Gnìomharan 8 - Tiomnadh Nuadh (MacEachen) 1875

VIII. CAIB. Philip a tionndadh nan Samaritanach, ʼsa baisteadh a chaillteanaich.

¹ Agus rinneadh anns an àm sin geur-leanmhuinn mhor an aghaidh na h-eaglais a bha ann an Ierusalem, agus sgapadh iad uile, ach na h-ostail, air feadh dhuchannan Iudéa us Shamaria.

² Agus ghabh daoine crabhach curam dhe Stephan thaobh a thiodhlaiceadh, us rinn iad moran caoidh fos a chionn.

³ Ach bha Saul a sgriosadh na h-eaglais, a dol bho thigh gu tigh ʼsa slaodadh a mach fhirionnach agus bhoirionnach, ʼs gan sparradh am priosan.

⁴ Chaidh iadsan ma ta, a sgapadh, mun cuairt a searmonachadh facal De.

⁵ Agus Philip a dol sios gu baile Shamaria, theagaisg e Criosta dhaibh.

⁶ Agus leag an sluagh an aire air na nichean bha Philip a labhairt, gan eisdeachd a dhʼ aon aigne, ʼsa faicinn nam miarailtean a rinn e.

⁷ Oir chaidh na spioraid neoghlan a mach á moran anns an robh iad, a glaodhaich le guth ard.

⁸ ʼS chaidh moran air an robh an tinneas-critheach, ʼsa bha bacach, a leigheas.

⁹ Uime sin bha aoibhneas mor anns a bhaile sin. A nis bha duine araid, dha ʼm bʼ ainm Simon, a bha roimh sin ʼna dhraoidh sa bhaile sin, a mealladh muinntir Shamaria, a g-radh gum bu neach-eigin mor e fhein;

¹⁰ Dha ʼn tug iad uile cluas bho ʼn bheag gus a mhor, a g-radh: Se am fear so cumhachd Dhe, ris an abrar mor.

¹¹ Agus thug iad eisdeachd dha, a chionn ʼs gun robh e air am buidseachadh fad moran uine le dhraoidheachd.

¹² Ach nuair a chreid iad Philip a teagasg mu rioghachd Dhe, bhaisteadh iad eadar dhaoine us mhnathan ann an ainm Iosa Criosta.

¹³ An sin chreid Simon fhein; ʼs an deigh dha bhith air a bhaisteadh, dhluth-lean e ri Philip. ʼS ri faicinn nan comharran ʼs nam miarailtean a rinneadh, ghlac ioghnadh us uamhas e.

¹⁴ A nis nuair a chuala na h-ostail, a bha ann an Ierusalem, gun do ghlac Samaria facal De, chuir iad Peadar us Eoin gan ionnsuidh.

¹⁵ ʼS nuair a thainig iad, ghuidh iad air an son gum faigheadh iad an Spiorad Naomh:

¹⁶ Oir cha tainig e fhathast air a h-aon diu, ach bha iad air am baisteadh a mhain an ainm an Tighearna Iosa.

¹⁷ An sin leag iad an lamhan orra, us ghlac iad an Spiorad Naomh.

¹⁸ ʼS nuair a chunnaic Simon gun robhas a toirt seachad an Spioraid Naoimh le leagadh lamhan nan ostal, thairg e airgiod dhaibh,

¹⁹ A g-radh: Thugaibh dhomhsa cuideachd a chumhachd so, gun glac neach air bith air an cuir mi mo lamhan an Spiorad Naomh. Ach thuirt Peadar ris:

²⁰ Rachadh tʼ airgiod a dhith maille riut fhein: a chionn gun do shaoil thu gum faoidte gibht Dhe a cheannach le airgiod.

²¹ Cha n-eil cuid no crannchur agad san teagasg so: oir cha n-eil do chridhe treibhdhireach an lathair Dhe.

²² Gabh aithreachas ma ta as do dhrochbheart so; agus guidh air Dia, fiach ma dhʼ fhaoidte gum mathar dhut smaoineachadh so do chridhe.

²³ Oir tha mi faicinn gum beil thu ann an domblas na seirbhe ʼs an cuibhrichean an uilc.

²⁴ An sin Simon a freagairt, thuirt e: Guidhibhse an Tighearna as mo leth, gus nach tig ni orm de na nichean sin a thuirt sibh.

²⁵ ʼ S gu deimhinn an deigh dhaibh fianuis a thoirt, us facal an Tighearna labhairt, thill iad gu Ierusalem, agus shearmonaich iad an soisgeul ann am moran de dhuchannan nan Samaritanach.

²⁶ An sin labhair aingeal an Tighearna ri Philip, a g-radh: Eirich, us theirig gu deas thun an rathaid a tha gabhail sios bho Ierusalem do Ghasa: a tha ʼna fhasach.

²⁷ ʼSa g-eirigh, dhʼ fhalbh e. Agus seall, bha fear á Ethiopia, caillteanach ro chumhachdach fo Chandase, banrighn nan Ethiopianach, a bha fos cionn a h-iuntasan uile, air tighinn gu Ierusalem a thoirt aoraidh:

²⁸ Agus bha e tilleadh ʼna shuidhe ʼna charbad, ʼsa leughadh an fhaidh Isaias.

²⁹ Us thuirt an Spiorad ri Philip: Theirig am faisg, agus dluthaich ris a charbad sin.

³⁰ ʼS air do Philip ruith ga ionnsuidh, chual e e leughadh an fhaidh Isaias, us thuirt e: An saoil thu gum beil thu tuigsinn na tha thu leughadh?

³¹ Thuirt esan: Ciamar is urrainn domh, mar seol cuideigin mi? Us dhʼ iarr e air Philip tighinn an aird, agus suidhe comhla ris.

³² Agus bʼ e so an t-aite de ʼn sgriobtur a bha e leughadh: Thugadh e mar chaora thun na casgairt; ʼs mar uan gun ghuth romh an rusgadair, mar sin cha dʼfhosgail e bhial.

³³ Ann an irioslachd thugadh air falbh a bhreitheanas. Co dhʼ innseas a ghinealach, oir bheirear a bheatha dhe ʼn talamh?

³⁴ ʼS thuirt an Caillteanach, ʼs e freagairt Philip: Guidheam ort, co uime a tha ʼm faidh a labhairt so? an ann mu dheidhinn fhein, no mu neach-eigin eile?

³⁵ An sin dhʼ fhosgail Philip a bhial, ʼsa toiseachadh aig an sgriobtur so, theagaisg e Iosa dha.

³⁶ Agus rainig iad, ʼs iad a gabhail an rathaid, uisge araid; us thuirt an Caillteanach: Seall uisge, ciod tha bacadh mi bhith air mo bhaisteadh?

³⁷ Us thuirt Philip: Ma tha thu creidsinn le tʼ uile chridhe, tha e ceadaichte. Us thuirt esan, ʼs e freagairt: Tha mi creidsinn gur e Iosa Criosta Mac De.

³⁸ Agus dhʼ orduich e do ʼn charbad stad; us theirinn iad le cheile sios do ʼn uisge, Philip agus an Caillteanach, agus bhaist e e.

³⁹ ʼS air dhaibh tighinn a nios as an uisge, thug Spiorad an Tighearna Philip air falbh, ʼs cha n-fhaca an Caillteanach e tuilleadh. Us ghabh e air a shlighe le aoibhneas.

⁴⁰ Agus fhuaras Philip ann an Asotos, ʼsa gabhail air adhart, shearmonaich e an soisgeul do na bailtean uile, gus an dʼ rainig e Cesaréa.