Lùcas 7 - Tiomnadh Nuadh (MacEachen) 1875

VII. CAIB. Criosta leigheas seirbhiseach a cheannaird-chiad; a toirt beo mac na bantraich; a freagairt teachdairean Eoin; ʼsa toirt mathanais doʼn bhana-pheacaich a ghabh aithreachas.

¹ ʼS nuair a chriochnaich e na briathran sin uile ann an eisdeachd an t-sluaigh, chaidh e stigh do Chapharnaum.

² Agus aig ceannard-ciad araid bha seirbhiseach, a bha ro-mheasail aige, gu tinn, ʼs aig uchd bàis.

³ ʼS nuair chual e mu Iosa, chuir e ga ionnsuidh seanairean nan Iudhach, a dhʼiarraidh air tighinn ʼsa sheirbhiseach a leigheas.

⁴ ʼS nuair thainig iad gu Iosa, ghuidh iad air gu durachdach, a g-radh ris: Is airidh e air thu so dhianamh dha:

⁵ Oir is toil leis ar cinneadh, us thog e sinagog dhuinn.

⁶ Agus dhʼfhalbh Iosa comhla riu. ʼS nuair bha e nis teann air an tigh, chuir an ceannard-ciad cairdean ga ionnsuidh, a g-radh: A Thighearna, na cuir dragh ort fhein: oir cha n-airidh mise gun tigeadh tu stigh fo mʼfhardaich:

⁷ Le sin cha do shaoil mi gum bʼairidh mi fhein air tighinn ga tʼ ionnnsuidhse: ach abair am facal, us bithidh mo sheirbhiseach air a leigheas.

⁸ Oir is duine mi fhein air mo chur fo uachdranachd, aig a bheil saighdearan fodham; agus their mi ri fear: Falbh, us falbhaidh e; ʼs ri fear eile: Thig, us thig e; agus ri mo sheirbhiseach: Dian so, us ni e e.

⁹ Ghabh Iosa, ʼs e cluinntinn so, iongantas; ʼsa tionndadh ris an t-sluagh, a bha ga leantuinn, thuirt e: Gu firinneach tha mi g-radh ribh, nach dʼfhuair mi urad chreidimh ann an Israel fhein.

¹⁰ ʼS nuair a thill an fheadhainn, a bha air an cur, thun an tighe, fhuair iad an seirbhiseach, a bha tinn, slan.

¹¹ Us thachair an deigh sin, gun robh e dol gu baile, ris an abrar Naim; agus gun robh a dheisciopuil us moran sluaigh a dol comhla ris.

¹² ʼS nuair thainig e teann air geata a bhaile, seall, bhathas a giulan a mach duine mhairbh, aona mhac a mhathar, ʼs bu bhantrach i; agus bha cuideachda mhor de mhuinntir a bhaile comhla rithe.

¹³ Nuair a chunnaic an Tighearna i, a gabhail truais di, thuirt e rithe: Na bi gal.

¹⁴ Agus thainig e faisg, us bhean e do ʼn chiste. Agus sheas iadsan, a bha ga giulan. Us thuirt e: Oganaich, tha mi g-radh riut, eirich.

¹⁵ Agus shuidh esan a bha marbh naird, agus thòisich e ri bruidhinn. Us thug e dha mhathair e.

¹⁶ Agus ghabh iad uile eagal; us thug iad gloir do Dhia, a g-radh: Dhʼ eirich faidh mor ʼnar measg; us dhʼamhairc Dia air a phobull fhein.

¹⁷ Agus ruith an sgial so uime feadh Iudéa uile, us feadh na duthcha gu leir mun cuairt.

¹⁸ Agus dhʼinnis deisciopuil Eoin dha mu dheidhinn nan nichean so uile.

¹⁹ Us ghairm Eoin dithis dhe a dheisciopuil, agus chuir e gu Iosa iad, a g-radh: An tu esan a tha ri tighinn, no am bi duil againn ri aon eile?

²⁰ ʼS nuair thainig na fir ga ionnsuidh, thuirt iad: Chuir Eoin Baiste sinn ga dʼ ionnsuidh, a g-radh: An tu esan a tha ri tighinn, no am bi dùil againn ri aon eile?

²¹ (Agus sa cheart uair sin, leighis e moran bho ʼn easlaintean, us bho ʼn creuchdan, us bho dhroch, spioraid, agus do mhoran dhall thug e am fradharc.)

²² Agus a freagairt, thuirt e riu: Falbhaibh, agus innsibh do Eoin na chual, ʼs na chunnaic sibh: Gu bheil na doill a faicinn, na bacaich a coiseachd, na lobhair air an glanadh, na bodhair a cluinntinn, na mairbh a g-eirigh rithist, an soisgeul air a shearmonachadh do na bochdan:

²³ Agus is beannaichte a h-uile h-aon nach gabh sgainneal asamsa.

²⁴ ʼS nuair a dhʼfhalbh teachdairean Eoin, thòisich e ri labhairt ris an t-sluagh mu Eoin: Ciod a chaidh sibh a mach do ʼn fhasach a dhʼ fhaicinn? cuilc air a crathadh leis a ghaoith?

²⁵ Ach ciod a chaidh sibh a mach a dhʼ fhaicinn? duine air eideadh an aodach riomhach? Seall, ʼsann an tighean righrean tha iadsan, a tha air an sgeadachadh an aodach priseil, ʼsa tighinn beo an ailleas.

²⁶ Ach ciod a chaidh sibh mach a dhʼfhaicinn? faidh? Seadh, tha mi g-rabh ribh, agus tuilleadh na faidh:

²⁷ Se so esan mu bheil e sgriobhte: Seall, cuiridh mi mʼ aingeal roimh do ghnuis, a reiticheas do shlighe romhad.

²⁸ Oir tha mi g-radh ribh: Am measg na rugadh bho mhnathan cha n-eil faidh nas mua na Eoin Baiste: ach tha an urra is lugha an rioghachd Dhe nas mua na esan.

²⁹ Agus an sluagh uile ʼs na cismhaoir, ʼs iad ga chluinntinn, dhʼfhirinnich iad Dia le bhith air am baisteadh le baisteadh Eoin.

³⁰ Ach chuir na Phairisich ʼs an luchd-lagha suarach comhairle Dhe ʼnan aghaidh fhein, oir cha do bhaisteadh iad leis.

³¹ Us thuirt an Tighearna: Co ris ma ta a shamhlaicheas mi daoine a ghinealaich so? agus co ris a tha iad coltach?

³² Tha iad coltach ri cloinn ʼnan suidhe sa mhargadh, agus a bruidhinn ri cheile, ʼsa g-radh: Ghleus sinn ceol dhuibh, ʼs cha do dhanns sibh; rinn sinn cumha, ʼs cha do ghuil sibh.

³³ Oir thainig Eoin Baiste, gun a bhith g-icheadh arain, no g-ol fiona, agus tha sibhse g-radh: Tha deomhan aige.

³⁴ Thainig Mac an duine a g-ich ʼsa g-ol, us tha sibh a g-radh: Seall fear a tha ʼna gheocaire ʼs ʼna phòitear fiona, ʼna charaid chismhaor agus pheacach.

³⁵ Ach tha gliocas air a firinneachadh le ʼcloinn uile.

³⁶ Agus dhʼiarr feareigin de na Phairisich air iche maille ris. Us chaidh e stigh do thigh an Phairisich, agus shuidh e sios gu biadh.

³⁷ Agus, seall, nuair a thuig boirionnach, a bha ʼna bana-pheacaich sa bhaile, gun robh e aig biadh an tigh an Phairisich, thug i leatha bocsa alabastair a dhʼola;

³⁸ ʼSa fantuinn air chùl aig a chasan, thòisich i ri chasan a fhliuchadh le a deoir, agus shuath i a chasan le falt a cinn, us phog i a chasan, us dhʼung i iad leis an oladh.

³⁹ Agus am Phairiseach, a thug cuireadh dha, a faicinn so, thuirt e ris fhein, a g-radh: Nam bʼe so faidh, gu cinnteach dhʼaithneadh e co i, agus ciod an seorsa boirionnaich a tha beantuinn da: chionn is bana-pheacach i.

⁴⁰ Us thuirt Iosa ris, ʼs e freagairt: A Shimoin, tha rudeigin agam ri radh riut. Ach ars esan: A Mhaighistir, abair e.

⁴¹ Bha fiachan aig riadhadair araid air dithis: air aon fhear coig ciad peighinn, agus air an fhear eile leth-chiad.

⁴² Agus bho nach robh dad aca leis am paidheadh iad, mhath e dhaibh le cheile. Co aca ma ta a bheir am barrachd gaoil dha?

⁴³ Fhreagair Simon, a g-radh: Tha mi am barail, gur e esan dha ʼm mua a mhath e. Us thuirt e ris: Is ceart a thug thu breth.

⁴⁴ ʼSa tionndadh ris a bhoirionnach, thuirt e ri Simon: A bheil thu faicinn a bhoirionnaich so? Thainig mi stigh dha dʼ thigh; cha tug thu uisge dhomh air son mo chasan: ach ise, nigh i mo chasan le a deoir, agus shuath i iad le ʼfalt.

⁴⁵ Cha tug thu pog dhomh: ach cha do sguir ise, bho na thainig i stigh, a phogadh mo chasan.

⁴⁶ Cha dʼung thu mo cheann le ola: ach dhʼung ise mo chasan le ola.

⁴⁷ Air an aobhar sin tha mi g-radh riut: Tha moran pheacannan air am mathadh dhi, chionn gun tug i moran gaoil. Ach an neach, dha ʼm mathar nas lugha, se is lugha a bheir gaol.

⁴⁸ An sin thuirt e rithe: Tha do pheacannan air am mathadh dhut.

⁴⁹ Us thòisich iadsan, a bha aig biadh maille ris, ri radh riu fhein: Co so, a tha mathadh pheacannan cuideachd?

⁵⁰ Ach thuirt e ris a bhoirionnach: Shabhail do chreideamh thu; falbh an sith.