Seumas 3 - Tiomnadh Nuadh (MacEachen) 1875

III. CAIB. Air uilc na teanga: an diubhras a tha eadar gliocas talmhaidh agus gliocas neamhaidh.

¹ Na bithibh, mo bhraithrean, ʼnur moran mhaighistirean, le fios gum faigh sibh breitheanas nas mua.

² Oir tha sinn uile ciontach an iomadh nì. Mur eil duine ciontach ann am facal, tha e ʼna dhuine coimhlionta; tha e comasach air strian a chur ri chorp uile.

³ Oir fiach tha sinn a cur chabstairean am bial nan each, gus iad a bhith umhailt dhuinn, us tionndaidh sinn mun cuairt an corp uile.

⁴ Seall longan, ged is mor iad, agus air an greasad le gaoithean laidir, a dhʼ aindeoin sin bheirear mun cuairt iad le stiuir bhig, taobh air bith a dhʼ iarras beum an stiuradair.

⁵ Mar sin is ball beag gu dearbh an teanga, us ni i raiteachas mor. Seall nach crion an teine, ʼs nach mor a choille a lasas e!

⁶ Agus is teine an teanga, saoghal de dhʼ olc. Tha an teanga air a suidheachadh am measg ar ball, a truailleadh na coluinne uile, ʼsa lasadh cuairt ar beatha, ʼs i fhein laiste bho iutharna.

⁷ Tha h-uile gné ainmhidhean, us ian, us nathraichean, ʼs de sheorsa eile, air an dianamh soitheamh, ʼs cheannsaicheadh iad le nadur an duine:

⁸ Ach cha n-eil duine idir a ʼs urrainn an teanga cheannsachadh; is olc luasganach i, lan de phuinsean marbhtach.

⁹ Leatha tha sinn a beannachadh Dhe agus an Athar; us leatha tha sinn a mollachadh dhaoine, a tha air an dianamh ri iomhaigh Dhe.

¹⁰ As an aon bhial tha beannachadh agus mollachadh a tighinn. Mo bhraithrean, cha chòir do na nichean so bhith mar so.

¹¹ An cuir tobar a mach as an aon suil uisge milis, agus uisge searbh?

¹² An urrainn do chraoibh-fhige dearcan-fiona thoirt a mach, mo bhraithrean, no do ʼn fhionain fioguisean? Cha mhua is urrainn do shàile uisge milis a thoirt bhuaithe.

¹³ Co tha ʼna dhuine glic ʼs air fhaghlum ʼnur measg? Fiachadh e le deagh ghiulan ʼobair fhein ann an ciuine a ghliocais.

¹⁴ Ach ma tha eud searbh agaibh, us conas ʼnur cridheachan, na dianaibh uaill, ʼs na bithibh ʼnur briagadairean an aghaidh na firinne:

¹⁵ Oir cha so gliocas, a tha tighinn bho na h-ardaibh, ach gliocas talmhaidh, colaidh, diabhluidh.

¹⁶ Oir far a bheil farmad us consachadh, an sin tha iomluas, agus a h-uile droch ghniomh.

¹⁷ Ach an gliocas a tha bho na h-ardaibh, an toiseach gu dearbh tha e geamnaidh, an sin sitheil, stuama, furasd a chomhairleachadh, aontachail do mhath, lan de dhʼ iochd ʼs de dheagh thoradh, gun a bhith toirt breth, gun cheilg.

¹⁸ Us tha toradh a cheartais air a chur ann an sith do luchd-dianamh na sithe.