1 यहून्ना 3 - बुक्साहम परमेसर की औलाद 1 देखौ परम पिता परमेसर नै हम सै कितनो पियार करो है, कै हम बाकी औलाद कैलाए, और हम हैं बी। दुनिया हमकै ना जानै है, कैसेकै दुनिया नै परमेसर कै ना जानो। 2 मेरे पियारे भईयौ, अब हम परमेसर की औलाद हैं, मगर जौ अबी तक परकट ना भओ है कै हम का बनंगे। हम इतनो जानै हैं कै जब परमेसर को लौंड़ा परकट होगो, तौ हम बाके जैसेई हो जांगे, कैसेकै हम बाकै बैसेई देखंगे जैसो बौ है। 3 और जो कोई बाके ऊपर ऐंसी आस रक्खै है, बौ खुद कै बैसेई पबित्तर रक्खै है, जैसो मसी पबित्तर है। 4 जो कोई पाप करै है, बौ परमेसर के नियम कै तोड़ै है, कैसेकै नियम कै तोड़नोई पाप है। 5 तुम जानौ हौ कै मसी पापौं कै दूर कन्नै के ताँई परकट भओ है, और मसी मै कोई पाप ना है। 6 जो कोई मसी मै बनो रैहबै है, बौ पाप करतो ना रैहबै है और जो कोई पाप करतो रैहबै है, उन्नै ना तौ मसी कै देखो और नाई बाकै जानो है। 7 हे बालकौ, किसी के बैहकाने मै मत अईओ। जो धरम के काम करै है, बौ मसी के हाँई धरमी है। 8 जो पाप करतोई रैहबै है, बौ दुसट की ओर सै है, कैसेकै दुसट सुरू सैई पाप करतो आओ है। पर परमेसर को लौंड़ा इसताँई आओ है, कै दुसट के कामौ कै नास करै। 9 जो परमेसर की औलाद है, बौ पाप ना करतो रैहगो, कैसेकै बामै परमेसर को बीज बनो रैहबै है। बौ पाप ना कर सकै है, कैसेकै बौ परमेसर सै जलमो है। 10 परमेसर की औलाद और दुसट की औलाद की पैचान जौ है, कै हर एक आदमी जो धरम के काम ना करै है, और अपने भईयौ सै पियार ना रक्खै है, बौ परमेसर की औलाद ना है। एक दूसरौं सै पियार रक्खौ 11 जौ सन्देसो तुमनै सुरू सैई सुनो है कै हमकै एक दूसरे सै पियार रखनो चँईऐ। 12 हमकै कैन के हाँई ना बन्नो चँईऐ, जो दुसट की ओर सै हो और जिसनै अपने भईया कै जान सै मारो हो। बानै अपने भईया कै जान सै काए मारो? कैसेकै कैन के काम बुरे हे और बाके भईया के काम अच्छे हे। 13 हे भईयौ, अगर दुनिया तुमसै नफरत करै है, तौ अचम्बो मत करिओ। 14 हम जानै हैं कै हम मौत सै लिकरकै जिन्दगी मै आ गए हैं, कैसेकै हम अपने भईयौ सै पियार करै हैं; जो पियार ना करै है, बौ मौत के बस मै है। 15 जो कोई अपने भईया सै नफरत करै है, बौ खूनी है और तुम जानौ हौ कै किसी बी खूनी के भीतर हमेसा की जिन्दगी ना रैह सकै है। 16 मसी नै हमरे ताँई अपनी जिन्दगी दे दई, इसई सै हम जान गए हैं कै पियार का है? हमकै बी अपने भईयौ के ताँई अपनी जान देनी चँईऐ। 17 अगर किसी आदमी के धौंरे दुनिया की दौलत है और बौ अपने भईया की जरूरत कै देक्कै बाके ऊपर तरस ना खावै है, तौ बामै परमेसर को पियार कैसे बनो रैह सकै है? 18 हे बालकौ, हम बातौंई और मौह सै ना पर करम और सच्चाई के दुआरा पियार करैं। 19 इसई सै हम जानै हैं कै हम सच्चाई के हैं और हम अपने परमेसर के सामने अपने मन कै हौसला दे सकंगे, 20 जब्बी हमरो मन हमकै दोसी ठैराबै है; तब हम जानै हैं कै परमेसर हमरे मन सै बड़ो है, और बौ सब कुछ जानै है। 21 मेरे पियारे बालकौ, अगर हमरो मन हमकै दोस ना देए, तौ हमकै परमेसर के सामने खड़े होनै की हिम्मत मिलै है। 22 और हम उस्सै जो कुछ माँगै हैं, बौ हमकै देवै है, कैसेकै हम बाकी आगियाँऔ कै मानै हैं। और बौई करै हैं जो बाकै अच्छो लगै है। 23 और बाकी आगियाँ जौ है कै हम बाके लौंड़ा ईसु मसी के नाम मै बिसवास करैं और जैसी आगियाँ मसी नै हमकै दई है बैसेई हम एक दूसरे सै पियार रक्खैं। 24 जो परमेसर की आगियाँऔ कै मानै है, बौ परमेसर मै बनो रैहबै है और परमेसर बामै, और परमेसर नै हमकै पबित्तर आत्मा दई है, बाके दुआरा हम जानै हैं कै परमेसर हम्मै रैहबै है। |
New Life Compute Institute [NLCI] - CC BY-NC-ND 4.0