2 यहून्ना 1 - बुक्सानमस्कार 1 मैं बुजरग, बा बईयर कै जो परमेसर की चुनी भई है, और बाके बालकौ के नाम जिनकै मैं सच्चाई सै पियार करौ हौं, और मैंई ना बलकन बे सबई, जो सच कै जानै हैं बे सब पियार करै हैं। 2 और जाई सच्चाई की बजै सै बौ हम्मै बनो रैहबै है, और जो हमेसा हमरे संग रैहगो। 3 परम पिता परमेसर और बाके लौंड़ा ईसु मसी की ओर सै किरपा, दया और सान्ति; सच्चाई और पियार के संग हम्मै बनो रैहगो। सच्चाई और पियार 4 मैं जौ देक्कै भौत खुस हौं कै मैंनै तेरे बालकौ कै जैसी हमरे परम पिता नै हमकै आगियाँ दई है बैसेई सच्चाई मै चलते भए देखो। 5 बईयरौं मैं तुमकै कोई नई आगियाँ ना लिख रओ हौं बलकन बौई आगियाँ देरओ हौं, जो हमकै सुरू सैई मिली हैं कै हमकै एक दूसरे सै पियार रखनो चँईऐ। 6 और पियार को मतलब जौ है कै हमकै मसी की आगियाँ के ऊपर चलनो चँईऐ। जैसो तुमनै सुरू सै सुनो है और बाकी आगियाँ जौई है कै तुम पियार की रस्ता मै चलौ। 7 दुनिया मै भौस्से ऐंसे बैहकानै बारे आए हैं, जो जौ ना मानै हैं कै जा धरती मै आदमी बनकै ईसु मसी आओ, ऐंसे लोग बैहकानै बारे और मसी बिरोदी हैं। 8 अपने आपकै चौकस रक्खौ; ताकि जो मैहनत हमनै करी है, बाकै तुम ना खोओ, बलकन बाको पूरो फल पाऔ। 9 जो कोई मसी की सिक्छा मै बनो ना रैहबै है पर बौ अग्गे बढ़तो जावै है, तौ बाके धौंरे परमेसर ना है। जो कोई मसी की सिक्छा मै बनो रैहबै है, बाके धौंरे परम पिता और लौंड़ा दौनौई हैं। 10 अगर कोई तुमरे धौंरे आय, और जौई सिक्छा ना देए, तौ बाकै ना तौ घर मै आन देईओ और ना बाकै नमस्ते करिओ। 11 कैसेकै जो ऐंसे आदमी को सुआगत करै है, बौ बाके बुरे कामौ मै साजेदार होवै है। 12 मेरे धौंरे लिखनै के ताँई भौस्सी बात हैं, मगर मैं जौ कागज और सिआई सै ना लिखनो चाँहौ हौं। पर मैंकै उमीद है कै मैं तुमरे धौंरे आकै आमने-सामने बैठकै बात करंगो। जिस्सै हमकै पूरी खुसी मिलै। 13 तेरी बहन जिसकै परमेसर नै चुनो है बाके बालक तेकै नमस्ते कैबै हैं। |
New Life Compute Institute [NLCI] - CC BY-NC-ND 4.0