1 थिसलुनीकियौ 3 - बुक्सा

¹ इसताँई जब हम और जादा बरदास ना कर सके, तौ हमनै एथेन्स मै इकले रुकनै को फैसला करो,

² और तीमुथियुस जो मसी की अच्‍छी खबर कै फैलानै मै हमरो संगी भईया और परमेसर की सेवा कन्‍नै बारो है, बाकै हमनै तुमरे धौंरे इसताँई भेजो कै बौ तुमकै बिसवास मै मजबूत करकै तुमरी हिम्मत बढ़ाऐ,

³ जिस्सै कै कोई बी इन दुखौ की बजै सै ना घबराऐ। कैसेकै तुम जानौ हौ कै जौ सबई हमरे ताँई परमेसर की मरजी सै है।

⁴ कैसेकै पैले बी जब हम तुमरे हिंया हे तौ तुमसै कैबै हे कै हमकै दुख झेलने पड़ंगे, और बैसोई भओ। तुमकै जा बात को पतो बी है।

⁵ इसताँई जब मैंसै रैहओ ना गओ तौ तुमरे बिसवास को हालचाल जान्‍नै के ताँई मैंनै तीमुथियुस कै भेजो। कैसेकै मैंकै जा बात को डर हो कै कहीं सैतान तुमकै अपने लालच मै फसा ना लै और हमरी मैहनत बेकार चली जाय।

अच्‍छी खबर कै लेकै तीमुथियुस को आनो

⁶ पर अब तीमुथियुस तुमरे बिसवास और पियार की खबर लेकै लौहटो है। बौ हमकै बताबै है कै तुम हमेसा हमकै पियार सै याद करौ हौ और हम सै फिर मिलनै के ताँई जितने तुम बेचैन हौ उत्‍तेई हम बी हैं।

⁷ इसताँई हे भईयौ और बहनौ, तुमरे बिसवास के बारे मै सुनकै हमनै सिगरे दुख और दरद मै बी हिम्मत पाई है।

⁸ हम जौ बात सुनकै भौत खुस हैं कै तुम बिसवास मै मजबूत होकै खड़े हौ और परभु के संग हौ।

⁹ जैसी खुसी परमेसर के सामने हमकै तुमरी बजै सै मिली है। बाकी बजै सै हम परमेसर को धन्‍नबाद किस तरीका सै करै?

¹⁰ हम रात-दिन पूरे दिल सै परमेसर सै जौ पिराथना करै हैं कै तुमकै देख सकैं। अगर तुमरे भीतर बिसवास की कुछ कमी है तौ बाकै पूरो करैं।

¹¹ अब हमरो परम पिता परमेसर और परभु ईसु हमकै तुमरे धौंरे आनै के ताँई रस्ता दिखागो।

¹² और परभु ऐंसो करै कै जैसो हम तुमसै पियार करै हैं, बैसोई तुम लोग बी आपस मै करौ, और तुमरो पियार सबई आदमिऔ के संग बढ़तो जाय।

¹³ हम जौ पिराथना करै हैं कै तुमरे दिल मजबूत हौंऐ। जब हमरो परभु ईसु अपने पबित्‍तर लोगौ के संग आय, तौ बा बखत मै बी तुम परमेसर के सामने पबित्‍तर और निरदोस ठैर सकौ।