और पानी के दुआरा बनाई ही। 6 और इसई पानी सै बा जमाने की दुनिया पानी की बाड़ सै डूबकै नास हो गई। 7 पर बाके बचन के दुआरा जा जमाने के आसमान और धरती कै आग सै नास कन्नै के ताँई बचाकै रक्खो है, और नियाय के दिन तक और परमेसर कै ना माननै बारे लोगौ को नास होनै तक ऐंसेई रैहंगे। 8 पियारे लोगौं, पर जा एक बात कै भूलिओ मत कै परभु के ताँई एक दिन हजार बरस के बराबर है और हजार बरस एक दिन के बराबर है। 9 परभु अपने बादे कै पूरो कन्नै के ताँई देर ना करै है, जैसो कै कुछ लोग समजै हैं, पर बौ तुमरे ओर सबर रक्खै है कै कोई बी नास ना होए, पर सबई कै पापौं सै मन फिरानै को मौको मिलै। 10 पर परभु को दिन चोर के हाँई अचानक सै आगो, बा दिन आसमान एक बड़ी अबाज के संग गायब हो जागो और एक बड़ी लपट के संग सबई चीज पिगल जांगी, और धरती और बाके सबई काम सामने आ जांगे। 11 जब जे सबई चीज ऐंसेई नास होनै बारी हैं, तौ सोचौ तुमकै कैसो आदमी होनो चँईऐ और तुमरो चाल-चलन पबित्तर और तुमरी जिन्दगी परमेसर कै परसन्द आनै बारी हो। 12 तुमकै परभु के बा दिन को बेसबरी सै पैंड़ो देखनो चँईऐ, बा दिन आसमान कै आग सै नास कर दओ जागो और बाकी लपट सै बाके भीतर की सबई चीज पिगल जांगी। 13 पर हम परमेसर के बादे के हिसाब सै एक नए आसमान और नई धरती को पैंड़ो देख रए हैं; जहाँ धारमिकता रैहगी। 14 इसताँई पियारे दोस्तौ, जब तुम इन बातौं की आस रक्खौ हौ तौ ऐंसी कोसिस करे करौ कै तुम लोग परभु की नजरौ मै बिना कलंक के और बिना गलती के बाके संग मेल-जोल रखे करौ। 15 हमरे परभु के सबर सै तुमकै मुक्ति पानै के ताँई मौको मिलै है, जैसो हमरे पियारे भईया पौलुस नै बी बा गियान सै तुमकै लिखो है, जो बाकै परमेसर सै मिलो हो। 16 जैसो बानै अपनी सिगरी चिट्ठिऔ मै इन बातौं के बारे मै बताओ है, जिनमै सै कुछ बातौं कै समजनो मुसकल है; नासमज और एक बात के ऊपर ना टिके रैहनै बारे लोग उन बातौं कै बी और पबित्तर सास्तर के बचनौ कै बी तोड़ मड़ोड़ कै गलत मतलब लिकारकै खुदई अपने नास की बजै बनै हैं। 17 पियारे भईयौ, तुम इन बातौं कै पैलेई सै जानौ हौ इसताँई चौकस रौह। कहीं ऐंसो ना होए कै तुम उन दुसट आदमिऔ के बैहकाबे मै आकै अपनी रस्ता सै ना भटकिओ और अपनी मजबूती कै हात सै जान मत देईओ। 18 पर हमरे परभु और मुक्ति दैनै बारे ईसु मसी के किरपा और गियान मै बढ़ते जाऔ; और बाकी बड़ाई अब्बी हो और युगौं-युगौं तक होती रैह। ऐंसोई होए। |
New Life Compute Institute [NLCI] - CC BY-NC-ND 4.0