Marcus 12 - Tiomnadh Nuadh (MacEachen) 1875

XII. CAIB. Dubhfhacal an fhion-lios ʼs na tuatha. Còir Chésair air cis. Na Sadusaich air an diteadh. A chiad fhainte. Leth-fheoirlinn na bantraich.

¹ Us thòisich e ri labhairt riu ann an dubhfhacail: Phlanntaich duine araid fion-lios, us chuir e gàradh; mu thimchioll, us chladhaich e amar-fiona, us thog e tùr, us shuidhich e air tuath e, us dhʼfhalbh e gu tir chein.

² Agus chuir e seirbhiseach thun na tuatha san àm, los gum faigheadh e de thoradh an fhion-lios bhoʼn tuath.

³ ʼSa breith air, bhuail iad e, us chuir iad air falbh falamh e.

⁴ Agus a rithist chuir e gan ionnsuidh seirbhiseach eile; us lot iad sa cheann e, agus thug iad taire dha.

⁵ ʼSa rithist chuir e fear eile, ʼs mharbh iad e; agus moran eile: cuid dhiu sgiurs iad, ach cuid eile mharbh iad.

⁶ Ach fhathast bha aona mhac ro-ghradhach aige, agus mu dheireadh uile chuir e esan gan ionnsuidh, a g-radh: Bheir iad athadh dha mʼ mhac.

⁷ Ach thuirt an tuath ri cheile: Se so an t-oighre: thigibh, marbhamaid e; agus bithidh an oighreachd againn fhein.

⁸ ʼSa breith air, mharbh iad e; us thilg iad a mach as a ghàradh-fhiona e.

⁹ Ciod ma ta a ni tighearna a ghàraidh-fhiona? Thig e, agus sgriosaidh e an tuath sin; agus bheir e ghàradh-fiona do dhʼfheadhainn eile.

¹⁰ Nach do leugh sibh an sgriobtur so: A chlach a dhiult na clachairean, rinneadh clach-chinn na h-oisinn di:

¹¹ Leis an Tighearna rinneadh so, ʼs tha e iongantach ʼnar suilean?

¹² Agus dhʼiarr iad a ghlacadh, ach bha eagal an t-sluaigh orra: oir bʼaithne dhaibh gum bʼann muʼn deidhinn fhein a labhair e an dubhfhacal so. Agus ga fhagail, dhʼfhalbh iad.

¹³ Us chuir iad ga ionnsuidh cuid de na Phairisich, agus de luchd-leanmhuinn Heroid, fiach an glacadh iad e ʼna chainnt.

¹⁴ Thainig iadsan, us thuirt iad ris: A Mhaighistir, tha fios againn gur duine firinneach thu, ʼs nach eil eisimeil agad ri duine air bith: oir cha sheall thu air pearsa dhaoine, ach tha thu teagasg slighe Dhe am firinn. Bheil e ceadaichte cis a thoirt do Chésar, no nach toir sinn i?

¹⁵ Thuig esan am foill, us thuirt e riu: Car-son tha sibh gam bhuaireadh? faraibh dhomh sgilinn gus am faic mi i.

¹⁶ Agus thug iad dha i. Us thuirt e riu: Co leis an iomhaigh so, ʼs an sgriobhadh? Thuirt iad ris: Le César.

¹⁷ Us Iosa freagairt, thuirt e riu: Thugaibh ma ta do Chésar na bhuineas do Chésar; ʼs do Dhia na bhuineas do Dhia. Agus ghabh iad iongantas as.

¹⁸ Agus thainig na Sadusaich ga ionnsuidh, a tha cantuinn nach eil aiseirigh ann; us dhʼfharraid iad dheth, a g-radh:

¹⁹ A mhaighistir, sgriobh Maois dhuinn, ma gheobh brathair duine bàs, ʼs gum fag e bean, ʼs nach fhag e clann, gabhadh a bhrathair a bhean, ʼs togadh e sliochd dha bhrathair.

²⁰ A nis bha seachdnar bhraithrean ann: ʼs ghabh a chiad fhear bean, agus chaochail e gun sliochd fhagail.

²¹ Agus ghabh an darna fear i, agus chaochail esan; ʼs cha mhua dhʼfhag e sliochd. Agus an treas fear mar an ciadna.

²² Agus mar sin ghabh an t-seachdnar i; ʼs cha dʼfhag iad sliochd. ʼNan deigh uile dhʼeug am boirionnach fhein.

²³ Anns an aiseirigh ma ta, nuair dhʼeireas iad, co dhiu sin dhaʼm bi i ʼna mnaoi? oir bha i ʼna mnaoi aig an t-seachdnar.

²⁴ Agus fhreagair Iosa, us thuirt e riu: Nach eil sibh gu beachd a dol mearachd a thaobh so le cion eolais air na sgriobturan, ʼs air cumhachd Dhe?

²⁵ Oir nuair a dhʼeireas iad bho na mairbh, cha phos iad, ʼs cha mhua phosar iad, ach tha iad mar na h-ainglean sna flathais.

²⁶ Agus a thaobh aiseirigh nam marbh, nach do leugh sibh an leabhar Mhaois, mar a labhair Dia ris anns a phreas, a g-radh: Is mise Dia Abrahaim, agus Dia Isaic, agus Dia Iacoib?

²⁷ Cha Dia nam marbh e, ach nam beo. Tha sibhse uime sin dol fada mearachd.

²⁸ Us thainig fear de na Sgriobhaich, a chual iad a consachadh, ʼsa faicinn gur math a fhreagair e iad, dhʼ fharraid e dheth co bʼi a chiad fhainte dhiu uile.

²⁹ Us fhreagair Iosa e: Gum bʼ i chiad fhainte dhiu uile: Eisd, Israel: is aon Dia an Tighearna do Dhia:

³⁰ Agus bheir thu gaol doʼn Tighearna do Dhia le tʼuile chridhe, agus le tʼuile anam, agus le fuile inntinn, agus le tʼ uile neart. Se so chiad fhainte.

³¹ Agus tha an darna fainte coltach rithe: Bheir thu gaol dha do choimhearsnach mar dhut fhein. Nas mua na iad so cha n-eil fainte eil ann.

³² Us thuirt an sgriobhach ris: Is math, a Mhaighistir, a labhair thu an fhirinn, gum beil aon Dia ann, ʼs nach eil ann ach e;

³³ ʼS gur e gaol thoirt da leis an uile chridhe, ʼs leis an uile anam, ʼs leis an uile inntinn, agus leis an uile neart; agus gaol a thoirt do choimhearsnach mar do dhuine fhein, is mua na gach iobairt uile-loisgte agus tobhartas eile.

³⁴ Agus Iosa faicinn, gur glic a fhreagair e, thuirt e ris: Cha n-eil thu fada bho rioghachd Dhe. Us bho sin suas cha robh chridhe aig duine ceisd a chur air.

³⁵ Us thuirt Iosa, ʼs e freagairt nuair bha e teagasg san teampull: Ciamar tha na Sgriobhaich a cantuinn gur e Criost mac Dhài?

³⁶ Oir tha Dài fhein a cantuinn leis an Spiorad Naomh: Thuirt an Tighearna ri mo Thighearna, suidh air mo laimh dheis, gus an cuir mi do naimhdean ʼnan stol-chas dhut.

³⁷ Tha Dài fhein ma ta a cantuinn a Thighearna ris, agus ciamar ma ta is e a mhac? Us dhʼeisd moran sluaigh ris gu deonach.

³⁸ Us thuirt e riu ʼna theagasg: Thugaibh an aire oirbh fhein bho na Sgriobhaich leis an toil imeachd an culaidhean fada, agus furan fhaighinn air a mhargadh,

³⁹ Agus suidhe air na ciad chathraichean anns na sinagogan, ʼs air na ciad shuidheachain aig suipeirean:

⁴⁰ A shluigeas tighean bhantrach air sgàth urnaighean fada: gheobh iad sin binn nas cruaidhe.

⁴¹ ʼS nuair a bha Iosa ʼna shuidhe mu choinneamh tasgaidh an iuntais, chunnaic e mar bha ʼn sluagh a tilgeadh airgid san tasgaidh, agus thilg moran de dhaoine beartach na h-uibhir innte.

⁴² Agus thainig bantrach bhochd, us chuir i dà leth-fheoirlinn, se sin fairdein, innte.

⁴³ ʼSa gairm a dheisciopul, thuirt e riu: Gu deimhinn tha mi g-radh ribh, gun do chuir a bhantrach bhochd so tuilleadh na iadsan uile, a chuir anns an tasgaidh.

⁴⁴ Oir ʼsann bho am mor-phailteas a chuir iadsan uile ann; ach ʼsann bho h-uireasuidh a chuir ise, gu ruig a tiochd-an-tir air fad.