Philipianach 2 - Tiomnadh Nuadh (MacEachen) 1875

II. CAIB. Tha e gam brosnachadh gu aontachd agus irioslachd, agus an sabhaladh oibreachadh le fiamh ʼs ball-chrith.

¹ Uime sin ma tha dad a dhʼ fhurtachd ann an Criosta, ma tha dad de chobhair carrantachd, ma tha dad de chomunn an spioraid, ma tha dad de dhʼ innibh truais:

² Lionaibh suas mʼ aighear le sibh a bhith a dhʼ aon inntinn, an aon charrantachd agaibh, an t-aon bheachd, an t-aon aigne;

³ Gun ni dhianamh tromh chomhstri no fhaoin ghloir: ach ann an irioslachd gach aon a meas chàich nas fhearr na e fhein;

⁴ Gach aon a sealltuinn, cha n-ann air na nichean is leis fhein, ach is le daoine eile.

⁵ Oir biodh am beachd so unnaibh, a bha cuideachd ann an Iosa Criosta:

⁶ Esan, ʼs e an cruth Dhe, nach do shaoil e ʼna reubainn a bhith co-ionann ri Dia:

⁷ Ach rinn e e fhein ʼna neoni, a gabhail riochd seirbhisich, diante an coltas dhaoine, ʼs air fhaighinn ann an cruth mar dhuine.

⁸ Dhʼ islich e e fhein a striochdadh gu h-iriosal gu bàs, seadh gu bàs na croise.

⁹ Agus air son so thog Dia suas e, ʼs thug e dha ainm, a tha fos cionn a h-uile ainm,

¹⁰ ʼS gun lub ann an ainm Iosa a h-uile glun dhiusan, a tha air neamh, air talamh, ʼs fo ʼn talamh,

¹¹ Agus gun aidich a h-uile teanga, gum beil an Tighearna Iosa Criosta ann an gloir Dhe an t-Athair.

¹² Uime sin, a mhuinntir mo mhor ghraidh (mar a bha sibh umhailt riamh), cha n-ann a mhain ʼs mi san lathair, ach moran nas mua nis ʼs mi as an lathair, oibrichibh ur sabhaladh le fiamh ʼs le ball-chrith.

¹³ Oir se Dia, a tha g-oibreachadh unnaibh an toil mar-aon ʼs an gniomh, a reir a dheagh thoil fhein.

¹⁴ Dianaibh ma ta a h-uile ni gun ghearan ʼs gun ag:

¹⁵ Los gum bi sibh neo-chiontach, ʼs ʼnur cloinn aon-fhillte do Dhia, gun chron am miadhon sluaigh, a tha coirbte agus fiar, sibhse a tha soillseachadh ʼnam measg mar sholus an t-saoghail,

¹⁶ A gleidheadh facal na beatha gu mo ghloir-sa ann an latha Chriosta, a chionn nach do ruith mi gun fheum, ʼs nach dʼ oibrich mi gun fheum,

¹⁷ Seadh agus ma dhʼ iobrar mi air iobairt us seirbhis ur creidimh-sa, bithidh aoibhneas orm, us ni mi co-aighear maille ribh uile.

¹⁸ Agus air son an ni chiadna biodh aoibhneas oirbhse cuideachd, ʼs dianaibh aighear comhla riumsa.

¹⁹ Agus tha mi an dochas anns an Tighearna Iosa, gun cuir mi Timoti gu h-aithghearr gu ʼr n-ionnsuidh; los gum bi mise cuideachd ann an deagh ghean, nuair gheobh mi fios ciod is cor dhuibhse.

²⁰ Oir cha n-eil duine agam cho aon-inntinneach, aig a bheil ro-churam dhibhse le fior ghradh.

²¹ Oir tha iad uile g-iarraidh nan nichean is leo fhein, cha n-iad nan nichean is le Iosa Criosta.

²² Agus tuigibh dearbhadh air, chionn, mar mhac dha ʼathair, rinn esan seirbhis maille riumsa san t-soisgeul.

²³ Tha mi an dochas ma ta esan a chur gu ʼr n-ionnsuidh, cho luath ʼsa chi mi ciod a dhʼ eirgheas dhomh.

²⁴ ʼS tha mi g-earbsa anns an Tighearna, gun tig mi fhein gu h-athghoirid gu ʼr n-ionnsuidh.

²⁵ Ach chunnaic mi iomchuidh Epaphroditus, mo bhrathair, mo cho-oibriche, ʼs mo cho-shaighdear, agus ur n-ostal-sa, agus fear-frithealaidh mʼ uireasuidh, a chur gu ʼr n-ionnsuidh:

²⁶ Oir gu dearbh bha e fad an deidh oirbh uile; ʼs bha duilichinn air, a chionn gun cuala sibh gun robh e tinn.

²⁷ Oir gu fior bha e tinn ʼs ri uchd a bhàis: ach rinn Dia iochd ris: ʼs cha n-ann ris-san a mhain, ach riumsa cuideachd, eagal bròn air muin bròin a thighinn orm.

²⁸ As leth so chuir mi air adhart e na bu luaithe, gu aighear a bhith oirbh ri fhaicinn a rithist, ʼs gus mise bhith gun mhulad.

²⁹ Gabhaibh ris ma ta leis a h-uile aighear anns an Tighearna, ʼs biodh a leithid ann an urram agaibh:

³⁰ A thaobh gur h-ann as leth obair Chriosta a thainig e gu uchd a bhàis, a toirt seachad a bheatha, los na bha dhith air ur dleasnas domhsʼ a choimhlionadh.