Seumas 2 - Tiomnadh Nuadh (MacEachen) 1875

II CAIB. An aghaidh eisimeil ri daoine: cunnart aon phong de ʼn lagh a bhristeadh: tha creideamh gun oibrichean marbh.

¹ Mo bhraithrean, na biodh creideamh Iosa Criosta Tighearna na glorach agaibh maille ri eisimeil ri daoine.

² Oir ma thig fear air a bheil fàinne òir agus aodach riomhach a stigh ʼnur co-thional, ʼs mar an ciadna gun tig duine bochd a stigh an earradh suarach,

³ Agus gun toir sibh aire dhasan, a tha an eideadh riomhach, agus gun abair sibh ris: Suidh thusʼ an so gu math; ach gun abair sibh ris an duine bhochd: Seas thusʼ an sid, no suidh fo stol mo chas:

⁴ Nach eil sibh a toirt breth unnaibh fhein, agus gu ʼr dianamh nur britheamhan air smaointean anacearta?

⁵ Eisdibh, mo bhraithrean ro ghradhach, nach do thagh Dia bochdan an t-saoghail so gu bhith beairteach an creideamh, ʼs ʼnan oighreachan air an rioghachd, a gheall Dia dhaibh-san a bheir gaol da?

⁶ Ach thug sibhse taire do ʼn duine bhochd. Nach eil na daoine beairteach gu ʼr sarachadh le ainneart, ʼs nach eil iad gu ʼr tarruinn gu caithrichean breitheanais?

⁷ Nach eil iad a toirt toibheum do ʼn ainm mhath, a ghairmeadh oirbh?

⁸ Ma tha sibh coimhlionadh ma ta an lagha rioghail a reir nan Sgriobtur: Bheir thu gaol dha dʼ choimhearsnach mar dhut fhein, is math a tha sibh a dianamh:

⁹ Ach ma tha sibh a dianamh leth-bhreth air daoine, tha sibh a peacachadh, le bhith air ur diteadh leis an lagh mar pheacaich:

¹⁰ Oir co air bith a chumas an lagh uile, ach gun tuislich e ann an aon phuing, tha e ciontach an aghaidh an lagh uile.

¹¹ Oir esan a thuirt: Na dian adhaltras, thuirt e cuideachd: Na dian marbhadh. A nis mur dian thu adhaltras, ach gun dian thu marbhadh, tha thu na dʼ fhear-bristeadh an lagha.

¹² Mar so labhraibh, agus mar so dianaibh, mar dhaoine air am beil breth ri thoirt le lagh na saorsa.

¹³ Oir tha breitheanas gun trocair dhasan, nach dʼ rinn trocair: ʼs tha trocair ga h-ardachadh fhein fos cionn breitheanais.

¹⁴ Ciod an stà a ni e, mo bhraithrean, ma their neach gum beil creideamh aige, ach e gun oibrichean? An urrainn creideamh a shabhaladh?

¹⁵ Agus ma tha brathair no piuthar ruisgte, ʼs gun bhiadh lathail,

¹⁶ ʼS gun abair a h-aon agaibhse riu: Falbhaibh an sith, bithibh air ur garadh ʼs air ur sàsuchadh: ʼs nach toir sibh dhaibh na tha feumail do ʼn choluinn, ciod am feum a ni e?

¹⁷ Is amhuil sin creideamh, mur eil oibrichean aige, tha e marbh ann fhein.

¹⁸ Ach their cuid: Tha creideamh agadsa, agus tha oibrichean agamsa: fiach dhomh do chreideamh gun oibrichean; us fiachaidh mise dhutsa mo chreideamh le oibrichean.

¹⁹ Tha thusa creidsinn gum beil aon Dia ann: Is math a tha thu a dianamh: tha na deomhain a creidsinn, agus a crith.

²⁰ Ach am math leat fios a bhith agad, O dhuine fhaoin, gum beil creideamh marbh gun oibrichean?

²¹ Ar n-athair Abraham nach bʼ ann le oibrichean a naomhaicheadh e, a tairgse suas Isaic, a mhac, air an altair?

²² Am beil thu faicinn gun do chomh-oibrich creideamh le ʼoibrichean; ʼs le oibrichean rinneadh creideamh coimhlionta?

²³ Us choimhlionadh an sgriobtur, a g-radh: Chreid Abraham Dia; us mheasadh dha e gu ceartas, agus thuirteadh caraid Dhe ris.

²⁴ Nach eil sibh a faicinn gur ann le oibrichean a tha duine air a naomhachadh, agus nach ann le creideamh a mhain?

²⁵ Mar an ciadna Rahab an striopach, nach ann le oibrichean a naomhaicheadh i, a gabhail ris na teachdairean, ʼs gan cur air falbh rathad eile?

²⁶ Oir mar a tha a choluinn marbh gun an spiorad, is amhuil a tha creideamh marbh gun oibrichean.