1 यहून्ना 5 - बुक्सादुनिया के ऊपर हमरी जीत 1 जो कोई जौ बिसवास करै है कै ईसुई मसी है, बौ परमेसर की औलाद बन गओ है, और जो कोई परम पिता सै पियार करै है, बौ बाकी औलाद सै बी पियार करै है। 2 जब हम परमेसर सै पियार करै हैं, और बाकी आगियाँ कै मानै हैं, तौ हम इस्सै जानै हैं कै हम परमेसर की औलादौं सै बी पियार रक्खै हैं। 3 परमेसर की आगियाँ कै माननोई परमेसर सै पियार कन्नो है। और बाकी आगियाँ बोज ना है। 4 कैसेकै जो कोई परमेसर की औलाद बन जावै है, बौ दुनिया के ऊपर जीत पावै है, और जा दुनिया के ऊपर जीत दैनै बारो हमरो बिसवास है। 5 जो कोई जौ बिसवास करै है कै ईसुई परमेसर को लौंड़ा है, बौई दुनिया के ऊपर जीत पावै है। ईसु मसी के बारे मै गभाई 6 बौ ईसु मसी ई है जो हमरे धौंरे जल और खून के दुआरा आओ। सिरप जल सैई ना पर जल और खून के दुआरा आओ। और बौ आत्मा है जो बाकी गभाई देवै है, कैसेकै आत्माई सच्ची है। 7 गभाई दैनै बारे तीन हैं। 8 पबित्तर आत्मा, और जल, और खून जे तीनौ एकई गभाई देवै हैं। 9 जब हम आदमिऔ की गभाई मान लेबै हैं, तौ परमेसर दुआरा देई गई गभाई तौ उस्सै बी बढ़कै है, और परमेसर की गभाई जौ है, कै बानै अपने लौंड़ा के बारे मै गभाई दई है। 10 जो परमेसर के लौंड़ा के ऊपर बिसवास करै है, बौ अपने भीतर बा गभाई कै रक्खै है। अगर कोई परमेसर मै बिसवास ना करै है, तौ बौ परमेसर कै झूँटो ठैराबै है। कैसेकै बानै बा गभाई को बिसवास ना करो, जो परमेसर नै अपने लौंड़ा के बारे मै दई ही। 11 और बौ गभाई जौ है कै, परमेसर नै अपने लौंड़ा के दुआरा हमकै हमेसा की जिन्दगी दई है और जौ जिन्दगी बाके लौंड़ा मै है। 12 जिसके धौंरे ईसु मसी है, बाके धौंरे हमेसा की जिन्दगी है, और जिसके धौंरे परमेसर को लौंड़ा यानी ईसु मसी ना है, बाके धौंरे हमेसा की जिन्दगी बी ना है। हमेसा की जिन्दगी 13 परमेसर के लौंड़ा मै बिसवास कन्नै बारौं, मैं तुमकै जे बात इसताँई लिख रओ हौं कै तुम जौ जान पाऔ कै हमेसा की जिन्दगी तुमरे धौंरे है। 14 परमेसर के ऊपर हमरो जौ बिसवास है कै अगर हम बाकी मरजी के हिसाब सै कुछ बी माँगै हैं, तौ बौ हमरी सुनै है। 15 और जब हम जौ जानै हैं कै बौ हमरी सुनै है, चाँहे हम उस्सै कुछ बी माँगै। तौ हम जौ बी जानै हैं कै हमनै जो कुछ माँगो है, बौ हमकै मिल गओ है। 16 अगर कोई अपने भईया कै ऐंसो पाप करतो देखै जिसको फल मौत ना है, तौ बौ बाके ताँई पिराथना करै और परमेसर बाकै जिन्दगी देगो, जिनौनै ऐंसो पाप करो हो जिसको फल मौत ना है। ऐंसो पाप बी है जिसको फल मौत है; मैं बाके बारे मै पिराथना कन्नै के ताँई ना कैबै हौं। 17 सबई अधरम के काम पाप हैं, मगर ऐंसो पाप बी है जो मौत की ओर ना ले जावै है। 18 हम जानै हैं कै जो कोई परमेसर की औलाद बन गओ है बौ पाप ना करतो रैहबै है। बलकन जो परमेसर की औलाद हैं उनकै परमेसर बचाकै रक्खै है और बौ दुसट उनको कुछ बी ना बिगाड़ पावै है। 19 हम जानै हैं कै हम परमेसर सै हैं। मगर जौ सिगरी दुनिया बा दुसट के बस मै है। 20 हम जानै हैं कै परमेसर को लौंड़ा आ गओ है और बानै हमकै समज दई, ताकि हम बा सच्चे परमेसर कै जान लैं और बामै बने रैंह जो सच्चो है, कैसेकै हम बाके लौंड़ा ईसु मसी मै बने रैहबै हैं। जौई सच्चो परमेसर है और हमेसा की जिन्दगी है। 21 हे बालकौ, खुद कै झूँटे देबी-देबताऔ सै बचाकै रक्खौ। |
New Life Compute Institute [NLCI] - CC BY-NC-ND 4.0