Taisbeanadh 12 - Tiomnadh Nuadh (MacEachen) 1875

XII. CAIB. Taisbeanadh a bhoirionnaich a bha air a h-eideadh leis a ghrein, ʼs an dreagoin mhoir a bha dianamh geur-leanmhuinn oirre.

¹ Us chunnacas comharradh mor air neamh: Boirionnach air a h-eideadh leis a ghrein, ʼsa ghealach fo a casan, agus crùn de dhà reil dhiag air a ceann.

² Agus bha i glaodh, ʼs i lethtromach, ri saothair-chloinne, agus bha i ann an cràdh gu bhith air a h-aisead.

³ Agus chunnacas comharradh eile air neamh: us seall dreagon mor dearg, aig an robh seachd cinn, us deich adhaircean; agus air a chinn seachd crùintean;

⁴ Agus tharruinn ʼearball leis an treas cuid de reultan neamh, us thilg e air an talamh iad; us sheas an dreagon air bialaobh a bhoirionnaich a bha ri h-aisead, los, nuair a bheireadh i, gun slugadh e suas a mac.

⁵ Us rug i leanabh gille, a bha gu riaghladh nan uile chinneach le slait iaruinn; agus ghlacadh a mac suas gu Dia, ʼs gu chathair,

⁶ ʼS theich am boirionnach do ʼn fhàsach, far na dheasaicheadh aite dhi le Dia, gus iad ga beathachadh mile dà chiad ʼs tri fichead latha.

⁷ Agus bha cath mor air neamh: chath Micheil us ʼainglean ris an dreagon, agus chath an dreagon agus ʼainglean;

⁸ ʼS cha deach e leo, ʼs cha mhua fhuaradh an aite tuilleadh air neamh.

⁹ Agus thilgeadh a mach an dreagon mor sin, an t-seann nathair, ris an abrar an deomhan us satan, a tha mealladh an t-saoghail uile; ʼs chaidh a thilgeil gu talamh, agus chuireadh sios a chuid ainglean comhla ris.

¹⁰ Us chuala mi guth ard air neamh, a g-radh: A nis thainig sabhaladh, us neart, us rioghachd ar De-ne, agus cumhachd a Chriost-san: a chionn gun do thilgeadh a mach fear-casaid ar braithrean, a bha dianamh casaid orra a latha ʼsa dhʼ oidhche an lathair ar De-ne.

¹¹ Agus bhuadhaich iad air tromh fhuil an Uain, ʼs tromh fhacal an teisteanais, ʼs cha tug iad gaol dha ʼm beatha gu ruig am bàs.

¹² Biodh aoibhneas ort ma ta, a neamh, us oirbhse a tha tamh air. Mo thruaighe an talamh ʼsa mhuir: a chionn gun tainig an deomhan a nuas oirbh, agus mor fhearg air, us fios aige nach eil ach ùine ghoirid aige.

¹³ ʼS nuair a chunnaic an dreagon gun do thilgeadh gu talamh e, rinn e geur-leanmhuinn air a bhoirionnach, a rug an leanabh gille;

¹⁴ ʼS thugadh do ʼn bhoirionnach dà sgéith iolaire mòire, gus i dhʼ fhalbh air iteig do ʼn fhasach gu h-aite fhein, far am beathaichear i car time, agus tìmean, agus leth thìme, bho aodann na nathrach.

¹⁵ Agus thaom an nathair as a bial uisge, mar abhuinn, an deigh a bhoirionnaich, gu toirt oirre a bhith air a giulan air falbh leis an abhuinn.

¹⁶ ʼS chuidich an talamh leis a bhoirionnach, us dhʼ fhosgail an talamh a bhial, agus thraogh e an abhuinn, a thaom an dreagon as a bhial.

¹⁷ ʼS ghabh an dreagon fearg ris a bhoirionnach; agus dhʼ fhalbh e a chur catha ris a chuid eile dhe siol, a tha cumail faintean Dhe, ʼs aig a bheil teisteanas Iosa Criosta.

¹⁸ Agus sheas e air gainmheach na mara.