Lùcas 1 - Tiomnadh Nuadh (MacEachen) 1875

I. CHAIB. Gineamhuinn Eoin Baiste agus Chriosta: turus us duan na h-Oighe beannaichte Moire: breith Eoin agus duan Shachariais.

¹ Bho na ghabh moran fos laimh na nichean, a choimhlionadh ʼnar measgne, a sgriobhadh sios an ordugh:

² Air reir ʼs mar a dhʼinnseadh dhuinn leis an fheadhainn a bha ann bho thoiseach ʼnam fianuisean ʼs ʼnan luchd-frithealaidh doʼn fhacal:

³ Chunnacas iomchuidh leamsa cuideachd, ʼs mi air faotuinn a mach gu dichiollach gach ni bho thoiseach, an sgriobhadh an ordugh dhut, a Theophiluis urramaich,

⁴ Gu fios a bhith agad air firinneachd nam facal sin, anns an deach do theagasg.

⁵ An laithean Heroid righ Iudéa, bha sagart araid ann, dhaʼm bʼainm Sacharias, de roinn Abia, ʼs bha a bhean de nigheanan Aaroin, agus bʼe a h-ainm Ealasaid.

⁶ Agus bha iad le cheile ionraic an lathair Dhe, a g-imeachd ann an uile fhaintean agus riaghailtean an Tighearna gun ghiomh;

⁷ Agus cha robh mac aca, a chionn gun robh Ealasaid neo-thorrach, ʼs gun robh iad le cheile fad air an adhart an laithean.

⁸ Us thachair, nuair a bha e an ordugh a chuairt fhein a cur driachd sagairt an gniomh an lathair Dhe,

⁹ A reir cleachdadh na sagartachd, gum bʼe chrannchur dol a stigh do thigh an Tighearna, agus tùis a thairgse suas;

¹⁰ ʼS aig uair na tùise bha co-thional a phobuill uile a g-urnaigh am muigh.

¹¹ Agus chunnacas leis aingeal an Tighearna, ʼna sheasamh air taobh deas altair na tùise.

¹² Agus Sacharias ga fhaicinn bha e fo fhurban, us thainig eagal air.

¹³ Ach thuirt an t-aingeal ris: Na biodh eagal ort, a Shachariais: oir dhʼeisdeadh ri tʼurnaigh; us beiridh do bhean Ealasaid mac dhut, ʼs bheir thu Eoin mar ainm air;

¹⁴ Agus bithidh e ʼna aobhar sòlais us aighir dhut, agus gabhaidh moran toil-inntinn as a bhreith.

¹⁵ Oir bithidh e mor an lathair an Tighearna; agus cha n-ol e fion, no deoch laidir, agus lionar e leis an Spiorad Naomh, seadh bho bhroinn a mhathar;

¹⁶ Us tionndaidhidh e moran de chloinn Israil ris an Tighearna an Dia;

¹⁷ Agus imichidh e roimhe ann an spiorad ʼs an cumhachd Eliais; gu cridheachan nan aithrichean a thionndadh ris a chloinn, ʼs na neo-chreidich gu gliocas nan ionraic, agus gu pobull coimhlion uidheamachadh doʼn Tighearna.

¹⁸ Agus thuirt Sacharias ris an aingeal: Ciamar a dhʼ aithneas mi so? oir is seann duine mi, agus tha mo bhean fad air a h-adhart an laithean.

¹⁹ Fhreagair an t-aingeal us thuirt e ris: Is mise Gabriel, a tha na mʼ sheasamh air bialaobh Dhe; agus chuireadh mi a labhairt riut, ʼsa dhʼinnse naigheachd so an aigh dhut.

²⁰ Agus, seall, bithidh tu balbh, agus gun chomas labhairt gus an latha san tachair so, a thaobh ʼs nach do chreid thu mo bhriathransa, a choimhlionar ʼnan àm fhein.

²¹ Agus bha am pobull a feitheamh ri Sacharias; agus bʼiongantach leo ciod a bha ga chumail san teampull cho fada.

²² Air dha tighinn a mach cha bʼurrainn da bruidhinn riu, us thuig iad gum faca e sealladh san teampull. ʼS bha e smeideadh riu, agus dhʼ fhan e balbh.

²³ Agus thachair, nuair thainig laithean a dhriachd gu ceann, gun dʼ fhalbh e gu thigh fhein.

²⁴ ʼS an deigh nan laithean sin dhʼfhas a bhean Ealasaid lethtromach, agus dhʼfhalaich i i fhein fad choig miosan, a g-radh:

²⁵ A thaobh gur ann mar so a rinn an Tighearna rium anns na laithean air na sheall e orm gus mo mhasladh a thogail dhiom am measg dhaoine.

²⁶ ʼS air an t-siathamh mios chuireadh an t-aingeal Gabriel bho Dhia gu baile an Galile dhaʼn ainm Nasareth,

²⁷ Gu oigh bha fo cheangal posaidh aig duine, dhaʼm bʼ ainm Ioseph, de thigh Dhài, agus bʼ e ainm na h-oighe Moire.

²⁸ ʼS an t-aingeal a dol a stigh ga h-ionnsuidh, thuirt e: Fàilt ort, tha thu lan de na grasan: tha an Tighearna maille riut: Is beannaichte thu am measg nam mna.

²⁹ Nuair chuala ise so, bha i fo bhruaidlean thaobh a chainnt, ʼsa smaoineachadh ciod a ghné altachaʼ-bheatha a bhaʼn so.

³⁰ Us thuirt an t-aingeal rithe: Na biodh eagal ort, a Mhoire, oir fhuair thu grasan an lathair Dhe:

³¹ Seall, gabhaidh tu na dʼ chom, agus beiridh tu Mac, ʼs bheir thu Iosa mar ainm air.

³² Bithidh e mor, agus theirear Mac an Tì is airde ris, ʼs bheir an Tighearna Dia dha cathair Dhài ʼathair; agus righichidh e an tigh Iacoib a chaoidh,

³³ Agus air a rioghachd cha bhi crioch.

³⁴ Us thuirt Moire ris an aingeal: Ciamar a bhios sin, ʼs nach eil aithne agam air duine?

³⁵ ʼS an t-aingeal a freagairt, thuirt e rithe: Thig an Spiorad Naomh ort, agus cuiridh cumhachd an Tì is airde sgàile ort. Agus air an aobhar sin an Naomh a bheirear leat, theirear Mac Dhe ris.

³⁶ Us, seall, do bhanacharaid Ealasaid, ghin ise cuideachd mac ʼna sean aois; agus se so an siathamh mios dhi-sa, a theirear neo-thorrach rithe:

³⁷ Chionn ʼs nach eil facal air bith do-dhiante do Dhia.

³⁸ Us thuirt Moire: Seall bean-mhuinntir an Tighearna, biodh e diante dhomh a reir tʼ fhacail. Us dhʼfhalbh an t-aingeal bhuaipe.

³⁹ Agus dhʼeirich Moire sna lài sin, agus dhʼ fhalbh i le cabhaig do dhuthaich nam beann gu baile ann an Iuda;

⁴⁰ Agus chaidh i stigh do thigh Shachariais, us chuir i fàilt air Ealasaid.

⁴¹ Us thachair, cho luath ʼsa chuala Ealasaid fàilt Moire, gun do leum an naoidhean ʼna com; agus lionadh Ealasaid leis an Spiorad Naomh;

⁴² Agus dhʼeigh i le guth ard, us thuirt i: Is beannaichte thu am measg nam mna, agus is beannaichte toradh do bhronn.

⁴³ Agus ciamar tha an rath so orm, gun tigeadh mathair mo Thighearna ga mʼ ionnsuidh?

⁴⁴ Oir, seall, cho luath ʼsa thainig guth tʼfhàilte gu mo chluasan, leum an naoidhean le aoibhneas na mʼbhroinn.

⁴⁵ Agus is beannaichte thusa a chreid, a chionn ʼs gun coimhlionar na nichean sin, a chaidh labhairt riut leis an Tighearna.

⁴⁶ Us thuirt Moire: Tha mʼ anam a g-ardachadh an Tighearna:

⁴⁷ Us ghlac mo spiorad aoibhneas ann an Dia mo Shlanair.

⁴⁸ A chionn gun do sheall e air irioslachd a bhan-sheirbhisich: oir, seall, á so suas their a h-uile ginealach beannaichte rium.

⁴⁹ A chionn gun dʼ rinn esan a tha cumhachdach nichean mora dhomh; agus is naomh ʼainm.

⁵⁰ Agus bho linn gu linn tha throcair doʼn fheadhainn air a bheil fhiamh.

⁵¹ Dhʼfhiach e neart ʼna ghairdean: sgap e na h-uaibhrich am pròis an cridhe fhein.

⁵² Thilg e na daoine cumhachdach dhe ʼn cathraichean, agus dhʼardaich e na daoine iriosal.

⁵³ Lion e na daoine acrach le nichean matha, ʼs leig e air falbh na daoine saibhir falamh.

⁵⁴ Ghabh e ri Israel a sheirbhiseach, a cuimhneachadh, a throcaire.

⁵⁵ A reir ʼs mar dhʼ innis e dhaʼr n-aithrichean, do Abraham, agus dha shliochd gu siorruidh.

⁵⁶ Us dhʼfhuirich Moire maille rithe mun cuairt do thri miosan, agus thill i gus a tigh fhein.

⁵⁷ Agus choimhlionadh àm aisead Ealasaid, agus rug i mac.

⁵⁸ Us chual a coimhearsnaich ʼsa luchd-daimh, gun dʼfhiach an Tighearn a mhor throcair dhi, agus rinn iad co-aoibhneas maille rithe.

⁵⁹ ʼS air an ochdamh latha thachair, gun tainig iad gus an leanabh a thimchioll-ghearradh, agus bha iad a toirt Sacharias air, ainm athar.

⁶⁰ Ach fhreagair a mhathair, a g-radh: Cha n-e idir, ach bheirear Eoin air.

⁶¹ Us thuirt iad rithe: Cha n-eil aon dhe dʼ chinneadh air a bheil an t-ainm sin.

⁶² Agus smeid iad air athair, fiach ciod an t-ainm a bʼaill leis a thoirt air.

⁶³ Agus dhʼiarr e clar-sgriobhaidh, agus sgriobh e, a g-radh: Se Eoin ʼainm. Agus ghabh iad uile iongantas.

⁶⁴ Agus ghrad-dhʼfhosgladh a bhial, us dhʼfhuasgladh a theanga, agus labhair e, a moladh Dhe.

⁶⁵ Agus thuit eagal air an coimhearsnaich uile; agus sgaoil na briathran so uile feadh bheanntan Iudéa air fad;

⁶⁶ Us iadsan uile, a chual iad, ghleidh iad ʼnan cridhe iad, a g-radh: Co, a shaoileas tu, bhios san leanabh so? oir bha lamh an Tighearna leis.

⁶⁷ Agus lionadh Sacharias ʼathair leis an Spiorad Naomh; agus rinn e faidheadaireachd, a g-radh:

⁶⁸ Beannaichte gun robh an Tighearna Dia Israil: a chionn ʼs gun do sheall e air a phobull, ʼs gun do shaor e e:

⁶⁹ ʼS gun do thog e adharc shabhalaidh dhuinn an tigh Dhài a sheirbhiseach:

⁷⁰ (A reir ʼs mar a labhair e á bial fhaidhean naomh fhein, a bha ann bho thoiseach:)

⁷¹ Sabhaladh bhoʼr naimhdean, ʼs bho laimh na feadhnach sin uile, a thug fuath dhuinn:

⁷² Gu trocair fhiachuinn dha ʼr n-aithrichean, ʼsa thiomnadh naomh a chuimhneachadh:

⁷³ Am mionn, a mhionnaich e dha ʼr n-athair Abraham, gun deonaicheadh e dhuinn:

⁷⁴ Los, air dhuinn a bhith air ar saoradh bho laimh ar naimhdean, gun dian sinn seirbhis dha gun fhiamh,

⁷⁵ Ann an naomhachd ʼs an ceartas ʼna lathair fad ar laithean gu leir.

⁷⁶ Agus theirear riutsa, a leinibh, faidh an Tì is airde; oir theid thu roi ghnuis an Tighearna gu shlighean a reiteachadh.

⁷⁷ Gu eolas an t-sabhalaidh a thoirt dha phobull, gu mathanas am peacannan:

⁷⁸ Tromh innibh trocair ar Dia, leis an tainig an t-Ur-sholus as na h-ardaibh ga ʼr sealltuinn:

⁷⁹ Gu soilleireachd a thoirt dhaibhse, a tha ʼnan suidhe ann an dorchadas ʼs an dubhar a bhàis, gu iul a dhianamh dhaʼr casan gu slighe na sithe.

⁸⁰ Agus dhʼfhas an leanabh, us neartaicheadh e san spiorad; agus bha e anns an fhasach gu latha fhoillseachaidh do Israel.