2 कुरन्थियों 4 - बुक्सामट्टी के बरतनौ मै आत्मिक धन 1 कैसेकै परमेसर की दया सै जौ सेवा हमकै मिली है, जिसके ताँई हम हिम्मत ना हारै हैं। 2 पर जो गलत काम हम चोरी चोरी करै हे उनकै हमनै छोड़ दओ है, और ना हम चालाँकी करै हैं और ना परमेसर के बचन मै मिलाबट करै हैं। पर हम सच्चाई कै परमेसर के सामने परकट करै हैं और सिगरे लोग अपने मनौ मै जौ जानै कै जौ बात सच्ची है। 3 अगर हमरी अच्छी खबर के ऊपर परदा पड़ो है तौ बौ उन लोगौ के ताँई पड़ो है जो नास होनै बारी रस्ता के ऊपर चलै हैं। 4 सैतान जा दुनिया को देबता है, और बानै उन लोगौ की बुद्धि बन्द करर खाई है, और बे मसी मै बिसवास ना करै हैं जो परमेसर को रूप है, जो मसी की अच्छी खबर की महिमा की चमक कै ना देख सकै हैं। 5 हम खुद अपनो परचार ना करै हैं पर ईसु मसी को जो परभु है बाको परचार करै हैं। मैं अपने बारे मै जौ कैबै हौं कै हम ईसु की बजै सै तुमरे सेवक हैं। 6 कैसेकै परमेसरई है जिसनै ऐंसो कैओ है कै, “इन्धेरे मै उज्जेरो हो जाय।” और बौई उज्जेरो हमरे दिलौ मै बी चमको जिस्सै कै हम परमेसर की बा महिमा के गियान की जोती कै जान जाऐ जो परभु ईसु मसी के मौह मै चमकै है। 7 पर हम मट्टी के बा बरतन के हाँई हैं जिसमै जौ खजानो रक्खो भओ है। जिस्सै जौ साप-साप हो जाऐ कै बौ सकति जो कबी खतम ना होवै है, हमरी ओर सै ना पर बौ परमेसर की ओर सै है। 8 हमकै चारौ लंग सै दुख नै घेरर खाओ है, पर हम दुख सै कबी हार ना मानै हैं; हम परेसान तौ होवै हैं पर उदास ना होवै हैं। 9 हमकै सताओ जावै है, पर परमेसर हमकै ना छोड़ै है, हमकै गिराओ तौ जावै है पर हम नास ना होवै हैं। 10 हम ईसु मसी की मौत कै हरदम अपने सरीर मै लेए फिरै हैं, जिस्सै कै ईसु की जिन्दगी हमरे सरीर सै दिखाई देती रैह। 11 कैसेकै ईसु की बजै सै हम जिन्देऔं कै हमेसा मौत के हात मै देओ जावै है, जिस्सै कै ईसु की जिन्दगी हमरे मरनै बारे सरीर मै परकट होए। 12 इसताँई हम तौ मौत को सामनो करते रैहबैं हैं। पर तुमकै हमेसा की जिन्दगी को फाएदा मिलै है। 13 कैसेकै पबित्तर सास्तर मै लिखौ है, “मैंनै बिसवास करो इसताँई मैं बोलो,” और हम्मै बी बिसवास की बौई आत्मा है, इसताँई हम बोलै हैं और हम बिसवास बी करै हैं। 14 कैसेकै हम जौ जानै हैं कै, जिसनै परभु ईसु कै जिन्दो करो है, बौई हमकै ईसु मै फिर सै जिन्दो करैगो, और तुमरे संग हमकै बी अपने सामने खड़ो करैगो। 15 जे सिगरी चीज तुमरेई ताँई हैं और जैसे परमेसर की किरपा जादा सै जादा लोगौ मै फैलती जागी बैसेई बे परमेसर की महिमा की बजै सै बाकै जादा सै जादा धन्नबाद दंगे। बिसवास की जिन्दगी 16 चाँहे हमरे सरीर को नास होतो जा रओ होए, पर हमरे भीतर की आत्मा रोज नई होती जावै है, इसताँई हम हिम्मत ना हारै हैं। 17 कैसेकै हमरो घड़ी भर को एक छोटो सो दुख हमरे ताँई हमेसा की महिमा कै पैदा करै है जो दुख सै भौत अच्छो है। 18 हम दिखाई दैनै बारी चीजौ के ऊपर ना पर जो दिखाई ना देवै हैं उन चीजौ के ऊपर धियान देवै हैं। कैसेकै देखी भई चीज कुछ बखत की हैं और जो दिखाई ना देवै हैं बे हमेसा की हैं। |
New Life Compute Institute [NLCI] - CC BY-NC-ND 4.0