Mata 22 - Tiomnadh Nuadh (MacEachen) 1875

XXII. CAIB. Dubhfhacal cuilm na bainnse; Criosta g-orduchadh cis a thoirt do Chesar; a cur nan Sadusach ʼs nam Phairiseach ʼnan tosd; a fiachuinn ciod i chiad fhainte san lagh.

¹ Agus fhreagair Iosa, us labhair e riu rithist ann an dubhfhacail, a g-radh:

² Tha rioghachd fhlathanais coltach ri righ, a rinn banais dha mhac.

³ Agus chuir e sheirbhisich a ghairm na feadhnach a fhuair cuireadh thun na bainnse, ʼs cha bʼaill leo tighinn.

⁴ A rithist chuir e seirbhisich eile, a g-radh: Abraibh riusan a fhuair cuireadh: Seall, dheasaich mi mo dhinneir, tha mo dhaimh ʼs mo spreidh bhiadhte air am marbhadh, agus tha gach ni reidh; thigibh thun na bainnse.

⁵ Ach chuir iadsan suarach a ghairm; us dhʼfhalbh iad, fear gu thuathanas, agus fear eile gu mharsantachd.

⁶ Agus rug a chuid eile dhiu air a sheirbhisich, ʼs an deigh taire a thoirt daibh, mharbh iad iad.

⁷ Ach nuair a chual an righ so, ghabh e fearg: ʼsa cur bhuaithe armailtean sgrios e na murtairean sin, agus loisg e am baile aca.

⁸ An sin thuirt e ri sheirbhisich: Tha bhanais gu dearbh deas, ach cha bʼairidh iadsan, a bhʼ air an cuireadh.

⁹ Rachaibh ma ta thun nan rathaidean mora, agus a mhiad ʼsa gheobh sibh, gairmibh iad thun na bainnse.

¹⁰ Agus na seirbhisich a gabhail a mach gus na rathaidean mora, chruinnich iad a h-uile h-aon a fhuair iad, eadar olc us mhath, agus lionadh tigh-na-bainnse le aoidhean.

¹¹ Agus chaidh an righ a stigh a dhʼfhaicinn nan aoidhean, agus chunnaic e fear an sin air nach robh eideadh bainnse.

¹² Us thuirt e ris: A charaid, ciamar thainig thu stigh an so gun eideadh bainnse ort? Ach dhʼfhan esan ʼna thosd.

¹³ An sin thuirt an righ ris an luchd-fhrithealaidh: Ceanglaibh a lamhan ʼs a chasan, agus tilgibh e an dorchadas iomallach: an sin bithidh gal agus giosgan fhiacal.

¹⁴ Oir tha moran air an gairm, ach beagan air an taghadh.

¹⁵ An sin dhʼfhalbh na Phairisich, us chuir iad an comhairle ri cheile, fiach an glacadh iad e ʼna bhriathran.

¹⁶ Agus chuir iad ga ionnsuidh an deisciopuil fhein comhla ri luchd-leanmhuinn Heroid, a g-radh: A Mhaighistir, tha fios againn gur duine firinneach thu, ʼs gum beil thu teagasg slighe Dhe ann am firinn, ʼs nach eil eisimeil agad ri duine air bith; oir cha n-eil thu sealltuinn air pearsa dhaoine.

¹⁷ Innis ma ta do bheachd dhuinn, am beil e ceadaichte cis a thoirt do Cheasar, no nach eil?

¹⁸ Ach Iosa a tuigsinn am mi-ruin, thuirt e riu: Car-son a tha sibh gam bhuaireadh, a chealgairean?

¹⁹ Fiachaibh dhomh bonn na cìse. Agus dhʼfhiach iad dha sgilinn.

²⁰ Us thuirt Iosa riu: Co leis an iomhaigh agus an sgriobhadh mun cuairt di?

²¹ Thuirt iad ris: Le Ceasar. An sin thuirt e riu: Thugaibh ma ta do Cheasar na bhuineas do Cheasar, agus do Dhia na bhuineas do Dhia.

²² ʼSa cluinntinn so, ghabh iad iongantas, agus ga fhagail, shiubhail iad.

²³ Air an latha sin fhein thainig na Sadusaich, a tha cantuinn nach eil aiseirigh ann, ga ionnsuidh, agus dhʼ fhaighnich iad dheth,

²⁴ A g-radh: A Mhaighistir, thuirt Maois; Ma gheobh duine bàs gun chloinn aige, posadh a bhrathair a bhean aige, agus togadh e sliochd dha bhrathair.

²⁵ A nis bha seachdnar bhraithrean ʼnar measg-ne; agus chaochail a chiad fhear an deigh dha bean a phosadh; ʼs bho nach robh sliochd aige, dhʼfhag e a bhean dha bhrathair.

²⁶ Agus thachair an ni ciadna doʼn darna, ʼs doʼn treas fear, gu ruig an seachdamh fear.

²⁷ Agus mu dheireadh uile fhuair a bhean bàs cuideachd.

²⁸ Anns an aiseirigh ma ta co am fear deʼn t-seachdnar aig am bi i ʼna mnaoi? oir bha i na mnaoi aca uile.

²⁹ Ach Iosa a freagairt, thuirt e riu: Tha sibh am mearachd le cion eolais air na sgriobturan, ʼs air cumhachd Dhe.

³⁰ Oir anns an aiseirigh cha phos iad, cha mhua phosar iad: ach bithidh iad mar ainglean Dhe air neamh.

³¹ Ach mu dheidhinn aiseirigh nam marbh, nach do leugh sibh mar thuirt Dia, ʼs e labhairt ribh:

³² Is mise Dia Abrahaim, agus Dia Isaic, agus Dia Iacoib? Cha n-e Dia nam marbh e, ach nam beo.

³³ Agus an sluagh a cluinntinn so, ghabh iad ioghnadh ri theagasg.

³⁴ Ach nuair a chuala na Phairisich gun do chuir e na Sadusaich ʼnan tosd, thionail iad ri cheile;

³⁵ Us dhʼfharraid fear dhiu, ollamh san lagh, dheth, ga bhuaireadh:

³⁶ A Mhaighistir, co i an fhainte is mua san lagh?

³⁷ Thuirt Iosa ris: Bheir thu gaol doʼn Tighearna do Dhia le tʼ uile chridhe, le tʼ uile anam, ʼs le tʼ uile inntinn.

³⁸ Si so an fhainte is mua agus a chiad fhainte.

³⁹ Agus tha ʼn darna fainte coltach rithe: Bheir thu gaol dha do choimhearsnach mar dhut fhein.

⁴⁰ Ris an dà fhainte so tha an lagh uile agus na faidhean an crochadh.

⁴¹ Agus nuair bha na Phairisich cruinn, dhʼfhaighnich Iosa dhiu,

⁴² A g-radh: Ciod e ur barail-se mu Chriosta? Co dha is mac e? Thuirt iad: Do Dhài.

⁴³ Thuirt e riu: Ciamar ma seadh tha Dài san Spiorad a cantuinn a Thighearna ris, a g-radh:

⁴⁴ Thuirt an Tighearna ri mo Thighearna, suidh air mo laimh dheis, gus an cuir mi do naimhdean ʼnan stol-chas dhut?

⁴⁵ Ma tha Dài ma ta cantuinn a Thighearna ris, ciamar a tha e ʼna mhac dha?

⁴⁶ ʼS cha bʼurrainn do dhuine facal freagairt a thoirt da: cha mhua a bha chridhe aig duine sa bith bhoʼn latha sin suas a cheasnachadh.