2 कुरन्थियों 5 - बुक्सा1 कैसेकै हम जौ जानै हैं कै जौ हमरो सरीर एक तम्बू के हाँई है जिसमै हम जा धरती मै रैहबैं हैं, और जब जा तम्बू कै गिरा दओ जागो तौ, परमेसर की ओर सै हमकै सुरग मै ऐंसो घर मिलैगो जो कबी खतम ना होगो, और जिसकै किसी आदमी नै ना बनाओ होगो। 2 और जब तक हम जा घर के हाँई सरीर मै पड़े हैं, तब तक कैंखते रैहबैं हैं, और जौ चाँहबै हैं कै हम अपने सुरग के घर मै कब बसैं। 3 जाकै पैहरनै सै हम नंगे ना रैहंगे। 4 सच्ची मै हम जब तक जा दुनिया के घर यानी सरीर मै रैहंगे, तौ बोज की बजै सै कैंखते रैहंगे, कैसेकै हम अपने जा सरीर कै छोड़नै के ताँई ना सोचै हैं। पर जामै सुरग के सरीर कै पैहरनो चाँहै हैं, जिस्सै जौ नास होनै बारो सरीर जिन्दगी मै बदल जाय। 5 जिसनै हमकै जा बात के ताँई तईयार करो है, बौ परमेसर है, और बानै हमकै बियाने मै पबित्तर आत्मा दई है। 6 हमकै पक्को बिसवास है, और हम जौ बी जानै हैं कै जब तक हम जा सरीर मै हैं, परभु सै दूर हैं। 7 कैसेकै हम जो देखै हैं बाके हिसाब सै ना पर बिसवास के हिसाब सै जीवै हैं। 8 हमकै पक्को बिसवास है और जाई बजै सै हम अपने सरीर के घर कै छोड़कै परभु के धौंरे रैहनो अच्छो लगै है। 9 इसताँई हमरी इच्छा है कै चाँहे हम सरीर मै रैंह या ना रैंह परभु कै परसन्द हौं। 10 हमनै जिन्दगी मै सरीर के हिसाब सै जित्ते बी अच्छे और बुरे काम करे हैं। उनको फल पानै के ताँई एक दिन मसी के नियाय सिंगासन के सामने खड़ो होनो पड़ैगो। मसी के दुआरा परमेसर के संग मेल 11 परभु को डर मानते भए हम लोगौ कै समजानै की कोसिस करै हैं और परमेसर हमकै अच्छे ढंग सै जानै है, और मैं जौ उमीद करौ हौं कै तुमरो मन बी जौ बात जरूर जानै है। 12 हम तुमरे सामने अपनी बड़ाई ना करैं हैं। पर हम तुमकै एक मौको देवै हैं कै तुम हमरे ऊपर घमंड करौ जिस्सै कै तुम उन लोगौ कै जबाब दे सकौ, जो दिल की बातौं मै ना पर दिखावे की बातौं के ऊपर घमंड करै हैं। 13 कैसेकै अगर हम पागल के हाँई दिखाई देवै हैं तौ परमेसर के ताँई, और अगर समजदार हैं तौ बौ तुमरे ताँई हैं। 14 कैसेकै मसी को पियार हमकै मजबूर कर देवै है, हम जौ समजै हैं कै जब एक आदमी सब लोगौ के ताँई मरै तौ सिगरे लोग बी मर गए। 15 मसी सिगरे लोगौ के ताँई मरो, कैसेकै जो जिन्दे हैं बे खुद के ताँई ना पर बाके ताँई जीऐं जो उनके ताँई मरो और फिर सै जिन्दो भओ। 16 पर अब सै हम किसी बी आदमी कै जा दुनिया की नजरौ के हिसाब सै ना देखंगे। पर एक बखत हो जब हम मसी कै जा दुनिया के लोगौ की नजरौ के हिसाब सै देखै हे पर अब ऐंसे ना देखै हैं। 17 कैसेकै अगर कोई मसी मै है, तौ बौ एक नओ आदमी है। सिगरी पुरानी बात खतम हो गंई, और सब नओ हो गओ है। 18 जे सिगरी बात परमेसर की ओर सै हैं, जिसनै मसी के दुआरा अपने संग मेल करबाओ, और हमकै दूसरे लोगौ के संग परमेसर सै मेल कन्नै के ताँई सेवा दई है। 19 हमरी बात जौ है कै परमेसर नै लोगौ के पाप को लेखो-जोखो ना लओ पर मसी के दुआरा जा दुनिया के लोगौ को अपने संग मेल करबाओ, और जौ मेल-जोल को बचन हमकै देओ है। 20 इसताँई हम मसी के दूत हैं, और परमेसर हमरे दुआरा तुमकै समजाबै है। और हम मसी की ओर सै तुमसै बिनती करै हैं कै तुम परमेसर के संग मेल करौ। 21 मसी नै कोई पाप ना करो हो, पर बाकै हमरे ताँई परमेसर नै पाप बना दओ जिस्सै कै हम परमेसर की धारमिकता मै साजेदार हौं। |
New Life Compute Institute [NLCI] - CC BY-NC-ND 4.0