1 पतरस 5 - बुक्सापरमेसर के लोगौ की भीड़ 1 मैं बी एक बिसवासिऔ की मंडली को मुखिया हौं और मसी के दुखौ को गभा हौं; बाकी आनै बारी महिमा मै साजेदार हौं और तुमरे मुखियौं कै हिम्मत देते भए जौ बिनती करौ हौं कै। 2 जो तुमरे बीच मै परमेसर के लोग हैं उनकी रखबारी करौ; पर जौ दबाब सै ना और नाई बुरी कमाई के ताँई बलकन जौ परमेसर की इच्छा सै और अपनी खुसी सै करौ। 3 जिन लोगौ कै तुमरे हात मै देओ है उनके ऊपर हक ना जमाऔ, पर उनके ताँई एक मिसाल बनौ। 4 और जब रखबारी कन्नै बारो बड़ो गड़रिया परकट होगो तौ तबई तुमकै महिमा को मुकट देओ जागो। जिसकी चमक कबी कम ना होवै है। 5 हे जमान बालकौ, तुम बी मुखियौं की बात मानौ, और तुम सब एक दूसरे के संग नमर बनौ कैसेकै पबित्तर सास्तर मै लिखो है, “परमेसर घमंड कन्नै बारौ को बिरोद करै है पर दीन लोगौ के ऊपर किरपा करै है।” 6 इसताँई तुम परमेसर के सकतिसाली हातौ के नीचे दीन बनकै रैहऔ जिस्सै बौ तुमकै सई बखत मै अग्गे बढ़ा सकै। 7 अपनी सिगरी फिकर कै परमेसर के ऊपर छोड़ दो, कैसेकै बौ तुमरो धियान रक्खै है। 8 होसिआर रौह और जगते रौह, कैसेकै तुमरो दुसमन सैतान एक दहाड़ते भए सेर के हाँई इतै-उतै घूमतो भओ जा मौके मै रैहबै है कै किसकै फाड़ खांऔ। 9 बिसवास मै पक्के बने रौह और सैतान को बिरोद करौ कैसेकै तुम जौ जानौ हौ कै दुनिया मै जितने बिसवासी लोग हैं, बे सबई ऐंसेई दुख सैह रए हैं। 10 अब परमेसर जो सिगरे किरपा को धनी है, जिसनै तुमकै मसी मै अपनी हमेसा की महिमा के ताँई बुलाओ है, तुमरो थोड़े देर को दुख सैहनै के बाद बौ खुदई तुमकै सिद्द, पक्के, सकतिसाली और तागत बारो बनागो। 11 बाकी सकति युगौं-युगौं तक रैह। ऐंसोई होए। आखरी नमस्कार 12 मैंनै जौ छोटी सी चिट्ठी सिलवानुस के हात सै लिखबाई है, जिसकै मैं बिसवासजोग भईया मानौ हौं। मैं तुमकै समजाबौ हौं और अपनी जौ गभाई देवौ हौं कै, परमेसर की सच्ची किरपा जौई है और जाई मै बने रौह। 13 बेबिलोन देस के बिसवासी लोग जो तुमरे हाँई परमेसर के दुआरा चुने भए है, और मेरो लौंड़ा मरकुस तुम लोगौ कै नमस्कार कैबै है। 14 पियार सै एक दूसरे सै गले मिलकै नमस्कार करौ; और तुम सबकै जो मसी हैं सान्ति मिलै। |
New Life Compute Institute [NLCI] - CC BY-NC-ND 4.0