1 कुरन्थियों 9 - बुक्साभेजे भए चेलौ को हक 1 का मैं आजाद ना हौं? का मैं भेजो भओ चेला ना हौं? का मैंनै ईसु मसी कै देखो ना है, जो हमरो परभु है? का तुम मेरी मैहनत की बजै सै परभु मै ना आए हौ? 2 अगर मैं दूसरौं के ताँई भेजो भओ चेला ना हौं, तौ तुमरे ताँई तौ हौं। कैसेकै तुम मेरे सबूत हौ कै मैं परभु को चुनो भओ चेला हौं। 3 बे लोग जो मेरी बुराई करै हैं, उनके ताँई मेरो जौई जबाब है। 4 मेरे काम के ताँई मैंकै रोटी और पानी मिलनै को हक है। 5 मैंकै जौ हक है, कै मैं बिसवासी लौंड़िया के संग बिहा करकै बाकै अपने संग ले जांऔ जैसो कै दूसरे भेजे भए चेलौ नै और परभु के भईयौ और पतरस नै करो है। 6 का मैंकै और बरनबास कै जौ हक ना है कै जीनै के ताँई काम छोड़ दैं? 7 ऐंसो कौन आदमी है जो अपनोई खरचा करकै सैना की सेवा करै? और ऐंसो कौन होगो जो अंगूर को बगीचा लगाकै बी बाको फल ना खाऐ? और ऐंसो कौन है जो अपनी भेड़ौ की देखरेख करै, पर बाको दूद ना पिऐ? 8 का मैं जे बात सिरप आदमी के हिसाब सै बोल रओ हौं? नियम बी जौई बोलै है। 9 कैसेकै मूसा के नियम मै लिखो है, “फसल गाहते बखत बैल को मौह मत बांध।” का परमेसर सिरप बैलौई के बारे मै बता रओ है, 10 हाँ, जौ हमरे ताँई लिखो गओ है। कैसेकै फसल को हिस्सा पानै की उमीद सै जोतनै बारो जोतै, और दबानै बारो दबाऐं। 11 अगर हमनै तुमरे ताँई आत्मिक बीज बोए, तौ का जौ कोई बड़ी बात है, कै हमकै तुमरी चीजौ मै सै अपनी जरूरतौं की चीज तुमसै मिलै। 12 जब दूसरे लोग कुछ पानै को हक रक्खै हैं, तौ का हमरो हक उन लोगौ सै जादा ना है? फिर बी हमनै इस हक को फाएदा ना उठाओ। उल्टा, हम मसी की अच्छी खबर के परचार मै कोई रुकाबट ना डारै हैं। इसताँई हम हर तरै सै दुख सैहबैं हैं। 13 का तुम ना जानौ हौ? कै मन्दर मै काम कन्नै बारौं कै रोटी मन्दर मैई सै मिलै है। बेदी की सेवा कन्नै बारे बेदी के चढ़ाबे मै हिस्सेदार हैं। 14 इसई तरै सै परभु नै बी हुकम दओ है, कै जो लोग अच्छी खबर को परचार करैं हैं। बे बाई सेवा सै अपनो घर चलाऐ। 15 पर मैंनै इनमै सै किसी बी बात को सहारो ना लओ। जे सबई बात मैं इसताँई ना लिख रओ हौं कै जौ सब तुम मेरे ताँई करौ, कैसेकै इस्सै अच्छो तौ मेरो मर जानो सई है कै, कोई मेरे घमंड कै बेकार ठैराऐ। 16 अगर मैं जा अच्छी खबर कै सुनावौं हौं तौ जौ मेरे ताँई घमंड की बात ना है, कैसेकै जौ मेरो काम है जो परभु नै मैंकै दओ है, और अगर मैं अच्छी खबर कै ना सुनावौं हौं तौ मेरे ऊपर धिक्कार है। 17 अगर मैं जौ काम खुद की मरजी सै करौ हौं, तौ डिहाड़ी मैंकै मिलै है, पर अगर मैं खुद की मरजी सै ना करौ हौं। तौबी बौ काम तौ मैंकैई सौंपो गओ है। 18 तौ फिर मेरी डिहाड़ी किस चीज मै है? जामै है कै जब मैं किसी सै बिना कुछ लेए भए मसी की अच्छी खबर को परचार करौ हौं, और अच्छी खबर सुनानै मै जो कुछ मेरो पानै को हक है, बाको फाएदा मैं ना उठामौ हौं। 19 कैसेकै मैं किसी बी आदमी को बन्धुआ ना हौं, फिर बी मैंनै खुद कै सबई को गुलाम बना लओ है। जिस्सै कै मैं भौस्से लोगौ कै मसी के ताँई जीत सकौं। 20 मैं यहूदिऔं के ताँई यहूदी हाँई बनो जिस्सै कै उनकै जीत सकौं, और जो लोग मूसा के नियम मै बंधे भए हैं, उनके हाँई मैं बी बन गओ जिस्सै कै मैं उनकै जीत सकौं पर मैं खुद नियम मै ना बंधो हौं। 21 जिनके धौंरे यहूदिऔं के नियम ना है, उनकै मसी मै लानै के ताँई मैं बी उनके हाँई बन गओ, पर इसको मतलब जौ ना है कै मैं परमेसर के नियम सै आजाद हौं। बलकन मैं मसी के नियम सै बंधो भओ हौं। 22 और जो कमजोर हैं, उनके ताँई मैं कमजोर बनो कै मैं उनकै जीत सकौं। मैं सबके ताँई सबई कुछ बन गओ, जिस्सै कै मैं किसी ना किसी तरै सै कुछ लोगौ कै मुक्ति दिब्बा सकौं। 23 और जौ सबई कुछ मैं अच्छी खबर के ताँई कर रओ हौं, जिस्सै कै जाके आसीस मै मेरो बी कुछ हिस्सा हो। मसी दौड़ 24 का तुम लोग जौ ना जानौ हौ कै दौड़ मै तौ सबई भाजै हैं, पर ईनाम सिरप एकई आदमी कै मिलै है? तुम बी ऐंसे भाजौ कै जीत तुमरी हो। 25 खेल मै हिस्सा लैनै बारे खिलाड़ी अपने सरीर के ऊपर काबू करकै धियान सै खुद कै तईयार करै है। बौ बी ऐंसे ईनाम के ताँई जो जादा बखत के ताँई ना रैहबै है। पर हम ऐंसे ईनाम के ताँई करै हैं, जो हमेसा रैहबै है। 26 इसताँई मैं एक मकसद के ताँई भाजौ हौं। मैं बेकार मै हवा मै मुक्का ना चलावौ हौं। 27 पर मैं अपने सरीर कै मारपीट कै अपने काबू मै करौ हौं, कैसेकै कहीं ऐंसो ना हो जाऐ कै मैं औरौं कै परचार सुनाते सुनाते खुद निकम्मो बन जांऔ। |
New Life Compute Institute [NLCI] - CC BY-NC-ND 4.0