1 यहून्ना 4 - बुक्साआत्माऔ कै परखौ 1 मेरे पियारे लोगौ, हर आत्मा को बिसवास मत करौ, बलकन हमेसा उनकै परख कै देखौ कै का बे परमेसर की ओर सै हैं? जौ बात मैं तुमसै इसताँई कैरओ हौं, कैसेकै भौस्से झूँटी भबिसबानी कन्नै बारे दुनिया मै फैले भए हैं। 2 परमेसर की आत्मा कै तुम ऐंसे पैचान सकौ हौ, जैसे हर बौ आत्मा जो जौ मानै है कै, “ईसु मसी सरीर धारन करकै धरती मै आओ है।” बौ परमेसर की ओर सै है। 3 ईसु परमेसर की ओर सै आओ है। जा बात कै जो आत्मा ना मानै है, तौ बौ मसी बिरोदी आत्मा है। जिनके बारे मै तुमनै सुनो है कै बौ आनै बारो है। बलकन अब तौ बौ इस दुनिया मैई है। 4 हे पियारे बालकौ, तुम परमेसर के हौ। इसताँई तुमनै मसी के दुसमनौ के ऊपर जीत पा लई है। कैसेकै बौ परमेसर जो तुम्मै है, इस दुनिया मै रैहनै बारे सैतान सै महान है। 5 बे मसी बिरोदी लोग दुनिया के हैं, इस बजै सै बे दुनिया की ओर सै बोलै हैं, और दुनिया उनकी सुनै है। 6 मगर हम परमेसर की ओर सै हैं इसताँई जो परमेसर कै जानै है, बौ हमरी सुनै है। मगर जो परमेसर की ओर सै ना है, बौ हमरी ना सुनै है। इस तरै सै हम सच्चाई की आत्मा कै और लोगौ कै भटकानै बारी आत्मा कै पैचान सकै हैं। परमेसर पियार है 7 हे पियारे लोगौ, हमकै दूसरौं सै पियार रखनो चँईऐ, कैसेकै पियार परमेसर सै मिलै है और हर कोई जो पियार करै है, बौ परमेसर की औलाद बन गओ है, और परमेसर कै जानै है। 8 और जो पियार ना करै है, बौ परमेसर कै ना जानै है, कैसेकै परमेसरई पियार है। 9 परमेसर नै अपनो पियार हमरे ऊपर ऐंसे दिखाओ कै बानै अपनो इकलौतो लौंड़ा जा दुनिया मै भेजो, जिस्सै कै हम बाके लौंड़ा के दुआरा जी सकैं। 10 पियार की पैचान जौ है कै हमनै पैले परमेसर कै ना, बलकन परमेसर नै हम सै पियार करो है और हमरे पापौं कै मिटानै के ताँई बानै अपनो लौंड़ा बलि होनै के ताँई भेजो। 11 हे पियारे भईयौ, जब परमेसर नै हम सै इतनो पियार करो, तौ हमकै बी एक दूसरे कै पियार कन्नो चँईऐ। 12 परमेसर कै कबी बी किसी नै ना देखो। अगर हम एक दूसरे सै आपस मै पियार रक्खैं, तौ परमेसर हम्मै रैहबै है और बाको पियार हमरे भीतर पक्को हो गओ है। 13 इसई सै हम जानै हैं कै हम बामै बने रैहबैं हैं, और बौ हम्मै, कैसेकै बानै अपनी आत्मा मै सै हमकै दओ है। 14 हमनै जौ देखो है और हम इसकी गभाई बी देवै हैं, कै परम पिता नै अपने लौंड़ा कै दुनिया के मुक्तिदाता के रूप मै भेजो। 15 और जो कोई जौ मान लेबै है कै, “ईसुई परमेसर को लौंड़ा है” तौ परमेसर बामै बनो रैहबै है, और बौ परमेसर मै। 16 इसताँई हम बा पियार कै जानै हैं और बाके ऊपर भरोसो रक्खैं हैं, जो परमेसर सै हमकै मिलै है। परमेसर पियार है, और जो पियार मै बनो रैहबै है, बौ परमेसर मै बनो रैहबै है और परमेसर बामै। 17 इसई सै हम्मै पियार पक्को हो गओ है ताकि नियाय के दिन हम्मै हिम्मत बनी रैह। कैसेकै जो जिन्दगी हम जा दुनिया मै जी रए हैं, बौ मसी की जिन्दगी के हाँई है। 18 पियार मै कोई डर ना है, पर सच्चो पियार डर दूर करै है। डर मै सजा है। इसताँई जिसमै डर है, बौ पियार मै पक्को ना बनै है। 19 हम इसताँई पियार करै हैं कैसेकै पैले परमेसर नै हम सै पियार करो है। 20 अगर कोई कैबै है कै, “मैं परमेसर सै पियार करौ हौं” और बौ अपने भईया सै नफरत करै, तौ बौ झूँटो है। कैसेकै जो अपने भईया सै पियार ना करै है, जिसकै बौ देखै है, तौ बा परमेसर कै जिसकै बानै कबी देखोई ना है, पियार कैसे कर सकै है? 21 इसताँई हमकै मसी सै जौ आगियाँ मिली है कै जो परमेसर सै पियार करै है बाकै अपने भईया कै बी पियार कन्नो चँईऐ। |
New Life Compute Institute [NLCI] - CC BY-NC-ND 4.0