2 पतरस 1 - बुक्सापतरस को नमस्कार 1 मैं समौन पतरस जो ईसु मसी को सेवक और भेजो भओ चेला हौं, जौ चिट्ठी मैं उन लोगौ के नाम लिख रओ हौं जो हमरे हाँई हमरे परमेसर और मुक्ति दैनै बारे ईसु मसी की धारमिकता के दुआरा सै बिसवास पावै हैं। 2 परमेसर और हमरे परभु ईसु के पूरे गियान के दुआरा भौस्सी किरपा और सान्ति तुमकै मिलै। बिसवास मै बढ़ौ 3 परमेसर की सुरग की सकति नै हमकै बौ सब कुछ दओ है जो जिन्दगी और भक्ति के ताँई जरूरी है; और जौ सब हमनै बाके गियान पानै की बजै सै पाओ है, जिसनै हमकै अपनी बड़ाई और भलाई मै सामिल होनै के ताँई बुलाओ है। 4 इसताँई उसनै हमकै बड़े और कीमती बादे दए हैं, ताकि तुम नास होनै सै बच सकौ जो जा दुनिया मै बुरी इच्छा सै आवै है, और तुम परमेसर के सौभाब के हिस्सेदार हो जाऔ। 5 इसताँई तुम पूरे दिल सै मैहनत करकै अपने बिसवास मै अच्छे गुन, और अच्छे गुन मै गियान, 6 और गियान मै अपने ऊपर काबू, और अपने ऊपर काबू मै सबर, और सबर मै भक्ति। 7 और भक्ति मै भाई चारे कै और भाई चारे मै पियार कै जोड़ते जाऔ। 8 अगर जे अच्छे गुन तुम्मै बने रैंह और बढ़ते जाँय, तौ जे गुन तुमकै हमरे परभु ईसु मसी के पूरे गियान मै ना तौ निकम्मो और ना बेकार होन दंगो। 9 पर जिस आदमी मै जे अच्छे गुन ना हैं, बौ धुंदरो देखनै बारो और अन्धो है; और अपने पैले के पापौं सै धुबकै सुद्द होनै की बात कै भूल चुको है। 10 इसताँई हे भईयौ, तुम जौ बात जाननै के ताँई हमेसा तईयार रौह, कै परमेसर नै तुमकै सच्ची मैई बुलाओ और चुनो है। कैसेकै अगर तुम इन बातौं कै करौ हौ तौ तुम कबी ठोकर ना खाऔगे। 11 और इसई तरै सै हमरे मुक्ति दैनै बारे परभु ईसु मसी के हमेसा के राज मै बड़ी इज्जत के संग तुमरो सुआगत करो जागो। 12 इसताँई तुम लोग इन बातौं कै जानौ हौ और बा सच्चाई मै पक्के बने भए हौ, फिर बी मैं तुमकै इन बातौं कै हमेसा याद दिब्बातो रैहंगो। 13 मैंकै जौ सई लगै है कै जब तक मैं जिन्दो हौं तब तक तुमकै हमेसा याद दिब्बाते भए होसिआर करतो रैहंगो। 14 कैसेकै मैंकै पतो है, जैसो हमरे परभु ईसु मसी नै मैंकै दिखाओ है कै जा दुनिया सै मेरो जानै को बखत धौंरेई आ गओ है। 15 इसताँई मैं जौ कोसिस करंगो कै मेरे मर जानै के बाद बी तुम इन बातौं कै हमेसा याद करते रौह। ईसु मसी की महिमा के गभा 16 जब हमनै तुमकै हमरे परभु ईसु मसी की सकति और आनै की अच्छी खबर सुनाई ही, तौ हमनै चालाँकी सै बनाई भई कस्ता को साहारो ना लओ हो, पर हम खुद बाकी बड़ी सकतिऔं कै देक्कै बाकी गभाई देवै हैं। 17 जब बानै परम पिता परमेसर सै इज्जत और बड़ाई पाई तबई बाके ताँई बड़ी महिमा सै एक ऐंसी अबाज आई कै, “जौ मेरो पियारो लौंड़ा है जिस्सै मैं भौत खुस हौं।” 18 और जब हम बाके संग पबित्तर पहाड़ मै हे, तौ हमनै खुद सुरग सै जौई अबाज सुनी ही। 19 नबिऔ को जौ बचन हमरे ताँई जा घटना सै और बी जादा पक्को भओ है; तुम जौ अच्छो करौ हौ कै जौ समजकै जामै धियान देवौ हौ कै बौ बचन एक दिया है जो इन्धेरे मै बा बखत तक चमकतो रैहबै है जब तक दिन को उज्जेरो ना होए और सकारे को तारो तुमरे दिल मै ना चमक उठै। 20 मगर तुम सबई लोग पैले जौ अच्छी तरै सै जानलो कै पबित्तर सास्तर की कोई बी भबिसबानी किसी के खुद की सोच के हिसाब सै ना होवै है। 21 कैसेकै कोई बी भबिसबानी आदमी की मरजी सै कबी ना भई है। पर पबित्तर आत्मा की सायता सै आदमी परमेसर की ओर सै बोलै है। |
New Life Compute Institute [NLCI] - CC BY-NC-ND 4.0