Marcus 7 - Tiomnadh Nuadh (MacEachen) 1875

VII. CAIB. Criosta cronachadh nam Phairiseach; a leigheas nighean na bana-Chanaanaich, agus an duine a bha bodhar us balbh.

¹ Agus thionail na Phairisich ga ionnsuidh, us cuid dhe na Sgriobhaich, a thainig bho Ierusalem.

² Agus nuair a chunnaic iad cuid dhe dheisciopuil a g-ithe arain le lamhan cumanta, se sin, gun an nighe, fhuair iad coire dhaibh.

³ Oir cha n-ith na Phairisich, agus na h-Iudhaich uile biadh, mur nigh iad an lamhan gu tric, a leanail beul-aithris nan seanairean.

⁴ Agus ma thig iad bhoʼn mhargadh, cha n-ith iad gun ionnlad; ʼs tha ioma ni eile ann, a tha air an orduchadh dhaibh a chumail, mar tha nighe chupaichean, us phoitean, us shoitheachan pràise, us leabaichean.

⁵ Agus dhʼfharraid na Phairisich ʼs na Sgriobhaich dheth: Car-son nach eil do dheisciopuil a g-imeachd air reir beul-aithris nan seanairean, ach a g-ithe arain le lamhan gun nighe?

⁶ Ach esan a freagairt, thuirt e riu: Is math a dhʼfhaisnich Isaias muʼr deidhinn, a chealgairean, mar tha e sgribhte: Tha ʼm pobull so toirt urraim dhomhsa leʼm bilean: ach tha an cridhe fada bhuam.

⁷ Agus is faoin dhaibh a bhith toirt aoraidh dhomhsa, ʼs iad a teasgasg puingean us orduighean dhaoine.

⁸ Oir a fagail fainte Dhe, tha sibh a cumail beul-aithris dhaoine, mar tha nighe phoitean, us chupaichean; agus moran nichean eile de ʼn leithidean sin tha sibh a dianamh.

⁹ Us thuirt e riu: Is math tha sibh a cur fainte Dhe air chul, gus ur beul-aithris fhein a chumail.

¹⁰ Oir thuirt Maois: Thoir onair dha tʼathair us dha dʼmhathair; agus: Am fear a mholluicheas ʼathair no mhathair, a basachadh basaicheadh e.

¹¹ Ach tha sibhse g-radh: Ma their duine ri ʼathair no ri mhathair: Corban sam bith (se sin tobhartas) bhuam-sa, thig e gu buannachd dhutsa:

¹² Agus thar sin cha leig sibh leis dad a dhianamh dha athair, no dha mhathair,

¹³ A cur facal De air chul le ur bial-aithris fhein, a thug sibh seachad; agus tha sibh a dianamh ioma ni eile coltach riu sin.

¹⁴ ʼSa gairm a rithist an t-sluaigh ga ionnsuidh, thuirt e riu: Eisdibh rium uile, agus tuigibh.

¹⁵ Cha n-eil ni a dol a stigh ann an duine bhoʼn taobh-mach, a ʼs urrainn a thruailleadh: ach ʼsiad na nichean a tha tighinn a mach á duine, a tha truailleadh an duine.

¹⁶ Ma tha cluasan aig neach air bith gu cluinntinn, cluinneadh e.

¹⁷ Agus nuair a chaidh e stigh do ʼn tigh bhoʼn t-sluagh, dhʼfharraid a dheisciopuil dheth an dubhfhacal.

¹⁸ Us thuirt e riu: Am beil sibhse mar sin gun tuigse? Nach eil sibh a tuigsinn, nach eil ni sa bith a dol a stigh ann an duine bhoʼn taobh-mach, a ʼs urrainn a thruailleadh:

¹⁹ A chionn ʼs nach eil e a dol a stigh ʼna chridhe, ach a dol a stigh ʼna bhroinn, us theid e mach do ʼn dùn, a glanadh bhiadhan uile?

²⁰ Ach thuirt e, gur iad na nichean, a thig mach as an duine a thruailleas an duine.

²¹ Oir ʼsann bhoʼn taobh stigh á cridhe dhaoine a thig droch smaointean, adhaltras, striopachas, murt,

²² Goid, sannt, droch-bheart, foill, mi-gheamnachd, droch-shuil, blaisbheum, uabhar, aimideachd.

²³ Tha na h-uilc sin uile a struthadh bhoʼn taobh stigh, ʼs tha iad a truailleadh an duine.

²⁴ ʼSa g-eirigh as a sin, chaidh e gu criochan Thiruis agus Shidoin; ʼsa dol a stigh do thigh, cha bʼaill leis gum biodh brath aig duine sa bith air, agus cha bʼurrainn e bhith am falach.

²⁵ Oir cho luath ʼsa chuala boirionnach, aig an robh nighean anns an robh spiorad neoghlan, uime, chaidh i stigh, agus thuit i aig a chasan.

²⁶ Oir bu bhana-phaganach am boirionnach de chinneadh Shirophenissa. Agus ghrios i air gun cuireadh e an deomhan as a h-ighinn.

²⁷ Thuirt esan rithe: Leig leis a chloinn a bhith air an riarachadh an toiseach: oir cha n-eil e math aran na cloinne a ghabhail, ʼsa thilgeadh thun nan con.

²⁸ Ach fhreagair ise, us thuirt i ris: Tha, a Thighearna, oir ithidh na cuileinean foʼn bhord de chriomagan na cloinne.

²⁹ Us thuirt e rithe: Air son an fhacail so bi falbh, chaidh an deomhan a mach as do nighinn.

³⁰ ʼS nuair rainig i a tigh, fhuair i an nighean ʼna laidhe air an leabaidh, ʼs an deomhan air dol a mach.

³¹ ʼSa triall a rithist á criochan Thiruis, thainig e tromh Shidon gu muir Ghalile tromh mhiadhon criochan Dhecapolis.

³² Agus thug iad ga ionnsuidh duine bodhar us balbh, agus ghuidh iad air, gun cuireadh e a lamh air.

³³ Us ga thoirt a lethtaobh a mach as an t-sluagh, chuir e mheoir ʼna chluasan; ʼs le shile bhean e dha theangaidh;

³⁴ ʼSa g-amharc suas gu neamh, thug e osnadh, us thuirt e: Ephpheta, se sin, bi air tʼfhosgladh.

³⁵ Agus san uair dhʼ fhosgladh a chluasan, agus dhʼfhuasgladh ceangal a theangaidh, us labhair e ceart.

³⁶ Us dhʼàithn e orra gun iad a dhʼinnse do neach air bith. Ach mar is mua dhʼàithn e orra ʼsann is ro-mhua bha iadsa ga innse;

³⁷ Agus ʼsann is ro-mhua ghabh iad iongantas, a g-radh: Rinn e a h-uile ni gu math; thug e air na bodhair cluinntinn, agus air na balbhain labhairt.