2 कुरन्थियों 1 - बुक्सा1 परमेसर की मरजी सै मसी ईसु को भेजो भओ चेला मैं पौलुस और तीमुथियुस दौनौ की ओर सै परमेसर के उस बिसवासिऔ की मंडली के ताँई जो कुरन्थी मै हैं और अखाया के सिगरे इलाके के बिसवासी लोगौ कै जौ चिट्ठी लिख रओ हौं। 2 हमरे परम पिता परमेसर और परभु ईसु मसी की ओर सै तुमकै किरपा और सान्ति मिलती रैह। पौलुस की ओर सै परमेसर को धन्नबाद 3 हमरे परभु ईसु मसी के परम पिता परमेसर को धन्नबाद होए, जो किरपा को अब्बा और सबई तरै की तसल्ली दैनै बारो परमेसर है। 4 बौ हमरी हर एक मुसीबत मै हमकै तसल्ली देवै है, जिस्सै कै हम बी दूसरे लोगौ की हर एक मुसीबत मै बैसेई तसल्ली दैं जिस तरै परमेसर नै हमकै दई है। 5 कैसेकै हम जैसे मसी के दुख मै हिस्सेदार हैं, बैसेई हमकै मसी की बजै सै भौस्सी तसल्ली मिलै है। 6 अगर हम दुख झेलै हैं, तौ बौ तुमरी सायता और मुक्ति के ताँई है, और अगर हमकै तसल्ली मिलै है। तौ जौ तुमरी तसल्ली के ताँई है, और बाईके असर की बजै सै तुम सबर के संग दुख कै सैह लेबौ हौ, जिसकै हम बी सैहबैं हैं। 7 तुमरे बारे मै हमकै पक्को बिसवास है, कैसेकै हम जानै हैं कै जैसो दुख हमनै झेलो बैसोई तुम बी झेलौ हौ और जैसी तसल्ली हमकै मिली बैसेई तुमकै बी मिलै है। 8 हे भईयौ और बहनौ, जैसी मुसीबत हमनै एसिया मै झेली हीं बाके बारे मै तुमकै जरूर पतो होनो चँईऐ, और बे मुसीबत इत्ती बड़ी और भारी हीं कै हमरे सैहने सै बाहार हीं और ऐंसो लगै हो कै हमनै अपनी जिन्दगी सै बी हात धो दओ होए। 9 सच्ची मैई हमनै अपने मन मै जौ सोच लओ हो कै हमकै मौत की सजा दे दई है। जौ इसताँई भओ कै हम अपने ऊपर ना पर परमेसर के ऊपर भरोसो रक्खै हे जो मरे भएऔं कै फिर सै जिन्दो करै है। 10 बानै हमकै बा बड़ी मौत सै बचाओ और बचातो बी रैहगो; और हमरी आस बासै जौ है कै बौ आनै बारे बखत मै बी हमकै बचातो रैहगो। 11 तुम लोग हमरे ताँई पिराथना करौ। और जो आसीस पिराथना सै हमकै मिलै है, बाके ताँई भौस्से लोग हमरी ओर सै परमेसर कै धन्नबाद दंगे। पौलुस की योजना मै बदलाब 12 हमकै घमंड है, कै हम जौ बात कै साप मन सै बोल सकै हैं, हमनै जा दुनिया के संग और खास करकै जैसो परमेसर नै चाँहो बैसोई हमनै तुम लोगौ के संग ईमानदारी और सच्चाई के संग बरताब करो है। जे बात परमेसर की किरपा सै मिलै हैं ना कै दुनिया की मन की समज सै। 13 हम तुमकै और कुछ ना लिख रए हैं, बस बौई लिखै हैं जिसकै तुम पढ़ सकौ और समज सकौ। और हमकै उमीद है कै तुम आखरी तक समजते रैहओगे, 14 जैसो अबी तुमनै हमकै थोड़ो समजो है। जब परभु ईसु को फिर सै आनै को दिन आगो तौ जैसो हम तुमरे ऊपर घमंड करै हैं, बैसेई तुम बी हमरे ऊपर करौगे। 15 मैंनै जाई बिसवास की बजै सै पैलेई तुमरे धौंरे आनै को पक्को मन बना लओ हो कै तुमकै एक और आसीस मिलै। 16 मैं जौ सोचौ हौं कै मैं तुमरे धौंरे सै होते भए मकिदुनिया जांऔ और बहाँ सै बापस लौहटते बखत तुमरे धौंरे फिर आऔं; जिस्सै कै तुम मैंकै यहूदिया की ओर जानै के ताँई बिदा करौ। 17 जब मैंनै तुमरे धौंरे आनै के ताँई मन बनाओ हो, तौ तुमनै ऐंसो सोचो कै जौ सबई कुछ मैं बगैर सोचे समजे करौ हौं। तुमनै मेरे बारे मै जौ बी सोचो कै मैं दुनिया के आदमिऔ के हाँई एकई घड़ी मै हाँ मै हाँ और ना मै ना करौ हौं। 18 परमेसर जा बात को गभा है कै जो बात मैंनै तुम लोगौ सै कैंई हैं, बामै हाँ और ना दौनौ ना मिलै हैं। 19 कैसेकै परमेसर को बेटा, ईसु मसी, जिसकी अच्छी खबर को सन्देसो सिलवानुस, तीमुथियुस और मैंनै तुमरे बीच मै दओ हो, बामै कबी हाँ और कबी ना दौनौ ना हे, पर बामै सिरप हाँ ही। 20 कैसेकै परमेसर नै जितने बादे करे हैं। बे सिगरे मसी मै हाँ के संग हैं, और मसी के दुआरा जो हम “आमीन” करै हैं। बौ परमेसर की बड़ाई के ताँई है। 21 और बौ परमेसरई है, जिसनै हमकै मसी मै तुमरे संग मजबूती सै जोड़ खाओ है, और बाई नै हमकै छाँटर बी खाओ है। 22 और बाई परमेसर नै हमरे ऊपर मौहर बी लगा दई है, और हमरे भीतर बियाने के रूप मै पबित्तर आत्मा बी दई है। 23 परमेसर मेरो गभा है कै, मैं फिर सै कुरन्थी सैहर मै इसताँई ना आओ कै मैं तुमकै दुख ना पौंचा सकौं। 24 और जाको मतलब जौ ना है कै, हम तुमरे बिसवास के ऊपर हक पानो चाँहै हैं। तुम तौ अपने बिसवास मै मजबूत हौ, पर हम तुमरे संग काम करकै तुमकै खुसी देनी चाँहै हैं। |
New Life Compute Institute [NLCI] - CC BY-NC-ND 4.0