1 थिसलुनीकियौ 2 - बुक्साथिसलुनीके मै पौलुस के काम 1 ओ भईयौ और बहनौ, तुम खुदई जानौ हौ कै हमरो तुमरे धौंरे आनो बेकार ना गओ। 2 और तुम जौ बात बी जानौ हौ कै तुमरे धौंरे आनै सै पैले फिलिप्पी मै हमकै दुख झेलनो और बुरो बरताब सैहनो पड़ो। पर फिर बी हमनै परमेसर की सायता सै बड़े बिरोद को सामनो करते भए, बिना डरे तुम लोगौ के बीच मै परमेसर की अच्छी खबर कै सुनाओ है। 3 हम जो कुछ बी लोगौ कै सिकाबै हैं बौ बैहकानै के ताँई ना, और ना गलत इरादे सै, और नाई किसी कै धोको दैनै के ताँई सिकाबै हैं। 4 पर परमेसर नै हमकै अच्छी खबर कै सौंपनै के ताँई लायक समजो है। इसताँई हम लोगौ कै खुस कन्नै के ताँई ना पर हमरे दिल कै परखनै बारे परमेसर कै खुस कन्नै के ताँई सुनावै हैं। 5 कैसेकै परमेसर हमरो गभा है। तुम जौ बी जानौ हौ कै हम ना तौ कबी चुगली की बात करै हैं, और नाई कबी लालच के ताँई कोई बहानो बनाबै हैं। 6 हम ना तौ तुमरी, और ना लोगौ की, और ना दूसरौं की ओर सै अपनी बड़ाई चाँहै हे। 7 हम मसी के भेजे भए चेला होनै की बजै सै अपनो हक जता सकै हैं। पर हम तुमरे संग पियार सै रैहए, जैसे अईया अपने बालकौ कै खबा पिबा कै उनकै पालै है, बैसेई हमनै बी तुमरे संग कोमलता दिखाई है। 8 तुमरे ताँई हमरो पियार और लगाब इत्तो बढ़ गओ हो कै हम परमेसर की अच्छी खबर के संग-संग अपनी जान बी दैनै के ताँई तईयार हे, कैसेकै तुम हमरे खास हो गए हौ। 9 ओ भईयौ और बहनौ, तुम याद रक्खौ कै हमनै तुमरे बीच मै रात-दिन मैहनत को काम इसताँई करो है, जिस्सै कै हम परमेसर की अच्छी खबर कै सुनाते भए किसी के ऊपर बोज ना बनै। 10 परमेसर और तुम बी जा बात के गभा हौ कै तुम बिसवासी लोगौ के संग हमरो बरताब कितनो साप और बगैर गलती बारो और ईमानदारी बारो हो। 11 तुम जानौ हौ कै जैसो अब्बा अपने बालकौ के संग बरताब करै है, बैसोई हमनै बी तुमरे संग करो। 12 बैसेई हम तुम सबई कै बी उपदेस, और सान्ति देवै हैं, और समजाबै बी हैं कै तुमरो चाल-चलन परमेसर कै परसन्द आनै बारो होए, जो तुमकै अपने राज और महिमा मै बुलाबै है। 13 इसताँई हम बी परमेसर कै हमेसा धन्नबाद देवै हैं। कैसेकै हमरे दुआरा परमेसर को बचन तुमरे धौंरे पौंचो, तौ तुमनै बाकै आदमिऔ को ना पर परमेसर को पबित्तर बचन समजकै बिसवास करो और जौ बचन तुम लोगौ के बीच मै काम करै है। 14 इसताँई ओ मेरे भईयौ और बहनौ, तुमरे संग बी बैसोई होओ जैसो यहूदिया देस के बिसवासिऔ की मंडलिऔ के लोगौ के संग होओ, जो मसी ईसु मै हे। कैसेकै तुमनै बी अपने लोगौ सै दुख पाओ, जैसो उनौनै यहूदी लोगौ सै पाओ हो। 15 यहूदी लोगौ नै परभु ईसु और नबिऔ कै मारो और हमकै बी सता कै लिकार दओ। और बे सबई आदमिऔ के खिलाप हैं और परमेसर उनसै खुस ना है। 16 ऐंसे लोग हमकै मुक्ति की अच्छी खबर के सन्देसे कै गैर यहूदी लोगौ कै सुनानै सै रोकैं हैं। बे सोचै हैं कै कहीं उन लोगौ कै मुक्ति ना मिल जाय, इन बातौं सै बे अपने पापौं को घल्ला भरते रैहबैं हैं और अब परमेसर को घुस्सा उनके ऊपर आ गओ है। फिर मिलनै की इच्छा 17 पर ओ भईयौ और बहनौ, हम कुछ बखत के ताँई तुमरे दिल सै ना पर सरीर सै अगल भए हे। इसई बजै सै हमनै तुमसै मिलनै के ताँई और बी जादा कोसिस करी। 18 इसताँई हम तुमसै मिलनै के ताँई भौत कोसिस कर रए हे। मैं पौलुस खुद नै बी बेरमबेरा तुमरे धौंरे आनै की कोसिस करी। पर सैतान हमकै रोके रैहओ। 19 हमरे परभु ईसु के आनै के बखत मै बाके सामने हमरी आस, खुसी, या बड़ाई को मुकट का है? का तुम ना हौ? 20 कैसेकै तुमई हमरी बड़ाई और खुसी हौ। |
New Life Compute Institute [NLCI] - CC BY-NC-ND 4.0