Mata 26 - Tiomnadh Nuadh (MacEachen) 1875

XXVI. CAIB. Ceannairc nan Iudhach an aghaidh Chriosta: e air ungadh le Mairi; air a bhrath le Iudas: an t-suipeir dheirionnach: urnaigh Chriosta sa gharadh: ar Tighearn air a ghlacadh: e faighinn taire an tigh Chaiphais.

¹ Agus thachair nuair chuir Iosa crioch air na briathran so uile, gun tuirt e ri dheisciopuil:

² Is aithne dhuibh gum bi a chàisg ann as deigh dà latha, agus liubhrar seachad Mac an duine gus a cheusadh.

³ An sin chruinnich na h-ard-shagairt, agus seanairean an t-sluaigh an cùirt an ard-shagairt, dhaʼm bʼainm Caiphas:

⁴ Us chuir iad an comhairle ri cheile, Iosa a ghlacadh le foill, ʼsa chur gu bàs.

⁵ Ach thuirt iad: Cha n-ann air latha na feille, eagal gum faod buaireadh eirigh am measg an t-sluaigh.

⁶ Agus nuair bha Iosa am Bethania an tigh Shimoin an lobhar,

⁷ Thainig boirionnach ga ionnsuidh, aig an robh bocsa alabastair de dhʼ ola phriseil, us dhoirt i air a cheann i, agus e aig biadh.

⁸ Agus na deisciopuil a faicinn so, bha iad diumbach, a g-radh: Car-son an t-ana-caitheamh so?

⁹ Oir dhʼfhaoidte so a reic air mhoran, ʼsa thoirt do na bochdan.

¹⁰ Agus Iosa a tuigsinn so, thuirt e riu: Car-son a tha sibh cur dragh air a bhoirionnach so? oir rinn i gniomh math dhomhsa:

¹¹ Oir tha na bochdan agaibh an comhnuidh, ach cha n-eil mise agaibh an comhnuidh.

¹² Oir le ise an ola so dhortadh air mo chorp, ʼsann mu choinneamh mʼ adhlaic, a rinn i e.

¹³ Gu deimhinn tha mi a g-radh ribh: Ge bʼe air bith aite anns am bi an soisgeul so air a shearmonachadh feadh an t-saoghail gu leir, gum bi iomradh air na rinn i so mar chuimhne oirre.

¹⁴ An sin chaidh fear deʼn dà-fhear-dhiag, dhaʼm bʼainm Iudas Iscariot, thun nan ard-shagart:

¹⁵ Agus thuirt e riu: Dé bheir sibh dhomhsa, agus liubhraidh mi dhuibh e? Us chord iad ris air son deich buinn fhichead airgid.

¹⁶ ʼS bho sin suas bha e sireadh cothroim air a bhrath.

¹⁷ ʼS air a chiad latha deʼn aran neo-ghoirtichte, thainig na deisciopuil gu Iosa, a g-radh: Càit am math leat gun deasaich sinn dhut gus a chàisg icheadh?

¹⁸ Ach thuirt Iosa: Theirigibh a stigh doʼn bhaile gu duine araid, agus abraibh ris: Tha ʼm Maighistir a g-radh: Tha mʼ àm faisg, cumaidh mi a chàisg agadsa maille ri mʼ dheisciopuil.

¹⁹ Agus rinn na deisciopuil mar a dhʼorduich Iosa dhaibh, us dheasaich iad a chàisg.

²⁰ ʼS air doʼn fheasgar a thighinn, shuidh e sios comhla ri dhà dheisciopul dhiag.

²¹ ʼS nuair a bha iad a g-ithe, thuirt e: Gu deimhinn tha mi g-radh ribh, gum brath h-aon agaibh mi.

²² Agus bha duilichinn mhor orra, agus thòisich gach aon ri radh: Am mise e, a Thighearna?

²³ Ach a freagairt thuirt esan: Am fear a tha tumadh a laimh sa mheis comhla rium, se bhrathas mi.

²⁴ Tha Mac an duine ga rireamh a falbh, mar a tha e sgribhte uime: ach mo thruaighe an duine sin leis am brathar Mac an duine: bu mhath doʼn duine sin nach beirteadh e.

²⁵ An sin fhreagair Iudas, a bhrath e, us thuirt e: Am mise e, Rabbi? Ars esan ris: thuirt thu e.

²⁶ ʼS air dhaibh a bhith ri ʼn suipeir, ghlac Iosa aran, agus bheannaich e, agus bhrist e, agus thug e dha dheisciopuil, us thuirt e: Gabhaibh, agus ithibh: se so mo chorpsa.

²⁷ ʼSa glacadh na cailis, thug e taing, us thug e dhaibh, a g-radh: Olaibh uile dhe so.

²⁸ Oir si so mʼfhuilse an tiomnaidh nuaidh, a dhoirtear air son morain gu mathanas pheacannan.

²⁹ Oir tha mi g-radh ribh: cha n-ol mi á so suas de thoradh so na fionain, gus an latha sin air an ol mi ùr e maille ribh ann an rioghachd mʼAthar.

³⁰ ʼS an deigh laoidh a ghabhail, chaidh iad a mach gu sliabh Olibheit.

³¹ An sin thuirt Iosa riu: Air an oidhche nochd gabhaidh sibh uile sgainneal asamsa. Oir tha e sgribhte: Buailidh mi am buachaille, agus sgapar caoraich na treuda.

³² Ach an deigh dhomh eirigh a rithist, theid mi roimhibh do Ghalile.

³³ Agus Peadar a freagairt thuirt e ris: Ged a ghabhadh iad uile sgainneal asad, cha ghabh mise a chaoidh sgainneal asad.

³⁴ Thuirt Iosa ris: Gu deimhinn tha mi g-radh riut, air an oidhche so fhein mun goir an coileach, guʼn aicheadh thu mi tri uairean.

³⁵ Thuirt Peadar ris: Ged a bʼfheudar dhomh bàsachadh comhla riut, cha n-aicheadh mi thu. ʼS an ni ciadna thuirt na deisciopuil uile.

³⁶ An sin thainig Iosa leo gu baile dùcha ris an canar Gethsemani, us thuirt e ri dheisciopuil: Suidhibhse an so, gus an teid mi ʼn sid, ʼs an dian mi urnaigh.

³⁷ ʼSa toirt leis Pheadair, agus dà mhac Shebede, thainig bròn us mulad air.

³⁸ An sin thuirt e riu: Tha mʼanam brònach eadhon gu bàs: fanaibh an so, agus dianaibh faire maille rium.

³⁹ ʼSa dol ceum air adhart, thuit e air aghaidh a g-urnaigh ʼsa g-radh: Mʼ Athair, ma ghabhas e dianamh, rachadh a chailis so seachad orm: ach co dhiu, cha n-ann mar is aill leamsa, ach mar is aill leatsa.

⁴⁰ Agus thainig e dhʼionnsuidh a dheisciopul, us fhuair e ʼnan cadal iad, us thuirt e ri Peadar: Ciod e so? an e nach bʼurrainn duibh aon uair a chaithris maille rium?

⁴¹ Dianaibh faire agus urnaigh, gus nach tuit sibh ann am buaireadh. Tha an spiorad gu dearbh toileach, ach tha ʼn fheoil lag.

⁴² Dhʼfhalbh e rithist an darna uair, agus rinn e urnaigh, a g-radh: Mʼ Athair, mur gabh a chailis so cur seachad orm gun a h-ol, biodh do thoilse diante.

⁴³ Agus thainig e rithist, us fhuair e ʼnan cadal iad: oir bha an suilean trom.

⁴⁴ Agus gam fagail, dhʼ fhalbh e rithist, agus rinn e urnaigh an treas uair, a g-radh nam briathran ciadna.

⁴⁵ An sin thainig e gu dheisciopuil, us thuirt e riu: Caidlibh a nis, agus gabhaibh fois: seall, tha ʼn uair air teannadh, agus brathar Mac an duine do lamhan pheacach.

⁴⁶ Eiribh, siubhlamaid; seall, tha ʼm fear a bhrathas mi aig laimh.

⁴⁷ Nuair a bha e fhathast a labhairt, seall, thainig Iudas, a h-aon deʼn dà-fhear-dhiag, agus buidheann mhor cuide ris, le claidhean, ʼs le bataichean, air an cur bho na h-ard-shagairt ʼs bho sheanairean an t-sluaigh.

⁴⁸ A nis thug esan, a bhrath e, comharradh dhaibh, a g-radh: Ge bʼ e dhaʼn toir mise pog, se sin e, dianaibh greim air.

⁴⁹ Agus ghrad-thainig e gu Iosa, us thuirt e: Fàilt dhut, a Rabbi. Agus thug e pog dha.

⁵⁰ Us thuirt Iosa ris: A charaid, ciod uige a thainig thu? An sin thainig iad air an adhart, agus chuir iad lamh an Iosa, agus ghlac iad e.

⁵¹ Agus, seall, shìn fear de ʼn fheadhainn a bha maille ri Iosa a lamh, tharruinn e chlaidheamh, ʼsa bualadh seirbheiseach an ard-shagairt ghearr e a chluas dheth.

⁵² An sin thuirt Iosa ris: Cuir air ais do chlaidheamh gu aite fhein: oir iadsan uile a ghlacas an claidheamh, theid iad a dhith leis a chlaidheamh.

⁵³ Am beil thu an duil nach eil e am chomas iarraidh air mʼ Athair, agus bheir e dhomh san uair tuilleadh us dà legion dhiag aingeal?

⁵⁴ Ciamar ma ta bhiodh na sgriobturan air an coimhlionadh, gum feum e bhith mar so?

⁵⁵ ʼS an uair sin fhein thuirt Iosa ris a bhuidhinn: Thainig sibh a mach le claidhean, ʼs le bataichean gu mise ghlacail, mar gum bʼ fhear-reubuinn mi: bha mi na mʼ shuidhe gach latha san teampull maille ribh a teagasg, agus cha do chuir sibh an laimh mi.

⁵⁶ Ach thachair so uile chum gun coimhlionteadh sgriobturan nam faidhean. An sin dhʼfhag na deisciopuil uile e, agus theich iad.

⁵⁷ Ach chum iad greim air Iosa, ʼs thug iad leo e ga Caiphas an t-ard-shagart, far an robh na Sgriobhaich ʼs na seanairean air tional.

⁵⁸ Us lean Peadar e fad as gu ruig cùirt an ard-shagairt. Agus chaidh e stigh, agus shuidh e comhla ris na seirbhisich, a dhʼfhaicinn na crìche.

⁵⁹ Ach dhʼiarr na h-ard-shagairt, ʼsa chomhairle uile fianuis-bhreige an aghaidh Iosa gtis a chur gu bàs:

⁶⁰ ʼS cha dʼfhuair iad sin, ged thainig moran de fhianuisean-breige a stigh. Mu dheireadh thainig dà fhianuis-bhreige,

⁶¹ Agus thuirt iad: Thuirt an duine so: Is urrainn domh teampull De a leagail, ʼsa thogail a rithist an ceann thri latha.

⁶² ʼS an t-ard-shagart a g-eirigh, thuirt e ris: Nach toir thu freagairt sa bith air na nichean, a tha iad so toirt mar fhianuis ad aghaidh?

⁶³ Ach dhʼfhan Iosa ʼna thosd. Agus thuirt an t-ard-shagart ris: Guidheam ort air an Dia bheo, gun innis thu dhuinn, ma ʼs tu Criosta Mac De.

⁶⁴ Ars Iosa ris: Thuirt thu e: ach tha mi g-radh ribh: gum faic sibh an deigh so Mac an duine ʼna shuidhe air laimh dheis cumhachd Dhe, ʼsa tighinn ann an neoil nan speur.

⁶⁵ An sin sthrachd an t-ard-shagart aodach, a g-radh: Labhair e blaisbheurn: ciod an tuilleadh feum thʼ againn air fianuisean? Seall, chual sibh a nis am blaisbheum:

⁶⁶ Dé ur barail? Ach fhreagair iadsan, us thuirt iad: Tha e toillteanach air bàs.

⁶⁷ An sin chaith iad smugaidean ʼna aodann, us bhuail iad le ʼn duirn e, agus bhuail feadhainn eile le ʼm basan e san aodann,

⁶⁸ A g-radh: Faisnich dhuinn, a Chriosta, co bhuail thu?

⁶⁹ Ach bha Peadar ʼna shuidhe air taobh-mach na cùirte; agus thainig searbhanta ga ionnsuidh, a g-radh: Bha thusa comhla ri Iosa bho Ghalile.

⁷⁰ Ach dhʼaicheadh esan ʼnan lathair uile, a g-radh: Cha n-eil fhios agam ciod a tha thu a cantuinn.

⁷¹ ʼS e dol a mach air a gheata, chunnaic searbhanta eile e, us thuirt i ris an fheadhainn a bha ʼn sin: Bha ʼm fear so comhla ri Iosa bho Nasareth.

⁷² ʼSa rithist dhʼaicheadh esan le mionn: Cha n-aithne dhomh an duine.

⁷³ ʼS an ceann tacain thainig iadsan, a bha ʼnan seasamh, us thuirt iad ri Peadar: Gu cinnteach ʼsann dhiu thusa: oir tha do chainnt fhein ga dʼ dhianamh follaiseach.

⁷⁴ An sin thòisich e ri mollachadh ʼs ri mionnachadh, nach bʼaithne dha an duine. Agus anns a cheart uair ghoir an coileach.

⁷⁵ Agus chuimhnich Peadar facal Iosa, a thuirt e: Mun goir an coileach, aicheadhaidh tu mi tri uairean. ʼSa dol a mach, ghuil e gu goirt.