Marcus 1 - Tiomnadh Nuadh (MacEachen) 1875

I. CHAIB. Teagasg Eoin Baiste: Criosta air a bhaisteadh leis: Criosta a gairm a dheisciopul, ʼsa dianamh moran mhiarailtean.

¹ Toiseach soisgeul Iosa Criosta, Mac Dhe.

² Air reir ʼs mar tha e sgribhte san fhaidh Isaias: Seall, cuiridh mi mʼaingeal roimh do ghnuis, a reiticheas do shlighe romhad.

³ Guth neach a g-eigheach san fhasach: Reitichibh slighe an Tighearna, agus dianaibh aisridhean direach.

⁴ Bha Eoin anns an fhasach a baisteadh, ʼsa searmonachadh baisteadh an aithreachais gu mathanas pheacannan.

⁵ Agus chaidh duthaich Iudéa uile mach ga ionnsuidh, agus muinntir Ierusalem gu leir, us bhaisteadh iad leis ann an abhuinn Iordain a g-aideachadh am peacannan.

⁶ Agus bha Eoin air eideadh le fionnadh chamhal, us crios leathrach mu leasraidh; agus dhʼich e locuist us mil fhiadhaich. Agus shearmonaich e, a g-radh:

⁷ Tha fear nas cumhachdaiche na mise tighinn am dheigh: neach nach airidh mise air cromadh sios us bariall a bhrogan fhuasgladh.

⁸ Bhaist mise sibh le uisge; ach baistidh esan sibh leis an Spiorad Naomh.

⁹ Us thachair, gun tainig Iosa anns na laithean sin bho Nasareth Ghalile; agus bhaisteadh e le Eoin an Iordan.

¹⁰ ʼS air ball a direadh as an uisge, chunnaic ʼe neamh fosgailte, ʼs an Spiorad mar chalman a tearnadh ʼsa fantuinn air.

¹¹ Agus thainig guth bho neamh: Is tusa mo Mhac gaolach, is mor mo thlachd dhiot.

¹² Agus ghrad-ghreas an Spiorad e doʼn fhasach.

¹³ Agus bha e san fhasach dà-fhichead latha, agus dà-fhichead oidhche; us bhuaireadh le Satan e; ʼs bha e comhla ris na h-ainmhidhean, agus bha na h-ainglean a frithealadh dha.

¹⁴ ʼS an deigh do dhʼ Eoin a bhith air a liubhairt seachad, thainig Iosa do Ghalile, a searmonachadh soisgeul rioghachd Dhe,

¹⁵ ʼSa g-radh: Thaʼn t-àm air a choimhlionadh, ʼs tha rioghachd Dhe aig laimh; gabhaibh aithreachas, agus creidibh san t-soisgeul.

¹⁶ ʼSa gabhail ri taobh muir Ghalile, chunnaic e Simon, agus Aindris a bhrathair, a cur lion sa mhuir (oir bʼiasgairean iad),

¹⁷ Agus thuirt Iosa riu: Thigibh am dheighse, agus ni mi iasgairean dhaoine dhibh.

¹⁸ Agus ghrad-dhʼfhag iad na lìn, us lean iad e.

¹⁹ ʼSa gabhail as a sin ceum beag air adhart, chunnaic e Seumas mac Shebede agus Eoin a bhrathair, ʼs iad a caradh nan lion san t-saghach:

²⁰ Agus ghairm e iad san uair. ʼSa fagail an athar Sebede maille ris an luchd-thuarasdail san t-saghach, lean iad e.

²¹ Agus chaidh iad a stigh do Chapharnaum; agus air dha dol a stigh gun dail air na laithean sàbaide doʼn t-sinagog, theagaisg e iad.

²² Agus ghabh iad ioghnadh ri theagasg: oir bha e gan teagasg mar neach aig an robh cumhachd, ʼs cha n-ann mar na Sgriobhaich.

²³ Agus bha san t-sinagog aca duine anns an robh spiorad neoghlan, us dhʼeigh e,

²⁴ A g-radh: Ciod an comunn eadar sinn agus thusa, Iosa bho Nasareth? an tainig thu gus ar sgrios? Is aithne dhomh co thu, Aon Naomh Dhe.

²⁵ Us mhaoith Iosa air, a g-radh: Bi ad thosd, agus gabh mach as an duine.

²⁶ ʼS an spiorad neoghlan ga riabadh, ʼsa g-eigheach le guth ard, chaidh e mach as.

²⁷ Agus ghabh iad uile iongantas, ionnus gun dʼfharraid iad ʼnam measg fhein, a g-radh: Ciod e so? ciod e an teagasg ùr so? oir tha e toirt orduigh le cumhachd do na spioraid neoghlan fhein, agus tha iad umhailt dha.

²⁸ Agus sgaoil iomradh air gun dàil feadh duthaich Ghalile uile.

²⁹ ʼSa dol a mach air ball as an t-sinagog, thainig iad maille ri Seumas us Eoin gu tigh Shimoin us Aindris.

³⁰ Agus bha mathair-cheile Shimoin ʼna laidhe ann an teasaich; agus dhʼinnis iad dha gun dàil mu deidhinn.

³¹ Agus thainig e, ʼsa breith air laimh oirre thog e i; us ghrad-dhʼfhag an teasach i, agus fhreasdail i dhaibh.

³² ʼS nuair thainig am feasgar, ʼsa chaidh a ghrian fodha, thug iad ga ionnsuidh iadsan uile a bha easlainteach, agus anns an robh deomhain.

³³ ʼS bha am baile uile air cruinneachadh aig an dorus.

³⁴ Agus leighis e moran, a bha air an leireadh le iomadh gné ghalar, agus thilg e mach moran dheomhan, ʼs cha do leig e leo labhairt, a chionn ʼs gum bʼaithne dhaibh e.

³⁵ ʼSa g-eirigh ro-mhuch, ʼsa dol a mach, chaidh e gu aite fàs; us rinn e urnaigh an sin.

³⁶ Agus lean Simon e, agus iadsan a bha cuide ris.

³⁷ ʼS nuair a fhuair iad e, thuirt iad ris: Tha iad uile ga dʼ shireadh.

³⁸ Us thuirt e riu: Rachamaid do na bailtean ʼs na caithrichean sa choimhearsnachd, gus an searmonaich mi an sin cuideachd: ʼs gur ann h-uige so a thainig mi.

³⁹ ʼS bha e teagasg ʼnan sinagogan, ʼs feadh Ghalile uile, ʼsa tilgeadh mach dheomhan.

⁴⁰ Agus thainig lobhar ga ionnsuidh, a guidhe air; ʼsa tuiteam air a ghluinean, thuirt e ris: Ma ʼs aill leat, is urrainn dhut mo ghlanadh.

⁴¹ ʼSa gabhail truais ris, shìn Iosa a lamh, ʼsa beantuinn da, thuirt e ris: Is aill: bi glan.

⁴² ʼS nuair thuirt e so, ghrad-dhʼfhag an luibhre e, agus bha e air a ghlanadh.

⁴³ ʼS thug e sparradh cruaidh dha, agus leig e air falbh e gun dàil;

⁴⁴ ʼS thuirt e ris: Fiach nach innis thu do neach air bith: ach falbh, fiach thu fhein doʼn ard-shagart, agus tairg air son do ghlanaidh na nichean a dhʼorduich Maois, mar theisteanas dhaibh.

⁴⁵ Ach air dhasan dol a mach, thòisich e ri innse, ʼs ri sgaoileadh an sgeoil; air chor ʼs nach bʼurrainn e nis dol a stigh doʼn bhaile gu follaiseach, ach dhʼfhuirich e mach ann an aitean fàs, agus thionail iad as gach aite ga ionnsuidh.