1 पतरस 4 - बुक्साबदली भई जिन्दगी 1 मसी नै अपने सरीर मै दुख उठाओ, इसताँई तुम बी ऐंसेई मन सै तईयार हो जाऔ, कैसेकै जिसनै सरीर मै दुख उठाओ है बौ पाप सै आजाद हो गओ है। 2 ताकि अग्गे की जो जिन्दगी बची है बाकै लालच और पापी आदमी के हाँई ना पर जैसो परमेसर चाँहै है, बैसेई जीऐं। 3 कैसेकै तुम लोग अबिसवासी आदमिऔ के हाँई बैबिचार, बुरी इच्छा, पियकड़ लोग, ऐंसी दाबतौं मै जानो जहाँ कुकरम और बैबिचार होवै हैं, और दारू पीनै की दाबत और बेकार की मूरती पूजा कन्नै मै बौ बखत बिता चुके हौ। 4 और अब जब तुम जा कुकरम बारी और बुरी जिन्दगी मै उनको सात ना देवौ हौ तौ बे अचम्बो करकै तुमरी बुराई करै हैं। 5 पर बे परमेसर कै अपने कामौ को लेखो दंगे जो जिन्दे और मरे भएऔं को नियाय कन्नै के ताँई तईयार है। 6 कैसेकै मरे भए आदमिऔ कै बी अच्छी खबर इसताँई सुनाई ही कै सरीर के हिसाब सै उनको नियाय हो पर आत्मा मै बे परमेसर के हिसाब सै जीऐं। 7 बौ बखत आनै बारौ है जब सबई कुछ नास हो जागो, इसताँई तुम सबई चौकस और खुद के ऊपर काबू रक्खौ ताकि तुम पिराथना कर सकौ। 8 और सबसै बड़ी बात तौ जौ है कै आपस मै हमेसा पियार रक्खौ कैसेकै पियार भौस्से पापौं कै ढक देवै है। 9 एक दूसरे की खातरदारी खुसी के संग करौ। 10 परमेसर की ओर सै जिसकै जो खास बरदान मिलो है, बाकै एक अच्छे भन्डारी के हाँई, एक दूसरे की सेवा के काम के ताँई लगाऐ। 11 जिसकै परचार कन्नै को बरदान मिलो है तौ बाकै जौ बात पतो रैह, कै बौ परमेसर की ओर सै बोल रओ है; अगर किसी कै दूसरौं की सायता कन्नै को बरदान मिलो है तौ बौ बा सकति सै करै जो परमेसर सै मिलै है, और इन सिगरी बातौं मै ईसु मसी के दुआरा परमेसर कै महिमा मिलै। सिगरी महिमा और सकति युगौं-युगौं तक बाई की हो। ऐंसोई होए। मसी के लोगौ के ताँई दुख उठानो 12 पियारे दोस्तौ, तुमकै परखनै के ताँई आगी हाँई दुख की घड़ी आई है और तुम ऐंसो सोचकै अचम्बो ना करिओ कै जौ तुमरे ताँई कोई अजीब बात है। 13 तुम जितने मसी के दुख मै सामिल होबौ हौ, उत्तोई तुम खुस होईयो और जब बाकी महिमा परकट होगी तौ तुम खुसी के मारे आपेमै ना रैहओगे। 14 अगर मसी के नाम सै लोग तुमरी बेजती करै हैं तौ तुम खुद कै धन्न समजौ; कैसेकै महिमा को आत्मा जो परमेसर की आत्मा है बौ तुमरे भीतर बसै है। 15 तुम मै सै कोई बी आदमी खूनी, चोर, कुकरम कन्नै बारो या दूसरे के काम मै टांग अड़ानै की बजै सै दुख ना झेलै। 16 पर जो कोई मसी के नाम की बजै सै दुख झेलै है, तौ बौ सरमाऐ ना, पर बा नाम मै परमेसर की बड़ाई करै। 17 कैसेकै नियाय कन्नै को बखत आई गओ है कै पैले परमेसर अपनेई लोगौ सै नियाय सुरू करैगो, और जब नियाय की सुरूआत हम सैई होगी तौ उन लोगौ को का होगो? जो परमेसर की अच्छी खबर कै ना मानै हैं। 18 और अगर धरमी आदमी मुसकल सै मुक्ति पागो, तौ पापी लोगौ को और जो परमेसर कै ना मानै हैं उनको का होगो? 19 इसताँई जो लोग परमेसर की इच्छा सै दुख झेलै हैं, बे भलाई करते भए अपनी जान कै बा परमेसर के हात मै दे दैं जो बिसवासजोग और सबकै बनानै बारो है। |
New Life Compute Institute [NLCI] - CC BY-NC-ND 4.0