Lùcas 19 - Tiomnadh Nuadh (MacEachen) 1875

XIX. CAIB. Sacheus a toirt cuilme do Chriosta: dubhfhacal nam punnd: Criosta a marcachd air asail, ʼsa gal thairis air Ierusalem.

¹ Agus air dha dol a stigh ann, thriall e tromh Iericho.

² Us, seall, bha duine ann dha ʼm bʼainm Sacheus; agus bu cheannard nan cismhaor e, ʼs e beartach.

³ Agus bha deidh aige air Iosa fhaicinn, fiach co bʼ e; ʼs cha bʼurrainn da leis an t-sluagh, a chionn gun robh e iosal am pearsa.

⁴ ʼSa ruith air thoiseach, sthreap e ri craoibh-shicamoir gus fhaicinn: oir bha e gu dol seachad an rathad sin.

⁵ ʼS nuair thainig Iosa thun an aite, a g-amharc suas chunnaic e e, agus thuirt e ris: A Shacheuis, dian cabhag, ʼs thig a nuas: oir feumaidh mi comhnuidh a ghabhail an diugh na dʼ thigh.

⁶ Agus rinn e cabhag a nuas, us ghabh e ris le aoibhneas.

⁷ ʼS nuair a chunnaic iad uile so, bha iad ri monmhur, a g-radh gun robh e air dol gu bhith ʼna aoidh aig duine a tha ʼna pheacach.

⁸ Agus Sacheus a stad, thuirt e ris an Tighearna: Seall, a Thighearna, tha mi toirt leth mo mhaoin do na bochdan; ʼs ma mheall mi a bheag bho neach air bith, tha mi ga thoirt air ais dha ceithir fillte.

⁹ Thuirt Iosa ris: Thainig sabhaladh an diugh thun an tighe so: a thaobh gur mac esan cuideachd do Abraham.

¹⁰ Oir thainig Mac an duine a shireadh ʼsa shabhaladh na bha caillte.

¹¹ ʼS nuair a bha iad a g-eisdeachd ris na nichean so, lean e us labhair e dubhfhacal, a chionn gun robh e teann air Ierusalem, ʼsa chionn gun robh iad an duil gum faicte rioghachd Dhe gun dàil.

¹² Thuirt e uime sin: Chaidh duine uasal araid do dhuthaich fad as, a ghabhail rioghachd dha fhein, agus a thilleadh a rithist.

¹³ ʼS ghairm e a dheich sheirbhisich, ʼs thug e deich puinnd dhaibh, agus thuirt e riu: Dianaibh marsantachd gus an tig mi.

¹⁴ Agus bha fuath aig a luchd-ducha air; ʼs chuir iad teachdaireachd as a dheigh, a g-radh: Cha n-aill leinn an duine so a bhith ʼna righ oirnn.

¹⁵ Agus thachair gun do thill e, air dha rioghachd fhaighinn; ʼs dhʼorduich e a sheirbhisich a bhith air an gairm, dha ʼn tug e an t-airgiod, gu fios a bhith aige dé urad ʼsa choisinn gach fear le marsantachd.

¹⁶ ʼSa chiad fhear a tighinn, thuirt e: A thighearna, choisinn do phunnd deich puinnd.

¹⁷ Us thuirt e ris: Is math a fhuaradh tu, a dheagh sheirbhisich: bho na bha thu dileas am beagan, bithidh thu na dʼ uachdran air deich bailtean.

¹⁸ Agus thainig an ath fhear, a g-radh: A thighearna, choisinn do phunnd coig puinnd.

¹⁹ Us thuirt e ris-san: Bisa mar an ciadna os cionn choig bhailtean.

²⁰ Agus thainig fear eile, a g-radh: A thighearna, seall do phunnd, a ghleidh mi taisgte ann an neapaicin:

²¹ Oir bha sgàth agam romhad, a thaobh ʼs gur duine cruaidh thu: tha thu togail ni nach do leag thu, ʼsa buain ni nach do chuir thu.

²² Thuirt e ris: Bho do bhial fhein tha mi toirt breth ort, a sheirbhisich eucoraich: bha fhios agad gur duine cruaidh mi, a togail ni nach do leag mi, ʼsa buain ni nach do chuir mi:

²³ Car-son ma ta nach do chuir thu mo chuid airgid sa bhanc, gus, air mo thighinn, gun agrainn e le riadh?

²⁴ Agus thuirt e riusan, a bha ʼnan seasamh lamh ris: Thugaibh am punnd bhuaithe, ʼs thugaibh e dhasan aig a bheil na deich puinnd.

²⁵ Agus thuirt iad ris: A thighearna, tha deich puinnd aige.

²⁶ Ach tha mi g-radh ribh, do ʼn h-uile h-aon, aig a bheil, bheirear, agus bithidh mor-phailteas aige: agus an neach, aig nach eil, bheirear bhuaithe an ni sin fhein a thʼ aige.

²⁷ Ach a thaobh mo naimhdean ud, leis nach bʼaill mi bhith am righ orra, thugaibh an so iad; agus marbhaibh iad na mʼ fhianuis.

²⁸ ʼS an deigh dha so chantuinn, dhʼimich e rompa, a gabhail suas gu Ierusalem.

²⁹ Agus thachair nuair a bha e teannadh air Bethphage agus Betania, aig sliabh ris an canar Olibhet, gun do chuir e air adhart dithis dhe dheisciopuil,

³⁰ A g-radh: Siubhlaibh do ʼn bhaile a tha mu ʼr comhair; ʼsa dol a stigh ann gheobh sibh searrach asail an ceangal, air nach do shuidh duine riamh; fuasglaibh us thugaibh an so e.

³¹ ʼS ma dhʼfharraideas duine air bith dhibh: Car-son tha sibh ga fhuasgladh? mar so their sibh ris: A chionn gum beil feum aig an Tighearna air a sheirbhis.

³² Agus shiubhail iadsan, a chaidh a chur air adhart; us fhuair iad an searrach ʼna sheasamh, mar a thuirt e riu.

³³ ʼS nuair bha iad a fuasgladh an t-searraich, thuirt a shealbhadairean riu: Car-son tha sibh a fuasgladh an t-searraich?

³⁴ Ach thuirt iadsan: A chionn gum beil feum aig an Tighearna air.

³⁵ Us thug iad gu Iosa e. ʼSa tilgeadh an aodaich air an t-searrach, chuir iad Iosa air a mhuin.

³⁶ Agus mar a thriall e, sgaoil iad an aodach fodha air an rathad.

³⁷ ʼS nuair bha e nis dluthachadh air leathad beinn Olibheit, thòisich buidhean a dheisciopul uile le aoibhneas air Dia a mholadh le guth ard, air son nan gniomhan cumhachdach uile, a chunnaic iad,

³⁸ A g-radh: Is beannaichte an righ, a tha tighinn an ainm an Tighearna, sith air neamh, us gloir ʼs na h-ardaibh.

³⁹ Agus thuirt cuid dhe na Phairisich a bha measg an t-sluaigh ris: A Mhaighistir, cronaich do dheisciopuil.

⁴⁰ Riu so thuirt e: Tha mi g-radh ribh, ma bhios iad so samhach, eighidh na clachan.

⁴¹ Agus nuair tharruinn e faisg, ri faicinn a bhaile, ghuil e thairis air, a g-radh:

⁴² Nam bʼ aithne dhut, seadh dhutsa, agus sin na dʼ là so fhein, na nichean a tha gu sith dhut? ach a nis tha iad falaichte bho do shuilean.

⁴³ Oir thig na laithean ort: us cladhaichidh do naimhdean staing mu dʼ thimchioll agus cuairtichidh iad thu; agus teannaichidh iad thu air gach taobh;

⁴⁴ Agus leagaidh iad ris an làr thu, agus do chlann a tha unnad, ʼs cha n-fhag iad unnad clach air muin cloiche: chionn ʼs nach bʼ aithne dhut àm tʼ fhiachuinn.

⁴⁵ ʼS air dha dol a stigh do ʼn teampull, theann e ri tilgeadh a mach na feadhnach, a bha reic ʼsa cearmach ann,

⁴⁶ A cantuinn riu: Tha e sgriobhte: Is tigh urnaigh mo thigh-sa. Ach rinn sibhse uamha mheirleach dheth.

⁴⁷ Agus bha e teagasg san teampull a h-uile latha. Agus bha na h-ard-shagairt agus na Sgriobhaich agus uachdrain an t-sluaigh a g-iarraidh cur as da:

⁴⁸ ʼS cha robh iad a faighinn ciod a dhianadh iad air. Oir bha an sluagh uile an ro-gheall air a chluinntinn.