Gnìomharan 27 - Tiomnadh Nuadh (MacEachen) 1875

XXVII. CAIB. Pol a dol do ʼn Roimh air bord saghaich: a thurus mara: us bristeadh an t-saghaich.

¹ ʼS nuair shuidhicheadh gun seoladh Pol do ʼn Eadailte, ʼs gun rachadh a liubhairt maille ris na priosanaich eile do cheannard-ciad dha ʼm bʼ ainm Iulius, de chuideach da Augustuis,

² Chaidh sinn air bord saghaich a bhuineadh do Adrimetum, us thog sinn a mach, a cur romhainn seoladh ri oirthir Asia, Aristarchus bho Thessalonica ann am Macedonia a fuireach maille ruinn.

³ ʼS an ath latha thainig sinn do Shidon. Agus Iulius a gabhail le caoimhneas ri Pol, leig e leis dol gu chairdean, ʼsa bhith air a churam fhein.

⁴ ʼS nuair a thog sinn a mach as a sin, sheol sinn fo Chiprus: a chionn gun robh a ghaoth ʼnar n-aghaidh.

⁵ ʼSa seoladh thar muir Chilicia us Phamphilia, thainig sinn do Listra, a thʼ ann an Licia:

⁶ ʼS an ceannard-ciad a faighinn an sin luinge bho Alecsandria a dol do ʼn Eadailte, chuir e sinne air a bordsa.

⁷ ʼS air dhuinn a bhith seoladh gu mall fad moran laithean, ʼs gur gann a thainig sinn fa chomhair Ghniduis, leis a ghaoth a bhith ga ʼr bacail, sheol sinn teann air Crete faisg air Salmone:

⁸ ʼSa seoladh air eiginn seachad air, thainig sinn gu aite araid, ris an canar an Deaghchala, air an robh baile Thalassa teann.

⁹ Bho na uhaidh moran uine seachad, ʼs gun robh an seoladh a nis cunnartach, a thaobh gun deach an traisg cheana seachad, thug Pol misneach dhaibh,

¹⁰ A g-radh riu: Fheara, tha mi faicinn gum beil an seoladh a teannadh air a bhith gu call ʼs gu moran dolaidh, cha n-ann a mhain do ʼn luchd ʼs do ʼn luing, ach dha ʼr beatha cuideachd.

¹¹ Ach bha an ceannard-ciad a toirt tuilleadh creideis do ʼn stiuradair agus do mhaighistir na luinge, na do na nichean a bha Pol a g-radh.

¹² Agus bho nach robh an cala goireasach gu geamhrachadh ann, bʼ e comhairle na cuid bu mhua seoladh as a sin, fiach am bʼ urrainn daibh an doigh air bith Phenicé thoirt a mach, cala de Chrete a tha sealltuinn ris an iar-dheas agus an iar-thuath, agus geamhrachadh an sin.

¹³ ʼS nuair a sheid soirbheas caoin á deas, a saoilsinn gun dʼ fhuair iad an run, thog iad a mach bho Asson, a cumail ri tir Chrete.

¹⁴ Ach beagan an deigh sin, sheid gaoth ghailbheach ʼna h-aghaidh, Euro-acuilo theirte rithe.

¹⁵ ʼS miair a ghlacadh an long leis, ʼs nach bʼ urrainn di cathachadh an aghaidh na gaoithe, a toirt na luinge do ʼn ghaoith, chaidh ar fuadachadh.

¹⁶ ʼSa ruith fo eilein araid, dha ʼm bʼ ainm Cauda, is gann a bʼ urrainn duinn ruighinn air a bhàta.

¹⁷ An deigh a thogail, chuir iad gleusan comhnuidh an uidheam, a criosachadh na luinge foipe, a gabhail eagail gun tigeadh iad sa bheo-ghainmhich, leig iad sios an t-slat-shiuil, ʼs mar sin dhʼ fhuadaicheadh iad.

¹⁸ ʼS nuair a bha sinn air ar luasgadh gu h-anabarrach leis an stoirm, air an ath latha dhʼ aotromaich iad an long;

¹⁹ ʼS air an treas latha thilg iad a mach le ʼn lamhan fhein acfhuinn na luinge.

²⁰ ʼS nuair nach fhacas grian no reultan fad moran laithean, agus stoirm nach bu bheag a maoidheadh oirnn, thugadh a nis bhuainn a h-uile duil ri tiarnadh.

²¹ Agus an deigh dhaibh bhith moran uine ʼnan traisg, thuirt Pol, ʼs e seasamh suas ʼnam miadhon: O dhaoine, bu choir dhuibh gu dearbh a bhith air eisdeachd riumsa, ʼs gun togail a mach á Crete, agus an dolaidh ʼs an call so sheachnadh.

²² Agus se mo chomhairle dhuibh a nis deagh mhisneach a bhith agaibh: oir cha chaillear beatha duine air bith agaibh, ach caillear an long.

²³ Oir air an oidhche nochd sheas lamh rium aingeal an De, leis an leis mise, agus dha ʼm beil mi dianamh seirbhis,

²⁴ A g-radh: Na biodh eagal ort, a Phoil, tha e riatanach gun seas thu an lathair Chésair; us, seall, thug Dia dhut iadsan uile a tha seoladh maille riut.

²⁵ Uime sin, fheara, biodh deagh mhisneach agaibh: oir tha mi creidsinn ann an Dia, gun tachair mar a chaidh a radh rium.

²⁶ Agus ʼs fheudar gun tig sinn air eilein araid.

²⁷ ʼS an deigh do ʼn cheathramh oidhche diag tighinn, us sinn a seoladh mu mhiadhon oidhche air muir Adria, shaoil leis na seoladairean gum faca iad tir air choireigin.

²⁸ ʼSa leigeil sios na luaidhe, fhuair iad fichead aitheamh; ʼsa gabhail beagan air adhart, fhuair iad coig aitheamh diag.

²⁹ An sin air eagal gum buaileadh sinn air garbhlach, thilg iad ceithir acraichean a mach air a deireadh, ʼs iad deidheil air an latha thighinn.

³⁰ Ach bho na bha na maraichean a g-iarraidh teicheadh as an luing, ʼsa leig iad sios am bàta do ʼn mhuir, mar gum bʼ ann a thilgeadh a mach acraichean á toiseach na luinge,

³¹ Thuirt Pol ris a cheannard-chiad ʼs ris na saighdearan: Mur fuirich iad so san luing, cha n-urrainn duibhse bhith sabhailte.

³² An sin ghearr na saighdearan buill a bhàta, ʼs leig iad leis tuiteam sios.

³³ ʼS aig bristeadh na fàire, ghuidh Pol orra uile biadh a ghabhail, a g-radh: Se an diugh an ceathramh latha diag a tha sibh a feitheamh ʼsa fuireach ʼnur traisg, gun dad a ghabhail.

³⁴ Uime sin guidheam oirbh biadh a ghabhail air son ur slainte: oir cha chaillear fuiltean cinn a h-aon agaibh.

³⁵ ʼS nuair thuirt e so, a glacadh arain, thug e taing do Dhia ʼnan lathair uile; us nuair a bhrist e, thòisich e air iche.

³⁶ An sin dhʼ fhas iad uile na bu mhisneachaile, us ghabh iad fhein biadh.

³⁷ Agus bha sinn san luing uile gu leir dà chiad, tri-fichead, us sia-diag de dhʼanmannan.

³⁸ ʼS nuair a dhʼich iad am foghnadh, dhʼ aotromaich iad an long leis a chruithneachd a thilgeadh sa mhuir.

³⁹ ʼS nuair thainig an latha cha dʼ aithnich iad am fearann: ach thug iad an aire do shàilean araid, aig an robh cladach, air am bu mhath leo, nam bʼ urrainn daibh an long a thilgeadh.

⁴⁰ ʼS nuair a thog iad na h-acraichean, dhʼearb iad iad fhein ris a mhuir, a fuasgladh cuideachd ceanglaichean na stiuire; ʼsa togail suas an t-siuil-mhoir ris a ghaoith, rinn iad air a chladach.

⁴¹ ʼS nuair thuit sinn air aite far na choinnich dà fhairge, bhuail iad an long air a ghrunnd; agus dhʼ fhan a toiseach an sàs gun charachadh, ach bhristeadh a deireadh le neart na mara.

⁴² Agus bʼ e comhairle nan saighdearan na priosanaich a mharbhadh, eagal iad a dhʼ fhalbh air an t-snamh, agus teicheadh.

⁴³ Ach an ceannard-ciad, ʼs e an geall air Pol a thiarnadh, bhac e so dhianamh; us dhʼ orduich e dha ʼn fheadhainn dha ʼm bʼ aithne snamh iad fhein a thilgeadh sa mhuir an toiseach, ʼs tàrsuinn as, agus tir a chosnadh;

⁴⁴ ʼSa thaobh chàich, bhathas gan giulan, cuid air buird, cuid air nichean a bhuineadh do ʼn luing. Agus mar so thachair, gun dʼ fhuair a h-uile anam sabhailte gu tir.