2 पतरस 2 - बुक्साझूँटे सिकानै बारे 1 और जैसे उनके बीच मै झूँटे भबिसबानी कन्नै बारे हे, बैसेई तुमरे बीच मै झूँटे सिकानै बारे बी हौंगे, जो चुपके चुपके नास कन्नै बारी झूँटी सिक्छा कै सिकाबै हैं, और बे बा मालिक को इनकार करै हैं जिसनै उनकै मोल लओ हो, ऐंसो करकै बे अपने ऊपर नास कै जल्दी बुलाबै हैं। 2 और भौस्से लोग उन बुरे सिकानै बारौ की बजै सै गलत रिस्ता बनांगे, इनई की बजै सै लोग सच्चाई की रस्ता कै बुरो कैंगे। 3 अपने फाएदा के ताँई झूँटे सिकानै बारे अपनी बनाई भई बातौं सै तुमसै पैसा कमांगे। उनकी सजा पैलेई सै ठैराई जा चुकी है और उनको नास होनैई बारो है। 4 कैसेकै परमेसर नै उन सुरगदूतौं कै बी ना छोड़ो जिनौनै पाप करो हो, बलकन उनकै साँकर सै बांधकै नरक के इन्धेरे कुन्ड मै फैंक दओ ताकि नियाय के दिन तक कैद मै रैंह। 5 धारमिकता की अच्छी खबर सुनानै बारो नूह और बाके टब्बर के सात लोगौ कै परमेसर नै बचाओ, पर जो अधरमी लोग हे और उनकी जो पुरानी दुनिया ही बाकै बाड़ सै नास करो। 6 और परमेसर नै सदोम, अमोरा नाम के सैहरौं कै जरा कै उनको नास कर दओ। जौ बात परमेसर कै ना माननै बारे लोगौ के ताँई आनै बारे बखत मै सजा की एक चितौनी है। 7 और परमेसर नै धरमी लूत कै बचाओ जो अधरमी लोगौं की कुकरमी बारी जिन्दगी सै भौत दुखी हो। 8 कैसेकै बौ एक धरमी आदमी हो और उन अधरमी लोगौ के बीच मै रैहते भए और बुरे कामौ कै देख देखकै और सुन सुनकै रोज बाकी सच्ची आत्मा तड़पै ही। 9 और परभु जानै है कै अपने लोगौं कै मुसीबतौं सै कैसे बचानो है और अधरमिऔं कै नियाय के दिन तक सजा के ताँई कैसे रखनो है। 10 खास करकै ऐंसे लोग जो बुरी इच्छाऔं के संग सरीर कै लेकै चलै हैं और बड़े अधकारिऔं कै बेकार समजै हैं; बे घमंडी और जिद्दी हैं और महिमा मै रैहनै बारौ कै बुरो भलो कैनै सै पिच्छे बी ना हटैं हैं। 11 जबकि सुरगदूत, भौतई जादा सकतिसाली और तागत बारे हैं, तौबी परभु के सामने उनके बारे मै बुरो ना कैबै हैं और नाई दोस लगाबैं हैं। 12 पर ऐंसे लोग नासमज जंगली जनाबरौ के हाँई हैं, जो पकड़े जानै और मारनै के ताँई पैदा भए हैं। बे उन बातौं के बारे मै बुरो बोलै हैं जिनकै बे ना तौ जानै हैं, बे जनाबरौ के हाँई नास हो जांगे। 13 जो बुराई जे दूसरौं के संग करै हैं, तौ बैसोई इनौई के संग बुरो होगो; उनकै दिन के उज्जेरे मै सरीर के मजे के ताँई गन्दो काम कन्नो अच्छो लगै है, जे लोग कलंक और दोस हैं। जब बी बे दाबतौं मै रोटी खानै के ताँई तुमरे संग इखट्टे होवै हैं, तौ ऐंसो बरताब करै हैं जो आदमी के ताँई सरम की बात है। 14 उनकी आँख बैबिचार सै भरी भई हैं और उनके भीतर हमेसा पाप की इच्छा बनी रैहबै है; जिनके मन जल्दी बहक जावै हैं उनकै बे बहला और फुसला लेबै हैं, उनको मन लालच मै भौत तेज है, और बे सरापित औलाद हैं। 15 बे सीदी रस्ता कै छोड़कै भटक गए हैं, और बोसोर के लौंड़ा बिलाम की जैसी चाल चलै हैं, जिसकै बेईमानी की कमाई सै पियार हो। 16 पर बाके बुरे कामौ की बजै सै एक गधी जो बोल ना सकै ही बौ आदमी के हाँई बोली और बा नबी कै डाँटकै बाको पागलपन रोको। 17 जे लोग सूके पानी के सोत और आँधी के उड़ाए भए धुन्द हैं; इनके ताँई बेसानी कुप्प इन्धेरो ठैराओ है। 18 जे बेकार की घमंड की बात करकै और सरीर की बुरी इच्छा और लुचपन की बातौं मै उनकै अपनी ओर खैंच लेबै हैं, जो गलत सिक्छा मै हैं उन लोगौ सै अबी-अबी बचकै लिकरे हैं। 19 बे उनकै आजाद होनै के ताँई बादो करै हैं, पर बे खुद पाप के दास हैं कैसेकै जो आदमी जिस्सै हार गओ बौ बाको दास बन जावै है। 20 अगर बे हमरे परभु और मुक्ति दैनै बारे ईसु मसी कै जानकै दुनिया की बुरी बातौं सै बच गए हैं; और बे फिर पाप मै फसकै हार जावै हैं, तौ उनकी अबी की जिन्दगी पैले सै बी बुरी हो गई है। 21 जो कोई धरम की रस्ता कै जानकै बी बा पबित्तर आगियाँ कै तोड़ै है तौ उनके ताँई जौ अच्छो होगो कै बे उसकै जानतेई ना। 22 उनके ताँई जे कहाबत सई हैं कै, “कुत्ता अपनी उल्टी कै फिर चाटै है” और “नभाई भई सुअरनी बापस कींच मै जावै है।” |
New Life Compute Institute [NLCI] - CC BY-NC-ND 4.0