Lùcas 4 - Tiomnadh Nuadh (MacEachen) 1875

IV. CAIB. Traisgʼ us buaireadh Chriosta: an geur-leanmhuinn a dhʼ fhuilig e an Nasareth: a mhiarailtean ann an Capharnaum.

¹ Agus thill Iosa bho Iordan lan deʼn Spiorad Naomh; agus ghluaiseadh leis an Spiorad e do ʼn fhasach.

² Fad dà fhichead latha, agus bhuaireadh e leis an deomhan. ʼS cha dʼ ich e ni ré nan laithean sin; ʼs nuair a chaidh iad seachad bha acras air.

³ Us thuirt an deomhan ris: Ma ʼs tu Mac De, abair ris a chloich so fàs ʼna h-aran.

⁴ Us fhreagair Iosa e: Tha e sgriobhte: Nach ann air aran a mhain a tha ʼn duine tighinn beo, ach air h-uile facal De.

⁵ Agus thug an deomhan e gu beinn aird, agus dhʼ fhiach e dha rioghachdan an domhain gu leir ann am mionaid na h-uarach,

⁶ Us thuirt e ris: Bheir mi dhut a chumhachd so uile ʼs an gloir: oir thugadh dhomhsʼ iad, agus bheir mi iad doʼn neach is aill leam.

⁷ Ma ni thu ma ta aoradh am lathair, is leat iad uile.

⁸ Fhreagair Iosa, agus thuirt e ris: Tha e sgriobhte: Bheir thu aoradh do ʼn Tighearna do Dhia, agus dhasan a mhain ni thu seirbhis.

⁹ Agus thug e gu Ierusalem e, agus chuir e air binnein an teampuill e, us thuirt e ris: Ma ʼs tu Mac De, tilg thu fhein sios á so.

¹⁰ Oir tha e sgriobhte, gun tug e ordugh dha ainglean mu dʼ dheidhinn, iad ʼgad ghleidheadh:

¹¹ ʼS ʼnan lamhan togaidh iad suas thu, eagal, ma dhʼ fhaoidte, gum buail thu do chas nʼ aghaidh cloiche.

¹² Agus Iosa a freagairt, thuirt e ris: Tha e air a radh: Na buair an Tighearna do Dhia.

¹³ ʼS nuair a sguir am buaireadh uile, dheilich an deomhan ris car uine.

¹⁴ Agus thill Iosa ann an neart an Spioraid do Ghalile, agus chaidh iomradh uime feadh na ducha gu leir.

¹⁵ Us theagaisg e ʼnan sinagogan, agus dhʼ ard-mholadh e leo uile.

¹⁶ Agus thainig e gu Nasareth, far an deach àrach, ʼs chaidh e stigh doʼn t-sinagog, mar a chleachd e, air latha na sàbaid, agus dhʼ eirich e suas a leughadh.

¹⁷ Agus thugadh dha leabhar an fhaidh Isaias. ʼSa fosgladh an leabhair, fhuair e an t-aite anns an robh e sgriobhte:

¹⁸ Tha Spiorad an Tighearna orm: air an aobhar sin dhʼung e mi gus an soisgeul a theagasg do na bochdan, chuir e mi a leigheas luchd a chridhe bhruite,

¹⁹ A shearmonachadh saorsa do dhaoine am braighdeanas, agus fradhairc do na doill, a dhʼfhuasgladh air an fheadhainn a tha bruite, a shearmonachadh bliadhna thaitneach an Tighearna, agus latha an ath-dhiolaidh.

²⁰ ʼS nuair a dhuin e an leabhar, thug e doʼn fhear-fhrithealaidh e, agus shuidh e. Us bha suilean na bha san t-sinagog uile a dearcadh air.

²¹ Agus thòisich e ri cantuinn riu: An diugh thaʼn sgriobtur so air a choimhlionadh ʼnur cluasan.

²² Us thug iad uile teisteanas dha: agus ghabh iad iongantas as na facail ghrasor a thainig a mach as a bhial, us thuirt iad: Nach e so mac Ioseiph?

²³ Us thuirt e riu: Gun teagamh their sibh an sean-fhacal so rium: A lighich, leighis thu fhein: dian nichean cho mor, ʼsa chuala sinn a rinn thu an Capharnaum, an so na dʼ dhuthaich fhein.

²⁴ Agus thuirt e: Gu deimhinn deiream ribh nach gabhar ri faidh air bith ʼna dhuthaich fhein.

²⁵ Gu firinneach deiream ribh: bha moran bhantrach ann an lài Eliais an Israel, nuair dhuineadh neamh fad thri bhadhna agus shia miosan, nuair bha gorta mhor feadh an talmhuinn gu leir:

²⁶ ʼS gu h-aon dhiu cha do chuireadh Elias, ach gu té a bha ʼna bantraich an Sarepta Shidonia.

²⁷ Agus bha ioma lobhar an Israel ri linn Eliséuis am faidh: ʼs cha do ghlanadh a h-aon diu, ach Naaman an Sirianach.

²⁸ Ri so a chluinntinn, lionadh iad uile a bha san t-sinagog le feirg.

²⁹ Us dhʼeirich iad suas, agus thilg iad a mach e as a bhaile; ʼs thug iad e gu maladh na beinne air na thogadh am baile aca, gus a thilgeadh sios an comhair a chinn.

³⁰ Ach esan a gabhail tromh am miadhon, shiubhail e.

³¹ Agus chaidh e sios do Chapharnaum, baile ann an Galile, ʼs bha e gan teagasg an sin air laithean na sàbaid.

³² Us bha iongantas orra as a theagasg: chionn bha bhriathran le cumhachd.

³³ Agus anns an t-sinagog bha duine anns an robh deomhan neoghlan, agus ghlaodh e le guth ard,

³⁴ A g-radh: Leig leinn, ciod an comunn eadar sinn agus thusa, Iosa bho Nasareth? an ann gus ur sgrios a thainig thu? Is aithne dhomh co thu, Aon Naomh Dhe.

³⁵ Agus chronaich Iosa e, a g-radh: Bi na dʼ thosd, us theirig a mach as. ʼS nuair thilg an deomhan e sios ʼnam miadhon, chaidh e mach as gun dochunn air bith a dhianamh air.

³⁶ Agus bhuail uamhas iad uile, us labhair iad ri cheile, a g-radh: Ciod e am facal so, oir le ughdaras ʼs le cumhachd tha e toirt orduigh do na spioraid neoghlan, agus tha iad a dol a mach?

³⁷ Agus sgaoil a chliu feadh gach aite deʼn duthaich.

³⁸ Agus dhʼeirich Iosa as an t-sinagog, us chaidh e stigh do thigh Shimoin. Agus bha mathair-cheile Shimoin air a glacadh le fiabhrus mor; agus ghuidh iad air ga taobh.

³⁹ ʼSa seasamh fos a cionn, dhʼàithn e air an fhiabhrus; us dhʼfhag e i. Agus ghrad-dhʼeirìch i, us fhritheil i dhaibh.

⁴⁰ ʼS nuair chaidh a ghrian fodha, thug iadsan uile, aig an robh daoine tinne le ioma seorsa ghalar, ga ionnsuidh iad. Agus esan a leagail a lamhan air gach aon dhiu, leighis e iad.

⁴¹ Agus chaidh na deomhain a mach á moran, a glaodhaich ʼsa g-radh: Is tu Mac Dhe. Us gan cronachadh, cha leigeadh e leo labhairt; oir bʼaithne dhaibh gum bʼe an Criosta.

⁴² ʼS nuair thainig an latha, a gabhail a mach chaidh e gu aite fàs, ʼs bha an sluagh ga shireadh, agus thainig iad ga ionnsuidh; us bha iad ga chumail, chum nach dealaicheadh e riu.

⁴³ Ach thuirt e riu: Feumaidh mi rioghachd Dhe shearmonachadh do bhailtean eile: oir ʼsann air son sin a chaidh mo chur.

⁴⁴ Agus shearmonaich e ann an sinagogan Ghalile.